ខេត្តកណ្តាល ៖ ដោយសារមានជម្ងឺប្រចាំកាយរាំរ៉ៃ ស្ត្រីម្នាក់បានសម្រេចចិត្តធ្វើអត្តឃាតខ្លួនដោយយកកាំភ្លើងរបស់ប្តីដែលទុកក្នុងកាបូបក្នុងឡានយកទៅបាញ់សម្លាប់ខ្លួនឯងតែម្តង នេះបើតាមការបញ្ជាក់របស់លោកវរសេនីយ៍ ហេង សុផល អធិការនគរបាលស្រុកល្វាឯម នៅមុននេះបន្តិច ។…
ខេត្តកណ្តាល ៖ ដោយសារមានជម្ងឺប្រចាំកាយរាំរ៉ៃ ស្ត្រីម្នាក់បានសម្រេចចិត្តធ្វើអត្តឃាតខ្លួនដោយយកកាំភ្លើងរបស់ប្តីដែលទុកក្នុងកាបូបក្នុងឡានយកទៅបាញ់សម្លាប់ខ្លួនឯងតែម្តង នេះបើតាមការបញ្ជាក់របស់លោកវរសេនីយ៍ ហេង សុផល អធិការនគរបាលស្រុកល្វាឯម នៅមុននេះបន្តិច ។ ហេតុការណ៍នេះបានកើតឡើងថ្ងៃទី២០ ខែឧសភា ឆ្នាំ២០១៩ វេលាម៉ោង១៦និង៣០នាទីនៅចំណុចកំពង់ទឹកទន្លេ ភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល ។
ជនរងគ្រោះឈ្មោះណុប វណ្ណី ភេទស្រី អាយុ៣៤ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិទួលមាស ឃុំអរិយក្សត្រ ស្រុកល្វាឯម ខេត្តកណ្ដាល ។ ប្តីឈ្មោះអ៊ុក ជីវ៉ា ភេទប្រុស អាយុ ៤៣ឆ្នាំ ជនជាតិខ្មែរ មុខរបរ នគរបាលឋានៈនាយផ្នែកការិយាល័យស៊ើបអង្កេត និងអនុវត្តនីតិវិធីនៃនាយកដ្ឋានអន្តោប្រវេសន៍ ។
ចំពោះវត្ថុតាងចាប់យក អាវុធខ្លីចំនួន០១ដើម ម៉ាកCF98.9 លេខ០០១១៦៩ គ្រាប់ចំនួន១២គ្រាប់ ។ លោកវរសេនីយ៍ ហេង សុផល អធិការនគរបាលស្រុកល្វាឯមបានអោយដឹងទៀតថា មុនពេលកើតហេតុជនរងគ្រោះបានទៅងូតទឹកលេងនៅទន្លេមេគង្គ ចំណុចកោះខ្សាច់ ជាមួយប្តីឈ្មោះអ៊ុក ជីវ៉ា និងកូនចំនួន០៣នាក់ ស្រី០២នាក់ និងក្មួយស្រីចំនួន០២នាក់ រួមមានឈ្មោះង៉ែត ជីវ៉ា វ៉ាន់នីតា ភេទស្រី អាយុ១៣ឆ្នាំ ឈ្មោះង៉ែត វ៉ាន់នីកា ភេទស្រី អាយុ៩ឆ្នាំ ឈ្មោះង៉ែត ជីវ៉ាយុត្ថាគង្គ ភេទប្រុស អាយុ៧ឆ្នាំ (ត្រូវជាកូន) និងឈ្មោះសេង សុខលាង ភេទស្រី អាយុ១៣ឆ្នាំ ឈ្មោះគង់ ស្រីឡែន ភេទស្រី អាយុ១៣ឆ្នាំ (ត្រូវជាក្មួយជិតខាងផ្ទះ) ។
ពេលចុះងូតទឹកទន្លេជនរងគ្រោះមិនបានចុះងូតទេ គឺសម្រាកក្នុងរថយន្តលុះដល់ម៉ោងកើតហេតុខាងលើ ប្តីជនរងគ្រោះបានឡើងមកពីងូតទឹកវិញមកដល់រថយន្តបានឃើញប្រពន្ធដេកហើយមានឈាមហូរលើដៃស្តាំ ក្នុងរថយន្តដៃស្តាំគងលើភ្លៅឆ្វេង កាំភ្លើងខ្លីអែបភ្លៅឆ្វេង និងស្នាមគ្រាប់កាំភ្លើងលើសៀតផ្កាខាងស្តាំ ដោយមានគ្រាប់កាំភ្លើងបៀមជាប់ចំណុចថ្ងាស ។ ភ្លាមនោះប្តីជនរងគ្រោះបានដឹកប្រពន្ធមកផ្ទះ ហើយបានទៅប្តឹងសមត្ថកិច្ចប៉ុស្តិ៍អរិយក្សត្រ ។
តាមការស្តាប់ចម្លើយបំភ្លឺរបស់ប្អូនស្រីបង្កើតរបស់អ្នករងគ្រោះណុប ស្រីរ័ត្ន បានអះអាងថា ជនរងគ្រោះមានជម្ងឺវះ.ក និងដោយភាពរាំរ៉ៃនៃជម្ងឺពិបាកទ្រាំ និងចង់សម្លាប់ខ្លួនជាច្រើនលើកមកហើយ ។ តាមចម្លើយបំភ្លឺរបស់ឈ្មោះហ៊ឹម មាន អាចារ្យវត្អរិយក្សត្រអះអាងថា ជនរងគ្រោះ ប្រាកដជាមានជម្ងឺរាំរ៉ៃ ធ្លាប់ទៅព្យាបាលនៅមន្ទីរពេទ្យ និងប្រហែលកន្លះខែមុនមានបំណងចង.ក និងលេបថ្នាំសម្លាប់ខ្លួន ៕
ចែករំលែកព័តមាននេះ