ប្រទេសជប៉ុន៖ យោងតាមភ្នាក់ងារសារព័ត៌មាន Japan Times ដែលបានរាយការណ៍មកកាលពីថ្ងៃទី១៩ កន្លងមកបានឲ្យដឹងថា រដ្ឋាភិបាលអាមេរិកបានប្រកាសពីបញ្ជីដែលមានផលិតផលចិនប្រមាណ៣,៨០០មុខដែលនឹងជាប់ការបង្កើនពន្ធ ហើយក្នុងនោះរួមមានផលិតផលដែលត្រូវបានផ្គុំក្នុងប្រទេសចិនជាមួយនឹងគ្រឿងនាំចេញពីប្រទេសជប៉ុនដូចជាស្មាតហ្វូនជាដើម ។
ក្នុងសន្និសីទកាសែតមួយកាលពីថ្ងៃពុធ លោក Yoshiyuki Tsukizaki ដែលជាប្រធានក្រុមហ៊ុន Japan Display Inc. បានសុំទោសចំពោះការខាតបង់ប្រមាណ១ប៊ីលានដុល្លារដែលបង្កពីការអន់ថយនៃការលក់ iPhones របស់ក្រុមហ៊ុន Apple Inc ដែលជាអតិថិជនដ៏សំខាន់មួយ ។
លោកបានបន្តថា ក្រុមហ៊ុនមើលឃើញការផ្លាស់ប្តូរទីផ្សារដែលច្រើនជាងការគិតទុក។ ការសម្រេចចិត្តរបស់សហរដ្ឋអាមេរិកក្នុងការបង្កើនពន្ធលើផលិតផលចិនថ្មីៗនេះក៏នឹងបង្កការប៉ះពាល់ដល់ក្រុមហ៊ុន Japan Display ដែរព្រោះ iPhone ក៏ស្ថិតក្នុងបញ្ជីខាងលើដែរ។
ក្រុមហ៊ុន Sharp Corp. ដែលផ្គត់ផ្គង់អេក្រង់ស្មាតហ្វូនទៅក្រុមហ៊ុនចិនក៏មើលឃើញការអន់ថយដែរ ។ អ្នកវិភាគបានបន្ថែមថា Sharp អាចនឹងទទួលរងការប៉ះពាល់យ៉ាងធ្ងន់ធ្ងរប្រសិនបើការបង្កើនពន្ធថ្មីចាប់មានប្រសិទ្ធិភាពពិតមែន។
លោក Junichi Makino ដែលជាប្រធានសេដ្ឋវិទូនៅ SMBC Nikko Securities Inc. បាននិយាយថា «ពន្ធអាចនឹងកាត់បន្ថយប្រាក់ចំណេញប្រចាំឆ្នាំរបស់ក្រុមហ៊ុនជប៉ុនសរុបប្រមាណ២.៣%ក្នុងឆ្នាំ ២០១៩ និង ២០២០»។
កង្វល់មួយទៀតគឺបទបញ្ជាពីសហរដ្ឋអាមេរិកដែលហាមឃាត់ក្រុមហ៊ុនអាមេរិកមិនឲ្យធ្វើពាណិជ្ជកម្មជាមួយនឹងក្រុមហ៊ុនផលិតឧបករណ៍ទូរគមនាគមន៍ Huawei Technologies Co. របស់ប្រទេសចិន។
រដ្ឋមន្ត្រីហិរញ្ញវត្ថុ Taro Aso របស់ប្រទេសជប៉ុនបាននិយាយថា «មានក្រុមហ៊ុនជប៉ុនដែលកំពុងតែផ្គត់ផ្គង់គ្រឿងឲ្យទៅ Huawei»៕
ចែករំលែកព័តមាននេះ