សេវាកម្ម​ថត Pre-Wedding នៅ​កម្ពុជា​ហាក់​មាន​កំណើន​ខ្ពស់ តែ​តម្លៃ​ប្រកួតប្រជែង​ខ្លាំង


រាជធានី​ភ្នំពេញ ៖ សេវាកម្ម​ថត Pre-Wedding (​ថតរូប​អនុស្សាវរីយ៍ មុន​រៀប​ការ ) នៅ​ក្នុង​ប្រទេស​កម្ពុ​ជានា​ពេល​បច្ចុប្បន្ន​នេះ ទទួល​បានការ​គាំទ្រ​និង​ពេញ​និយម​ខ្លាំង​ពី​សំណាក់​យុវវ័យ​ដែល​ត្រៀមខ្លួន​រៀប​ការ ដែល​ធ្វើ​អោយ​អ្នក​ផ្ដល់​សេវាកម្ម​មួយ​នេះ កាន់តែ​រីក​ចម្រើន​ឡើង ក្នុង​នោះ​គេ​សង្កេត​ឃើញ​ថា ការ​ចំណាយ​ទៅ​លើ​ការ​ថតរូប​អនុស្សាវរីយ៍​មុន​រៀប​ការ ក៏​មាន​ភាព​ខុស​គ្នា​ទៅ​តាម​ធនធាន​របស់​អ្នក​រៀប​ការ​ផង​ដែរ ដែល​បងប្អូន​ខ្លះ​គឺ​ចំណាយ​អស់​រាប់​ម៉ឺន​ដុល្លារ​សម្រាប់​ថតរូប Pre-wedding នៅ​ក្រៅប្រទេស​ដើម្បី​ផ្តិត​យក​ទេសភាព​ស្រស់​ស្អាត​ៗ​ជា​ច្រើន​កន្លែង​ទៀត​ផង ។

ជាក់ស្តែង​ថ្មី​ៗ​នេះ​តារាចម្រៀង​ដ៏​ល្បី​ប្រចាំ​ប្រទេស​កម្ពុជា​អ្នក​នាង ឱ​ក សុគន្ធ​កញ្ញា មុន​ឈាន​ដល់​ថ្ងៃ​រៀប​អាពាហ៍ពិពាហ៍​របស់​អ្នក​នាង​និង​កូន​ក​ម្លោះ​ដ៏​ស្រស់​សង្ហា​នោះ ក៏​បាន​ចងក្រង​នូវ​រូបថត​និង​វី​ដេ​អូ Pre-wedding ស្រស់​ស្អាត​ជា​ច្រើន ដែល​បាន​ផ្តិត​យក​នូវ​ទេសភាព​តាម​ប្រាង្គ​ប្រាសាទបុរាណ​ខ្មែរ យ៉ាង​ស្រស់​ស្អាត​និង​គួរ​ឲ្យ​គយគន់​ដកចិត្ត​មិន​រួច ។ ជាក់ស្តែង​តារាចម្រៀង ទេព បូ​ព្រឹក្ស និង​លោក ជី ដេ​វីត បាន​បញ្ចេញ​រូបថត Pre-wedding របស់​អ្នក​ទាំង​ពីរ​នៅ​ក្រៅប្រទេស​ផង​ដែរ

បើ​តាម​លោក​ចេ​ង ចំរើន អ្នក​ផ្ដល់​សេវាកម្ម​ថតរូប​តាម​កម្មវិធី​នានា បាន​ឲ្យ​ដឹង​ថា សព្វ​ថ្ងៃនេះ សេវាកម្ម​ថតរូប​មុន​ពេល​រៀប​ការ ឃើញ​ថា​មានការ​ពេញ​និយម​គួរ​អោយ​កត់សម្គាល់ ជា​ពិសេស​សម្រាប់​យុវវ័យ​សម័យ​ថ្មី និង​យុវជន​ដែល​រស់នៅ​បែប​ទំនើប​ៗ ។ លោក​ចំរើន បាន​និយាយ​ថា «​ការ​ថតរូប​មុន​រៀប​ការ គឺ​មាន​អត្ថន័យ​មួយ​សម្រាប់​ទុកជា​អនុស្សាវរីយ៍ នៅ​ពេល​អនាគត និង​ចង់​បង្ហាញ​ដល់​ញ្ញាតិ​មិត្ត​ដែល​អញ្ជើញ​មក​ចូលរួម​ក្នុង​ពិធី​មង្គលការ​ពួក​គេ​ថា ពួក​គេ​ពិតជា​មាន​អនុស្សាវរីយ៍​ច្រើន មុន​ពេល​ឈាន​ដល់​ដំណាក់​ការ​រៀប​អាពាហ៍ពិពាហ៍ ដោយសារ​តែ​រូបភាព​ដែល​បាន​ថត​ទាំង​ប៉ុន្មាន​គឺ​ត្រូវ​បង្ហាញ នៅ​ក្នុង​ថ្ងៃ​មង្គលការ​របស់​ពួក​គេ តាម​រយៈ​ផ្ទះ​សំពត់​ស រឺ​LCD , LED ជាដើម ទៅ​តាម​ធនធាន​របស់​ពួក​គេ​» ។

លោក​បន្ត​ថា កាល​ដើម​ឡើយ ការ​ថត Pre-Wedding គឺ​មាននៅ​ទីក្រុង​ប៉ុណ្ណោះ តែ​ក្រោយមក​ក៏​បាន​ពេញ​និយម​ទៅ​ដល់​អ្នក​នៅ​តាម​បណ្ដា​ខេត្ត​នានា និង​ជនបទ ដែល​មាន​ទ្រព្យធន​គួរសម តែ​ពេល​នេះ ដោយសារ​តែ​អ្នក​ផ្ដល់​សេវាកម្ម ថតរូប Pre-wedding កាន់តែ​ច្រើន​ធ្វើ​អោយ​តម្លៃ​សេវាកម្ម​ក៏​មិន​ខ្ពស់​ប៉ុន្មាន​ដែរ ជាក់ស្ដែង​សព្វ​ថ្ងៃនេះ អ្នក​ផ្ដល់​សេវាកម្ម​ថតរូប​មុន​រៀប​ការ ក៏​មាន​តម្លៃ​ត្រឹមតែ​ប្រមាណ​២០០​ទៅ​៤០០​ដុល្លារ​អា​មេ​រិ​ក សម្រាប់​អ្នក​ដែល​មាន​ធនធាន​តិចតួច តែ​ចង់អោយ​មង្គល​ការខ្លួន​ទទួល​បានការ​ចាប់អារម្មណ៍​ពី​អ្នកចូលរួម ។ តែ​ក៏​មាន​អ្នក​ផ្ដល់​សេវា​ថត​ដែល​មាន​តម្លៃ​ខ្ពស់​ៗ​ផង​ដែរ ដូច​ជា​ថតរូប​សម្រាប់​កូន​អ្នកមាន​ទ្រព្យធន ថតរូប​សម្រាប់​តារា​ខ្មែរ​ជាដើម ដែល​តម្លៃ​នេះ​អាច​មាន​ដល់​ខ្ទង់ពាន់​ដុល្លារ​អា​មេ​រិ​កឯណោះ ។

យោង​តាម​បុគ្គលិក​ក្រុមហ៊ុន​ថតរូប​មួយ​រូប​ដែល​សុំ​មិន​បញ្ចេញ​ឈ្មោះ បាន​ឲ្យ​ដឹង​ថា បច្ចុប្បន្ន​នេះ​ការ​ថត រូប Pre-wedding នៅ​ក្នុង​ប្រទេស​កម្ពុជា មានការ​ពេញ​និយម ពី​សំណាក់​យុវវ័យ​កម្ពុជា​មែន ក្នុង​នោះ​ដែរ​ភាគច្រើន​ពួក​គេ​ជ្រើសរើស​យក​ទឹកដី​ក្នុង​ប្រទេស​កម្ពុជា ដើម្បី​ផ្ដិត​យក​រូបភាព​អនុស្សាវរីយ៍​របស់​ពួក​គេ តែ​ក៏​មាន​អ្នកមាន​ធនធាន​ប្រមាណ​៣០​ភាគរយ​ដែរ ដែល​បាន​ជ្រើសរើស​យក​ទីតាំង​ក្រៅប្រទេស​ដើម្បី​ថតរូប​អនុស្សាវរីយ៍​របស់​ខ្លួន ។ បុគ្គលិក​រូប​នេះ​បាន​ឲ្យ​ដឹង​ថា សម្រាប់​ក្រុមហ៊ុន​របស់​ខ្លួន ជា​លក្ខណៈ​ក្រុមហ៊ុន​មាន​លំដាប់​ខ្ពស់​បន្តិច ក្នុង​នោះ​តម្លៃ​ចាប់ពី​១,៦០០ ដុល្លារ​អា​មេ​រិ​ក ដល់​៣,០០០​ដុល្លារ​អា​មេ​រិ​ក ក្នុង​មួយ​កម្មវិធី​ថតរូប​អនុស្សាវរីយ៍ តែ​សម្រាប់​កម្មវិធី​មង្គលការ គឺ​ត្រូវ​គិត​តម្លៃ​ផ្សេង​ទៀត ។

គួរ​បញ្ជាក់​ថា​សេវាកម្ម​ថតរូប Pre Wedding គឺ​ត្រូវ​បាន​គេ​ដឹង​ថា​មាន​ប្រភព​ពី​ប្រទេស​មួយ​នៅ​ទ្វីបអាស៊ី ហើយ​ការ​ថតរូប​បែប​នេះ​ត្រូវធ្វើ​ឡើង​បន្ទាប់​ពី​ធី ភ្ជាប់ពាក្យ និង​មុន​ថ្ងៃ​អាពាហ៍ពិពាហ៍ ពី​៤​ខែ ទៅ​៦​ខែ ប៉ុន្តែ​សម្រាប់​នៅ​កម្ពុជា​វិញ សកម្មភាព​ថត Pre-Wedding គឺ​ធ្វើ​ឡើង​មុន​ថ្ងៃ​មង្គលការ​តែ​ប្រមាណ​ជាង​១​ខែ ឬ​តិច​ជាង​នេះ​ផង អាស្រ័យ​លើ​ពេលវេលា​សម​ស្រប​សម្រាប់​អ្នក​រៀប​ការ ។

អ្នក​នាង​សុ​ថា​រី ដែល​បាន​ជ្រើសរើស​ខេត្តសៀមរាប និង​ខេត្តកំពត​សម្រាប់​ការ​ថតរូប Pre-wedding របស់​អ្នក​នាង​កាលពី​ចុងឆ្នាំ ២០១៨ កន្លង​ទៅ​បាន​លើក​ឡើង​ថា​ការ​ថត Pre-wedding បាន​ក្លាយជា​របស់​មួយ​សំខាន់​មិន​អាច​ខ្វះ​បាន​សម្រាប់​អនាគត​គូ​ស្វាមី​-​ភរិយា សម័យ​ទំនើប​មួយ​នេះ ព្រោះ​វា​បាន​បង្កើន​នូវ​សោ​ភ័​ណ្ឌ​ភាព​នៃ​អាពាហ៍ពិពាហ៍​របស់​ពួក​គេ​ន​ក៏​ដូច​ជា​ការ​បង្ហាញ​នូវ​តំបន់​រមណីយដ្ឋាន​ស្រស់​ស្អាត​នៅ​ស្រុក​ខ្មែរ​ផង​ដែរ ។ អ្នក​នាង សុ​ថា​រី បុគ្គលិក​ក្រុមហ៊ុន​ឯកជន​មួយ​នៅ​រាជធានី​ភ្នំពេញ​បាន​លើក​ឡើង​ថា «​ការ​ពិត​ប៉ា​ម៉ាក់​ខ្ញុំ​មិនសូវ​ជា​គាំទ្រ​ការ​ថត Pre-wedding នេះ​ទេ​ដោយ​គាត់​យល់​ថា​ចំណាយ​លុយ​មិន​ចំ​ទិស​ដៅ តែ​សម្រាប់​រូប​ខ្ញុំ​ផ្ទាល់​និង​ស្វាមី​យល់​ឃើញ​ថា គេ​នាំ​ធ្វើ​ថត​អស់ហើយ បើ​មិន​ធ្វើ​តើ​បាន​រូប​ស្អាត​ៗ​ឯណា​យក​ទៅ​តាំង​មុខ​រោងការ ជា​ពិសេស​មាន​អារម្មណ៍​ថា​វា​ជួយ​ឲ្យ​ពួក​ខ្ញុំ​បង្កើន​អនុ​ស្សារី​យ៍​ល្អ​ៗ​ជាមួយនឹង​ទេសភាព​ស្អាត​ៗ​បាន​ច្រើន​» ៕ (កែសម្រួលដោយ ៖ សុឃាក់)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ