រាជធានីភ្នំពេញ ៖ ជនសង្ស័យដែលធ្វើសកម្មភាពឆក់និងប្លន់យ៉ាងសកម្មក្នុងរាជធានីភ្នំពេញ១១នាក់ រួមទាំងវត្ថុតាងត្រូវបាននគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញបង្ហាញមុខជាសាធារណៈ កាលពីព្រឹកថ្ងៃទី២១ ឧសភា ម្សិលមិញ មុនពេលបញ្ចូនទៅសាលាដំបូងដើម្បីចាត់ការតាមច្បាប់ ។ ជនសង្ស័យដែលបង្ហាញមុខត្រូវបាននគរបាលស្រាវជ្រាវឃាត់ខ្លួនជាបន្តបន្ទាប់ចាប់តាំងពីថ្ងៃទី១៧ ឧសភា រហូតដល់ថ្ងៃទី១៩ ឧសភាកន្លងមក បន្ទាប់ពីធ្វើសកម្មភាពឆក់ និងវាយ កាប់ប្លន់យ៉ាងសាហាវ បណ្តាលឱ្យមានជនរងគ្រោះជាច្រើននាក់ ។
ជនសង្ស័យដែលត្រូវឃាត់ខ្លួន ១-ឈ្មោះ ហូរ វណ្ណឌី អាយុ២០ឆ្នាំ ។ ២-ឈ្មោះ ឡេង សុខ ណៃ អាយុ២២ឆ្នាំ ។ ៣-ឈ្មោះ យីន សូណាល់ អាយុ១៩ឆ្នាំ ។ ៤-ឈ្មោះ ទ្រី ករុណា អាយុ១៩ឆ្នាំ ។ ៥-ឈ្មោះ ចំរើន សម្បត្តិ ហៅពៅ អាយុ២៦ឆ្នាំ ។ ៦-ឈ្មោះ ស៊ាង ម៉េងលាភ អាយុ១៩ឆ្នាំ ។ ៧-ឈ្មោះ លី វ៉ាន់ណេត អាយុ១៧ឆ្នាំ ។ ៨-ឈ្មោះបូ អៀង អាយុ២០ឆ្នាំ ។ ៩-ឈ្មោះ រី ហុង អាយុ២៨ឆ្នាំ ។ ១០-ឈ្មោះ ប៊ុន សុភ័ក្រ អាយុ១៥ឆ្នាំ និង១១ពុំត្រូវបានស្គាល់ឈ្មោះទេ ដោយនគរបាលអះអាងថា ជនសង្ស័យម្នាក់នោះត្រូវបានបញ្ជូនទៅកាន់ស្នងការដ្ឋាននគរបាលខេត្តកណ្តាលបន្តនីតិវិធី ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល បានឱ្យដឹងថា ជន សង្ស័យទាំង១០នាក់ មាន២ក្រុម បានធ្វើសកម្មភាពប្រព្រឹត្តបទល្មើសចំនួន១២ករណី ហើយបណ្តាលឱ្យម្ចាស់ម៉ូតូនិងម្ចាស់សម្ភាររងរបួសជាច្រើននាក់ ។ លោកនាយការិយាល័យ បានឱ្យដឹងទៀតថា ក្រុមទី១មានគ្នា៧នាក់ បានធ្វើសកម្មភាពចំនួន៦ករណី ក្នុងនោះមានអំពើលួច មានស្ថានទម្ងន់ទោសដោយប្រើហិង្សា (ប្រើដាវកែច្នៃ កាប់ប្លន់យកទ្រព្យសម្បត្តិ) ចំនួន៥ករណី និងប្រើប្រាស់សារធាតុញៀន១ករណី ។
ដោយឡែក ក្រុមទី២មានគ្នា៣នាក់ បានធ្វើសកម្មភាពចំនួន៦ករណី ក្នុងនោះឆក់ចំនួន៤ករណីលួច១ករណី និងប្រើប្រាស់គ្រឿងញៀន១ករណី។ នៅក្នុងសកម្មភាពប្រព្រឹត្តចោរកម្មម្តងៗ ជនសង្ស័យមានចរិតយ៉ាងសាហាវ បានកាប់ទៅលើជនរងគ្រោះបណ្តាលឱ្យរងរបួសជាច្រើននាក់ ក្នុងនោះ មានស្រីម្នាក់ ត្រូវជនសង្ស័យឆក់បណ្តាលឱ្យធ្លាក់ពីលើម៉ូតូដួលបោកក្បាលរងរបួសធ្ងន់ កាលពីព្រឹកថ្ងៃទី១០ មេសា ឆ្នាំ២០១៩ នៅតាមវិថីព្រះមុនីរ៉េត ក្នុងសង្កាត់បឹងសាឡាង ខណ្ឌទួលគោក ។
ក្នុងការឃាត់ខ្លួនជនសង្ស័យ សមត្ថកិច្ចក៏បានដកហូតម៉ូតូដែលជិះធ្វើសកម្មភាពចំនួន ២គ្រឿងនិងដាវ ចំនួន២ដើម សម្បកអាយឌីមួយគ្រឿង និងឧបរករណ៍ សម្រាប់ប្រើប្រាស់គ្រឿងញៀនមួយចំនួន ។ បន្ទាប់ពីបង្ហាញមុខ នគរបាលក៍បានបញ្ជូនជនសង្ស័យទាំងនោះទៅកាន់សាលាដំបូងរាជធានីភ្នំពេញដើម្បីចាត់ការតាមនីតិវិធី ។
គួរកត់សម្គាល់ថា ចោរឆក់ ចោរគាស់ផ្ទះ ចោរប្លន់ក្នុងរាជធានីភ្នំពេញ ប៉ូលិសប្រឹងប្រែងចាប់បានជាបន្តបន្ទាប់ ប៉ុន្តែចាប់មិនចេះអស់សោះ ។ ដូចជាចោរជិះម៉ូតូឆក់តាមផ្លូវជាដើម នៅតែកើតមានអាឆក់ដដែល ដែលប្រភពខ្លះនិយាយថា មុខដដែលៗ ។ ទំនងជាប់គុកឆាប់ពេក ពេលចេញមកវិញ ឆក់ដដែល ព្រោះមុខរបរនេះកាក់កបណាស់ ពេលខ្លះឆក់បានក្លាយជាអ្នកមានក៏មានដែរ តែបទល្មើសមិនមែនចេះតែបាននោះទេ ទីបំផុតគុក ៕ (សម្រួលដោយ៖ ស្រីណា)
ចែករំលែកព័តមាននេះ