រឿង សោភ័ណ្ឌ និងកីឡាករថៃបានត្រឹមឈឺសាច់ដោយការសម្រេចមិនប្រកាសលទ្ធផល
- ភ្នំពេញ
(កែសម្រួលដោយ ៖ បុប្ផា) រាជធានីភ្នំពេញ ៖ ការប្រកួតប្រដាល់ជាលក្ខណៈអន្តរជាតិរវាងកីឡាករកម្ពុជា រឿង សោភ័ណ្ឌ ជាមួយកីឡាករថៃ Far…
(កែសម្រួលដោយ ៖ បុប្ផា)
រាជធានីភ្នំពេញ ៖ ការប្រកួតប្រដាល់ជាលក្ខណៈអន្តរជាតិរវាងកីឡាករកម្ពុជា រឿង សោភ័ណ្ឌ ជាមួយកីឡាករថៃ Far Sourak នៅលើសង្វៀនទូរទស្សន៍ស៊ីអិនស៊ី កាលពីថ្ងៃអាទិត្យទី១៩ ឧសភា កន្លងមកនេះ មិនត្រូវបានប្រកាសលទ្ធផលឡើយ ដោយសារតែការប្រកួតនោះលេចចេញនូវភាពមិនប្រក្រតីនៅនាទីចុងក្រោយ។
លោក មាស វណ្ណឌី មន្ត្រីគណៈកម្មការរៀបចំការប្រកួតបានឱ្យដឹងថា រវាងគូនេះប្រកួតគ្នាពីទឹកទី១ដល់ទី៤គឺឈ្នះចាញ់គ្នា២ទឹកម្នាក់ ប៉ុន្តែឈានចូលដល់ទឹកទី៥ រឿង សោភ័ណ្ឌ បានសម្រុកចូលវាយសន្ធាប់ទៅលើគូប្រកួតដើម្បីយកឈ្នះ តែកីឡាករថៃដែលកំពុងដកថយហើយភ្លាត់ជើងដួលនោះត្រូវរឿង សោភ័ណ្ឌជ្រុលជើងទាត់ថែមតែត្រូវមិនខ្លាំងប៉ុន្មាននោះទេ តែកីឡាករថៃរូបនេះបង្ហាញអារម្មណ៍មិនសប្បាយចិត្តដោយចោទថា រឿង សោភ័ណ្ឌមានចេតនាវាយរំលោភបំពានមកលើរូបគេ។ប៉ុន្តែបើតាមការពិនិត្យជាក់ស្ដែងនៅលើកញ្ចក់ទូរទស្សន៍សាចុះសាឡើងបានបង្ហាញឱ្យឃើញថា គ្មានអ្វីដែលធ្ងន់ធ្ងរនោះទេ ។ ដូច្នេះដើម្បីឱ្យមានភាពយុត្តិធម៌ គណៈកម្មការរៀបចំការប្រកួតសម្រេច មិនប្រកាសលទ្ធផលឡើយ។
មួយគូទៀត កីឡាករពុយ វណ្ណៈ បានយកឈ្នះ កីឡាករថៃ Yod Thuon Thorng ដោយពិន្ទុទាំង
ប្រផិតប្រផើយ ។ ការប្រកួតរវាងកីឡាករ ទាំងពីរធ្វើឱ្យអ្នកទស្សនាមានការចាប់អារម្មណ៍យ៉ាងខ្លាំងដោយសារពួកគេបញ្ចេញស្នៀតគុន វាយគ្នាទៅវិញទៅមកមិនខ្លាចគ្រោះថ្នាក់សូម្បីតែបន្តិច ។
ចំណែកគូប្រកួតមិត្តភាពធម្មតាវិញកីឡាករ អេលីត កែវឡុង មកពីក្លិបឆ្មាសសែនសុខគុនខ្មែរ បានយកឈ្នះកីឡាករតាំង តាក់ ដោយពិន្ទុ និងកីឡាករ ពុយ ឈិន មកពីក្លិបឃ្លាំងមឿងកីឡា បានយកឈ្នះកីឡាករ ខេន ខ្នឹង មកពីក្លិបគុហារព្រហ្មមានជ័យដោយពិន្ទុ៕
ចែករំលែកព័តមាននេះ