រាជធានីភ្នំពេញ ៖ ខណៈរដូវកាលប្រមូលផលទុរេនមកដល់និងកំពុងចែកចាយពេញទីផ្សារជាមួយនឹងតម្លៃបោះដុំហាក់បានខ្ពស់ជាងបណ្តាឆ្នាំមុនៗនោះ ម្ចាស់ចំការទុរ៉េនក៏បានលើកឡើងពីបញ្ហាប្រឈមធំៗដែលនាំឲ្យបញ្ហានៃថ្លៃដើមកើនឡើងខ្ពស់ និងបានសំណូមពរតាមរយៈថ្នាក់ដឹកនាំក្រសួងកសិកម្មជួយអន្តរាគមន៍ទៅស្ថាប័នពាក់ព័ន្ធក្នុងការបញ្ចុះតម្លៃអគ្គិសនីដែលពួកគាត់ប្រើប្រាស់ក្នុងការបូមទឹកស្រោចស្រពដំណាំកសិកម្មរបស់ខ្លួន ។
ការលើកឡើងនូវបញ្ហាប្រឈមនេះគឺធ្វើឡើងចំពោះមុខលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាឱកាសដែលថ្នាក់ដឹកនាំក្រសួងនិងសហការី បានចុះទៅពិនិត្យអំពីបញ្ហាជីវភាព ការងារបង្កបង្កើនផល និងជាពិសេសដំណាំទុរេនដែលកំពុងពេញនិយមនៅលើទីផ្សារនាបច្ចុប្បន្ននេះ នៅស្រុកស្ទឹងត្រង់ ខេត្តកំពង់ចាម កាលពីថ្ងៃទី ១៧ ខែឧសភា ឆ្នាំ២០១៩ កន្លងទៅនេះ ។
អ្នកស្រី ស៊ីវ ផាន់នី ម្ចាស់ចំការទុរេន បានជម្រាបជូនទៅថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទថា បច្ចុប្បន្នការដាំដុះរបស់អ្នកស្រីគឺបានដាំទុរេនលើផ្ទៃដី ៤,៥ហិកត និងប្រមូលផលបាន១រដូវចំនួន ១០តោន ក្នុងមួយហិកតា និងមានទីផ្សារល្អគ្រាន់បើ ព្រោះតម្លៃបោះដុំគឺបានចំនួន ២ម៉ឺនរៀល/១គីឡូក្រាម ។ អ្នកស្រី ស៊ីវ ផាន់នី បានបន្តទៀតថា «ចំពោះទិន្នផលឡើងចុះទៅតាមរដូវ ឆ្នាំនេះដោយសារអាកាសធាតុក្តៅពេក ឃើញថាទិន្នផលមានការធ្លាក់ចុះ។ ហើយបញ្ហាចោទនោះគឺថា ភាគច្រើនម្ចាស់ចំការប្រឈមនឹងបញ្ហាអាកាសធាតុ និងឥណទានការប្រាក់ខ្ពស់»។ ជាមួយគ្នានោះផងដែរតាមរយៈលោក វេង សាខុន បងប្អូនម្ចាស់ចំការទុរេន ក៏បានសំណូមពរដល់ក្រសួងរ៉ែ និងថាមពល «មេត្តាពិនិត្យពិចារណាអនុវត្តអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី អំពីការបញ្ចុះតម្លៃអគ្គីសនី ក្នុងការបូមទឹក ដែលតម្លៃបច្ចុប្បន្នបានប៉ះពាល់ដល់តម្លៃបន្ថែមកសិផលយ៉ាងខ្លាំង ហើយតំបន់នេះមិនទាន់បានអនុវត្តនៅឡើយ» ។
ក្រោយពីក្តាប់បានពីបញ្ហារបស់ម្ចាស់ចំការ លោករដ្ឋមន្ត្រីក្រសួងកសិកម្ម បានបកស្រាយជូនបងប្អូនម្ចាស់ចំការនូវរឿងចំនួន ៤ សំខាន់គឺ៖ ទី១) – ការងារបច្ចេកទេសដាំ បញ្ហាជម្ងឺ និងការប្រមូលផលទុរេន; ទី២) – នីតិវិធីនៃការនាំចេញកសិផលកម្ពុជាចេញទៅកាន់ទីផ្សារអន្តរជាតិ; ទី៣) – ការរៀបចំចងក្រងសហគមន៍ផលិតដើម្បីធានាបរិមាណផ្គត់ផ្គង់ គុណភាព និងបង្កើនតម្លៃបន្ថែម ជាពិសេសការអនុវត្តផលិតកម្មកសិកម្មតាមកិច្ចសន្យា និងទី៤) – ណែនាំឲ្យប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាមទាក់ទងជាមួយធនាគារកសិកម្មវៀតណាមដែលធនាគារនេះកំពុងមានកិច្ចសហការជាមួយក្រសួងដើម្បីសិក្សាពីកម្ចីឥណទានដែលមានការប្រាក់ទាបជាងបច្ចុប្បន្ន ៕
ចែករំលែកព័តមាននេះ