Huawei មើលឃើញការលូតលាស់យ៉ាងខ្លាំងក្នុងកំឡុងពេលប៉ុន្មានឆ្នាំថ្មីៗនេះ។ កាលពីឆ្នាំ ២០០៥ ក្រុមហ៊ុននេះគ្រប់គ្រងទីផ្សារស្មាតហ្វូនពិភពលោកតែ៥%ប៉ុណ្ណោះ ប៉ុន្តែអត្រានេះបានកើនដល់ទៅ ១៧%កាលពីត្រីមាសទី១ នាឆ្នាំ២០១៩ កន្លងមក ។
យ៉ាងណាក្តី ស្ថានការបានផ្លាស់ប្តូរយ៉ាងលឿនបន្ទាប់ពីក្រុមហ៊ុន Google បានប្រកាសថាពួកគេនឹងយល់ស្របតាមរដ្ឋាភិបាលអាមេរិកក្នុងការកាត់ផ្តាចទំនាក់ទំនងអាជីវកម្មមួយចំនួនជាមួយនឹង Huawei ។
ប៉ុន្តែក្រុមហ៊ុននេះបានទទួលពត៌មានល្អមួយទាក់ទិននឹងប័ណ្ណអនុញ្ញាតការធ្វើអាជីវកម្មបណ្តោះអាសន្នដែលចេញដោយរដ្ឋាភិបាលអាមេរិក។ Huawei ក៏បានប្រកាសដែរថាពួកគេកំពុងតែសហការយ៉ាងជិតដិតជាមួយនឹង Google ដើម្បីស្វែងរកដំណោះស្រាយមួយ។
យោងទៅតាមគេហទំព័រ Android Authority បានឲ្យដឹងថា ក្រៅពីដោះស្រាយជម្លោះរវាងសហរដ្ឋអាមេរិកនិងប្រទេសចិនហើយ ដំណោះស្រាយតែមួយសម្រាប់ Huawei ទាក់ទិននឹងបញ្ហាត្រូវបានហាមមិនឲ្យប្រើប្រព័ន្ធដំណើរការ Android នេះ ហើយដំណោះស្រាយនោះគឺស្វែងរកប្រព័ន្ធដំណើរការដែលអាចជំនួស Android បាន។
ក្រុមហ៊ុននេះបានអះអាងថាខ្លួនបានត្រៀមខ្លួនស្រាប់ហេតុការណ៍នេះយូរមកហើយ និងបានចាប់ផ្តើមបង្កើតប្រព័ន្ធដំណើរការជំនួស Android តាំងពី ៧ឆ្នាំមុនមក។ លើសពីនេះទៅទៀត មានសេចក្តីរាយការណ៍ថាប្រព័ន្ធដំណើរការរបស់ Huawei ថែមទាំងអាចប្រើប្រាស់កម្មវិធីដែលមានលើ Android ថែមទៀត។ ហើយពួកគេបានអះអាងថាប្រព័ន្ធដំណើរការខ្លួនមានល្បឿនលឿនជាង Android ដល់ទៅ ៦០%។
បើទោះជាវាស្តាប់ទៅដូចជាល្អខ្លាំងសម្រាប់ Huawei ពិតមែនក្តី វាគួរឲ្យកត់សម្គាល់ថាអ្នកបង្កើតកម្មវិធីទូរស័ព្ទត្រូវតែរៀបចំកម្មវិធីរបស់ខ្លួនដើម្បីធ្វើឲ្យវាអាចដំណើរការលើប្រព័ន្ធដំណើរការថ្មីនេះបាន។
មានសេចក្តីរាយការណ៍មួយទៀតបានប្រាប់ដល់ Android Authority ថា Huawei នឹងសហការជាមួយនឹង App Store ឈ្មោះថា Aptoide ដើម្បីចែកចាយកម្មវិធីរបស់ខ្លួន។ Aptoide មានតែកម្មវិធីប្រមាណ ៩០០ពាន់កម្មវិធីប៉ុណ្ណោះ ហើយវាក៏មិនទាន់ទទួលបានការទុកចិត្តគ្រប់គ្រាន់ពីអតិថិជនដែរ។
យ៉ាងណាក្តី ប្រទេសចិនអាចជួយដល់អាជីវកម្មរបស់ Huawei បាន។ Huawei មានរយៈពេល៣ខែក្នុងការទិញស្តុកគ្រឿងបន្លាស់សម្រាប់ផលិតផលរបស់ខ្លួន ដូច្នេះមាននន័យថា Huawei មិនអាចពឹងផ្អែកលើអ្នកផ្គត់ផ្គង់បរទេសដើម្បីបន្តអាជីវកម្មខ្លួនទៀតទេ។ ដោយហេតុដូចនេះ ប្រទេសចិនអាចនឹងខិតខំបន្ថែមក្នុងការផលិត Processor, Design Tool, ឧបករណ៍សម្រាប់ផលិតកម្ម និងស្តង់ដារបច្ចេកវិទ្យាថ្មីៗជាដើម។
ប៉ុន្តែវាអាចបង្កឲ្យមានសង្គ្រាមត្រជាក់ផ្នែកបច្ចេកវិទ្យារវាងសហរដ្ឋអាមេរិកនិងប្រទេសចិនដែលអនុញ្ញាតឲ្យអតិថិជនមើលឃើញមានបច្ចេកវិទ្យាថ្មីៗត្រូវបានបង្កើតឡើង ខណៈដែលប្រទេសទាំងពីរខិតចេញពីគ្នាកាន់តែឆ្ងាយទៅ។
ចែករំលែកព័តមាននេះ