រាជធានីភ្នំពេញ ៖ យុវជនរៀនពេទ្យធ្មេញម្នាក់ ត្រូវបានឃាតករមិនស្គាល់មុខមានចិត្តសាហាវឃោរឃៅផងនោះចាក់សម្លាប់ប្រមាណ១០កាំបិត បណ្តាលឱ្យដេកស្លាប់ក្នុងថ្លុកឈាម ហើយប៉ុនប៉ងចាក់សាំងដុត បំផ្លាញសាកសព នៅក្នុងបន្ទប់មួយនៃហាងរបស់ឪពុកមាដែលបើកសម្រាប់ព្យាបាលមាត់ធ្មេញយីហោ
សុវត្ថា ។
ហេតុការណ៍នេះ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៧ន ិង៣០នាទីព្រឹកថ្ងៃទី២០ ឧសភា ឆ្នាំ២០១៩ នៅចំណុចផ្ទះជួលបើកពេទ្យធ្មេញស្ថិតនៅផ្សារត្រពាំងព្រាយ តាមបណ្តោយផ្លូវលេខ១៥១ ក្នុងភូមិបឹង សង្កាត់ពញាពន់ ខណ្ឌព្រែកព្នៅ ។
យុវជនរងគ្រោះដែលត្រូវឃាតករសម្លាប់នោះ ឈ្មោះ ធន់ រ៉ាវិន អាយុ១៩ឆ្នាំ មានលំនៅភូមិត្រគួន ឃុំក្រឡា ស្រុកកំពង់សៀម ខេត្តកំពង់ចាម ស្នាក់នៅជាមួយឪពុកមាឈ្មោះ មឿន សុវត្ថា ជាពេទ្យធ្មេញនៅចំណុចកើតហេតុខាងលើ ។
តាមព័ត៌មានបានឱ្យដឹងថា នៅព្រឹកថ្ងៃ កើតហេតុមានភ្ញៀវមកធ្វើធ្មេញ និងបានទូរស័ព្ទហៅពេទ្យដែលដេកនៅផ្ទះនៅភូមិទួល សង្កាត់ពន្សាំង ខណ្ឌព្រែកព្នៅ ។ នៅពេលដែលឪពុកមាមកដល់ ពេលបើកទ្វារចូលទៅក្នុងក៏ប្រទះឃើញក្មួយដេកស្លាប់ក្នុងថ្លុកឈាមក្បែរគ្រែហើយក៏រាយការណ៍ប្រាប់នគរបាលបង្កឱ្យមានការភ្ញាក់ផ្អើលតែម្តង ។
តាមព័ត៌មានបានឱ្យដឹងទៀតថា នៅវេលាម៉ោងប្រមាណ៧យប់ យុរជនរូបនោះបានធ្វើដំណើរទៅចូលរួមមង្គលការអ្នកភូមិនៅក្បែរនោះជំនួសឪពុកមា ។ លុះនៅវេលាម៉ោងប្រមាណ៩យប់ក៏បានចាកចេញត្រឡប់មកផ្ទះវិញហើយក៏បានទៅដើរលេង ជាមួយសង្សាររហូតដល់យប់ជ្រៅ ក៏បានត្រឡប់ទៅដេកវិញ ស្រាប់តែព្រឹកឡើងភ្ញាក់ផ្អើលត្រូវបានឃាតករសម្លាប់ ។
នារីឈ្មោះ ស្រី លីន អាយុ១៩ឆ្នាំ មានលំនៅឃុំម្កាក់ ស្រុកអង្គស្នួល បានឱ្យដឹងថា នៅយប់នោះ នាងត្រូវបានសង្សារបបួលទៅញ៉ាំប្រហិតនៅមាត់បឹងតាមោក ។ លុះនៅវេលាម៉ោងប្រមាណ៩និង៤០នាទីនាងនិងសង្សារក៏បានត្រឡប់ទៅផ្ទះហើយបែកគ្នាទៅ ។ នារីជាសង្សារបានឱ្យដឹងទៀតថា កន្លងមកនាងធ្លាប់មានសង្សារកាលពី៣ឆ្នាំមុន តែបែកគ្នា ហើយរយៈពេលប្រមាណ២ខែ ក៏បានទំនាក់ទំនងស្នេហាជាមួយជនរងគ្រោះមិននឹកស្មានថា សង្សារនាងត្រូវបានគេសម្លាប់ ។
ទោះបីជាយ៉ាងណាគេពុំដឹងថាយុវជននោះ មានរឿងអ្វីនោះទេ ទើបឃាតករសម្លាប់យ៉ាងព្រៃផ្សៃក្នុងផ្ទះ ពេលកំពុងតែដេកលង់លក់បែបនេះ ។ នៅកន្លែងកើតហេតុសុទ្ធតែឈាម ដែលមុនពេលស្លាប់ យុវជនរូបនោះអាចមានការប្រតាយប្រតប់គ្នាជាមួយឃាតករ បណ្តាលឱ្យធ្លាក់ពីលើគ្រែហើយដេកស្លាប់ក្នុងថ្លុកឈាម ។
សមត្ថកិច្ចសន្និដ្ឋានថា ឃាតករអាចតែម្នាក់ឯង ចូលតាមបង្អួចខាងលិច ហើយធ្វើសកម្មភាពចាក់ទៅលើ
ជនរងគ្រោះចំទ្រូងពេលកំពុងតែដេកលង់លក់ ហើយក៏មានការប្រតាយប្រតប់គ្នា ទើបត្រូវឃាតករចាក់ជាច្រើនកាំបិតទៀត រួចគេចខ្លួនតាមទ្វារក្រោយបាត់ទៅ ។
នៅព្រឹកនោះ នគរបាលក៍បានចុះទៅពិនិត្យ សពដោយឃើញមានស្នាមចាក់ប្រមាណ១០កាំបិតចំទ្រូងនិងខ្នងព្រមទាំងមានរលាកខ្នងផង ។ ក្រៅពីនោះរកឃើញមានសាំងប្រឡាក់ជាប់ភួយដែលសមត្ថកិច្ចមានការសង្ស័យថា ឃាតករបានចាក់សម្លាប់ជនរងគ្រោះហើយ ប៉ុនប៉ងដុតសាកសពបំផ្លាញភស្តុតាង តែពុំបានសម្រេច ។
តាមនគរបាលមូលដ្ឋានបានឱ្យដឹងថា ជនរងគ្រោះបានបាត់បង់ទូរស័ព្ទម៉ាកOPPOមួយគ្រឿង និងកងដៃប្លាទីន១ ។ នគរបាលបានធ្វើការសន្និដ្ឋានថា ករណីឃាតកម្មនេះផ្តើមចេញពីគំនុំដែលឃាតករអាចជាអ្នកស្គាល់គ្នា ចូលទៅចាក់សម្លាប់ជនរងគ្រោះ ហើយឆ្លៀតយកសម្ភារ ។
ទោះបីជាយ៉ាងណា គេពុំដឹងថាជាគំនុំអ្វីឡើយ ។ សពត្រូវបានក្រុមគ្រួសារ នាំយកទៅធ្វើបុណ្យនៅស្រុកកំណើតតាមប្រពៃណី ។ សមត្ថកិច្ចកំពុងស្រាវជ្រាវបន្តស្វែងរកឃាតករព្រៃផ្សៃនេះ សង្ស័យមិនយូរទេគេចមិនរួចឡើយ ៕
ចែករំលែកព័តមាននេះ