ខេត្តបន្ទាយមានជ័យ ៖ តាមសេចក្តីរាយការណ៍បឋមបានឲ្យដឹងថា ផ្ទះសំណាក់ និងបន្ទប់ជួលមួយចំនួននៅក្រុងប៉ោយប៉ែតកំពុងត្រូវបានសមត្ថកិច្ចចម្រុះខេត្តបន្ទាយមានជ័យ និងក្រុងប៉ោយប៉ែតដឹកនាំដោយលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត និងលោកតេង សាម៉ៃ ព្រះរាជអាជ្ញារងធ្វើការឆែកនៅព្រឹកថ្ងៃទី២២ ឧសភានេះ និងបន្តដល់រសៀលថ្ងៃដដែលមិនទាន់ចប់នៅឡើយទេ ។
សេចក្តីរាយការណ៍បានបន្តថា សមត្ថកិច្ចមិនទាន់ប្រាប់ពីដំណើររឿងខាងលើនៅឡើយទេ ហើយគេមិនអនុញ្ញាតឲ្យអ្នកយកព័ត៌មានចូលយកព័ត៌មាននោះដែរ ។ ចំពោះប្រតិបត្តិការឆែកឆេរនេះគេឃើញធ្វើឡើងមាន២ក្រុមផ្សេងគ្នា ដោយខាងអាវុធហត្ថដឹកនាំដោយលោកមាស ចន្ទពិសិដ្ឋ ឯខាងនគរបាលដឹកនាំដោយលោកតេង សាម៉ៃ ។
យ៉ាងណាក៏ដោយគេឃើញជនជាតិចិនជាច្រើននាក់ ត្រូវបានអាវុធហត្ថឃាត់ដឹកចេញពីផ្ទះសំណាក់វិជ័យសុវណ្ណរតនៈ ស្ថិតក្នុងភូមិក្បាលកោះសង្កាត់ប៉ោយប៉ែត តាមរថយន្តដឹកជនសង្ស័យរបស់អាវុធហត្ថ និងរថយន្តធម្មតាជាបន្តបន្ទាប់ ។ ចំណែកបន្ទប់ជួល២កន្លែងក្នុងបុរីសានស៊ានហូ ភូមិគីឡូម៉ែត្រលេខ៤ សង្កាត់ផ្សារកណ្តាលដែលឆែកឆេរដោយនគរបាលគេឃើញដកហូតបានទូរស័ព្ទដែលរាបតាំងរយគ្រឿង និងឧបករណ៍ល្បែងច្រើនសន្ធឹកសន្ធាប់ ។ ដោយឡែកមានបន្ទប់ពីរ ដែលសរសេរអក្សរថា កន្លែងលក់ការ៉េម និងហាងកាត់សក់ តែតាមពិតនៅក្នុងបន្ទប់នោះពោពេញទៅដោយល្បែងខុសច្បាប់ទៅវិញ ដោយម្ចាស់បានរត់គេចខ្លួនបាត់ទៅហើយ ។
ប្រភពថា ការឆែកឆេរនេះមានយ៉ាងតិច៤ទៅ៥ទីតាំង ក្នុងក្រុងប៉ោយប៉ែត ហើយមានកងសមត្ថកិច្ចមិនតិចឡើយ ។ទាក់ទងនឹងការឃាត់ឆែកឆេរកន្លែងលេងល្បែងរបស់ជនជាតិចិនខាងលើនេះមិនមានការបំភ្លឺពីស្ថាប័នណាមួយឡើយ ៕ (កែសម្រួលដោយ ៖ សុឃាក់)
ចែករំលែកព័តមាននេះ