រាជធានីភ្នំពេញ ៖ បើទោះបីជាកម្ពុជាកំពុងផ្ទុះជំងឺប៉េស្ត្តជ្រូកអាហ្វ្រិកនៅខេត្តរតនគីរី ក៏ដោយ តែតម្លៃជ្រូកនៅលើទីផ្សារក្នុងប្រទេសកម្ពុជានៅរក្សាបានស្ថានភាពល្អប្រសើរដដែល។ ជាក់ស្ដែងនៅក្នុងសប្ដាហ៍នេះ តម្លៃជ្រូកជាមធ្យមស្ថិតក្នុងរង្វង់ប្រមាណ១ម៉ឺនរៀលក្នុងមួយគីឡូក្រាមសម្រាប់ជ្រូករស់ ខ្ពស់ជាងអ្វីដែលកសិករកាលមុនចង់បានត្រឹមតែជាង ៨០០០រៀលក្នុងមួយគីឡូក្រាមក៏អាចរកប្រាក់ចំណេញបានដែរនោះ។
ក៏ប៉ុន្តែកសិករចិញ្ចឹមជ្រូកហាក់មិនទាន់រសាយចិត្តនោះទេ បើទោះបីជាតម្លៃជ្រូកហាក់មានសន្ទុះកើនគួរឲ្យគាប់ចិត្តនោះ ព្រោះកសិករបារម្ភថាបើសិនជាករណីផ្ទុះជំងឺប៉េស្តជ្រូកអាហ្វ្រិកនៅខេត្តរតនគីរី មិនអាចគ្រប់គ្រងបាននោះនឹងធ្វើឲ្យប៉ះពាល់ដល់តម្រូវការជ្រូកនិងអាចធ្វើឲ្យតម្លៃជ្រូកត្រូវធ្លាក់ចុះជាថ្មីម្តងទៀតដូចជាបទពិសោធន៍នៃការធ្លាក់ចុះតម្លៃជ្រូកកាលពីឆ្នាំ ២០១៨ កន្លងទៅ ។
បើយោងតាមរបាយការណ៍របស់សមាគមអ្នកចិញ្ចឹមសត្វកម្ពុជា ដែលកោះសន្តិភាពទទួលបានកាលពីម្សិលមិញនេះ បានឲ្យដឹងថា តម្លៃជ្រូករស់នៅតាមបណ្ដាខេត្តនានានៅ កម្រិតមួយខ្ពស់គួរសមក្នុងនោះ ខេត្តកណ្ដាលមានតម្លៃខ្ពស់ជាងគេ ដែលក្នុងរបាយការណ៍បង្ហាញថាមានតម្លៃរហូតដល់ ១១៦០០រៀលក្នុងមួយគីឡូក្រាម ខណៈខេត្តរតនគីរី ដែលជាខេត្តផ្ទុះជំងឺ ប៉េស្តជ្រូកអាហ្វ្រិក ក៏មានតម្លៃ ១០៦០០រៀលដែរក្នុងមួយគីឡូក្រាម ដូច្នេះមានន័យថាជ្រូករស់ក្នុងស្រុក នៅតែមានហាងឆេងខ្ពស់បើធៀបនឹងពេលដែលបានធ្លាក់ចុះ កាលពីឆ្នាំមុន ។
បើតាមកសិករចិញ្ចឹមជ្រូកជាច្រើន បានលើកឡើងថា ពួកក៏មានការព្រួយបារម្ភដែរ ចំពោះការផ្ទុះជំងឺប៉េស្តជ្រូកអាហ្វ្រិកនៅខេត្តរតនគីរី ខណៈជំងឺនេះជាប្រភេទជំងឺសាហាវនិងអាចសម្លាប់ជ្រូកតែក្នុងមួយប៉ព្រិកភ្នែកប៉ុណ្ណោះ បើពុំមានវិធានការការពារត្រឹមត្រូវ ។ តែយ៉ាងណាក៏ដោយកសិករ អះអាងថាខ្លួននឹងអនុវត្តន៍តាមវិធានការណែនាំរបស់ក្រសួងកសិកម្ម និងមន្ត្រីជំនាញពេទ្យសត្វ ដើម្បីការពារជ្រូករបស់ពួកគាត់ជៀសផុតពីជំងឺដ៏សាហាវមួយនេះ។
លោក គុជ សុខគ្រុយ អ្នកចិញ្ចឹមជ្រូកមួយរូបនៅស្រុកខ្សាច់កណ្ដាលខេត្តកណ្ដាល បានមានប្រសាសន៍ថា បន្ទាប់ពីជំងឺប៉េស្តជ្រូកអាហ្វ្រិកបានផ្ទុះឡើងនៅខេត្តរតនគីរី ខាងក្រសួងកសិកម្មរុក្ខាប្រមាញ់និងនេសាទ ក៏ដូចជាសមាគមអ្នកចិញ្ចឹមសត្វកម្ពុជា បានរកវិធីទប់ស្កាត់ជាច្រើនមិនអោយរាលដាលដល់តំបន់ផ្សេងទៀត ហើយជាការកត់សម្គាល់រហូតមកដល់ពេលនេះ ជំងឺប៉េស្តជ្រូកអាហ្វ្រិកមិនទាន់បានរាលដាលទៅតំបន់ណាផ្សេងក្រៅពីតំបន់ដែលផ្ទុះជំងឺដំបូងនោះទេ ដូច្នេះហើយទើបជ្រូកនៅលើទីផ្សារកម្ពុជានៅតែមានភាពល្អប្រសើរដដែល ។ កសិករចិញ្ចឹមជ្រូករូបនេះបានបន្ថែមទៀតថា «ដោយសារតែកម្ពុជាបានទប់ស្កាត់ការនាំចូលពីប្រទេសវៀតណាម ក្នុងពេលដែលប្រទេសវៀតណាមក៏ផ្ទុះជំងឺប៉េស្តជ្រូកអាហ្វ្រិកមុន និងរាលដាលធំជាងកម្ពុជាទៅទៀត តែការនាំចូលជាលក្ខណៈលួចលាក់ក៏នៅតែមានដដែល ។ នេះក៏ជាក្ដីកង្វល់មួយរបស់អ្នកចិញ្ចឹមជ្រូកនៅក្នុងស្រុកផងដែរ » ។ លោកបន្តថា នៅពេលបច្ចុប្បន្ននេះ តម្លៃជ្រូកនៅលើទីផ្សារក្នុងស្រុកនៅមានភាពល្អប្រសើរ ដែលលោកនិងអ្នកចិញ្ចឹមដទៃទៀតក៏អាចរកប្រាក់ចំណេញបានដែរ ក៏ប៉ុន្តែអ្វីដែលព្រួយបារម្ភនោះ បើសិនជា ការគ្រប់គ្រងជំងឺប៉េស្តជ្រូកអាហ្វ្រិកមិនបាននោះ វានឹងបង្កបញ្ហាធ្វើអោយតម្លៃជ្រូកធ្លាក់ចុះវិញ ដូចកាលពី១ឆ្នាំកន្លងទៅនេះដែរអញ្ចឹង ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍ផងដែរថា តម្លៃជ្រូកអាចរក្សាស្ថេរភាពមកនៅសព្វថ្ងៃនេះ ដោយសារតែជ្រូកនៅប្រទេសវៀតណាមកំពុងផ្ទុះជំងឺប៉េស្តជ្រូកអាហ្វ្រិក និងមានលក្ខណៈធំជាងកម្ពុជា ដូច្នេះហើយអាជ្ញាធរ ក៏បានប្រកាសទប់ស្កាត់ការនាំចូលជ្រូកពីប្រទេសវៀតណាម មកផ្គត់ផ្គង់នៅកម្ពុជា ដែលជាហេតុធ្វើអោយឈ្មួញងាកទៅនាំចូលពីប្រទេសថៃវិញ តែជ្រូកមកពីថៃ គឺមានតម្លៃខ្ពស់ជាងវៀតណាម អញ្ចឹងហើយទើបធ្វើអោយជ្រូកក្នុងស្រុកយើងក៏មានតម្លៃខ្ពស់ដដែល បើទោះបីជាជ្រូកកម្ពុជាកំពុងផ្ទុះជំងឺនៅខេត្តរតនគីរី ក៏ដោយ ។ លោកបានបន្តទៀតថា «ជ្រូកក្នុងស្រុកសព្វថ្ងៃនេះ មិនអាចផ្គត់ផ្គង់គ្រប់តាមតម្រូវការអ្នកបរិភោគនៅឡើយ ដូច្នេះហើយកម្ពុជា ត្រូវការនាំចូលជ្រូកពីក្រៅប្រទេសដើម្បីបំពេញតាមតម្រូវការ ដែលកាលពីមុនឈ្មួញ ភាគច្រើនសម្រុកនាំចូលពីវៀតណាម មកផ្គត់ផ្គត់ តែបន្ទាប់ពីជ្រូកវៀតណាមផ្ទុះជំងឺ ក្រសួងពាក់ព័ន្ធក៏បានទប់ស្កាត់និងរឹតបន្តឹងការនាំចូលពីវៀតណាម ដូច្នេះឈ្មួញក៏នាំពីថៃមកវិញ ដែលជ្រូកថៃមានតម្លៃខ្ពស់ជាងវៀតណាម» ។
ចំណែក លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វផលិតកម្មសត្វ នៃក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ថា ក្រោយពីទទួលបានដំណឹងថា វៀតណាមបានផ្ទុះជំងឺ ក្រសួងពាក់ព័ន្ធ បានដាក់បញ្ជាទប់ស្កាត់អោយបានការនាំចូលពីវៀតណាម និងឈានដល់ការដាក់ពិន័យមន្ត្រីរូបណាដែលអនុញ្ញាតិអោយចូលដោយមិនបានពិនិត្យត្រឹមត្រូវ ។ តែបញ្ហានេះនៅចន្លោះប្រហោងដោយជំងឺនេះ នៅតែឆ្លងមកកាន់ជ្រូកកម្ពុជា ដោយសារការដឹកសាច់ជ្រូកពីវៀតណាមចូលមកលក់នៅលើទឹកដីកម្ពុជា ។ លោកបានបន្តថា «ក្រោយពីជំងឺនេះបានផ្ទុះនៅស្រុកមួយ ក្នុងខេត្តរតនគីរី ក្រសួងក៏បានចាត់វិធានការម៉ឺងម៉ាត់ ក្នុងការទប់ស្កាត់ មិនអោយកើតឡើងនៅតំបន់ផ្សេងទៀត »។
គួរបញ្ជាក់ផងដែរថាពាក់ព័ន្ធនឹងជំងឺប៉េស្តជ្រូកអាហ្វ្រិកនេះដែរ វេជ្ជបណ្ឌិតជំនាញសត្វ មកពីសាកលវិទ្យាល័យជូឡាឡុងកនប្រទេសថៃបានលើកឡើងផងដែរថា បើពិនិត្យទៅមើលស្ថានភាពជំងឺនៅក្នុងប្រទេសកម្ពុជា លោកថាអាចគ្រប់គ្រងបាន ហើយមិនយូរទេ ជំងឺនេះនឹងត្រូវលុបបំបាត់ទាំងស្រុកតែម្ដងនៅក្នុងរយៈពេលប្រមាណតែពីរឆ្នាំប៉ុណ្ណោះ ខណៈ ប្រទេសចិន និងវៀតណាមត្រូវការពេលយូរជាងនេះ ដោយសារតែស្ថានភាពផ្ទុះជំងឺមានលក្ខណៈ ទ្រង់ទ្រាយធំ ៕
ចែករំលែកព័តមាននេះ