សម្រេចចោទនិងឃុំខ្លួនលោកប្រធានក្រុមហ៊ុន GCG ASIA
- ភ្នំពេញ
រាជធានីភ្នំពេញ ៖ ព្រឹកថ្ងៃទី១៩ ខែឧសភា បន្ទាប់ពីនគរបាលក្រសួងមហាផ្ទៃ បញ្ជូនខ្លួនដល់សាលាដំបូងរាជធានីភ្នំពេញ តំណាងអយ្យការលោក តុប ឈុនឡុង បានបន្តការស៊ើបសួរលើឈ្មោះ…
រាជធានីភ្នំពេញ ៖ ព្រឹកថ្ងៃទី១៩ ខែឧសភា បន្ទាប់ពីនគរបាលក្រសួងមហាផ្ទៃ បញ្ជូនខ្លួនដល់សាលាដំបូងរាជធានីភ្នំពេញ តំណាងអយ្យការលោក តុប ឈុនឡុង បានបន្តការស៊ើបសួរលើឈ្មោះ…
រាជធានីភ្នំពេញ ៖ ព្រឹកថ្ងៃទី១៩ ខែឧសភា បន្ទាប់ពីនគរបាលក្រសួងមហាផ្ទៃ បញ្ជូនខ្លួនដល់សាលាដំបូងរាជធានីភ្នំពេញ តំណាងអយ្យការលោក តុប ឈុនឡុង បានបន្តការស៊ើបសួរលើឈ្មោះ Yaw Foo Hoe ប្រធានក្រុមហ៊ុន GCG ASIA ដែលមានប្រវត្តិរកស៊ីមិនច្បាស់លាស់ទាំងនៅបរទេសនិងកម្ពុជា ដើម្បីសន្និដ្ឋានលើបទចោទ មុនសំណុំរឿងត្រូវបញ្ជូនទៅចៅក្រមដើម្បីសម្រេច ។
លោក លី សុផាន់ណា អ្នកនាំពាក្យស្ថាប័នអយ្យការអមសាលាដំបូងរាជធានីភ្នំពេញ បានឲ្យដឹងថា ក្រោយពីបញ្ចប់ការសាកសួរ តំណាងអយ្យការបានសម្រេចចោទប្រកាន់លើឈ្មោះ Yaw Foo Hoe ពីបទ «ប៉ុនប៉ងឆបោក» តាមមាត្រា៣៧៧ មាត្រា៣៧៨ និងមាត្រា៣៨១ នៃក្រមព្រហ្មទណ្ឌ ហើយបញ្ជូនជនល្មើស និងសំណុំរឿងទៅចៅក្រមស៊ើបសួរ ។
ទីបំផុត ត្រូវបានសម្រេចឃុំខ្លួននៅពន្ធនាគារព្រៃស ។ ប្រធានក្រុមហ៊ុនខាងលើនេះ ត្រូវបានសមត្ថកិច្ច ចាប់ខ្លួនជាមួយប្រពន្ធ កាលពីថ្ងៃទី១៧ ខែឧសភា ប៉ុន្តែបើតាមសមត្ថកិច្ចក្រោយពីសួរនាំរួច ស្ត្រីជាប្រពន្ធ
ក៏ត្រូវបានអនុញ្ញាតឲ្យត្រឡប់ទៅ វិញ ដោយសាររកមិនឃើញមានជាប់ពាក់ព័ន្ធនឹងបទល្មើសនេះទេ។ អគ្គស្នងការនគរបាលជាតិ លោកនាយឧត្តមសេនីយ៍ នេត សាវឿន បានថ្លែងប្រាប់បណ្ដាញសារព័ត៌មានក្នុងស្រុកថា ក្រុមហ៊ុន GCG ASIACo., LTD ជាក្រុមហ៊ុនឆបោកជាលក្ខណៈអន្ដរ ជាតិ ហើយប្រទេសជាច្រើននៅតំបន់អាស៊ីបានរងគ្រោះដោយសារក្រុមហ៊ុននេះរួចទៅហើយ ។
លោកនាយឧត្តមសេនីយ៍អគ្គស្នងការ បានបញ្ជាក់ថា ក្រោយមន្ត្រីនគរបាលប្រជុំជាមួយមន្ដ្រីធនាគារជាតិ បានរកឃើញថា ក្រុមហ៊ុនមួយនេះមិនបានចុះបញ្ជីត្រឹមត្រូវជាមួយធនាគារជាតិ និងក្រសួងស្ថាប័នពាក់ព័ន្ធឡើយ ហើយកាលពីមុនក្រុមហ៊ុននេះធ្លាប់រកស៊ីបោកប្រាស់នៅប្រទេសម៉ាឡេស៊ី និងឥណ្ឌូណេស៊ី និងត្រូវបានអាជ្ញាធរប្រទេសទាំងនោះដឹងក៏រត់ចេញមកបោះមូលដ្ឋាននៅកម្ពុជាវិញ ។
លោកអគ្គស្នងការនគរបាលជាតិ បញ្ជាក់ថា ពលរដ្ឋខ្មែរមិនទាន់ចាញ់បោកក្រុមហ៊ុននេះនៅឡើយទេ មានភាគច្រើនតែជនជាតិចិន ព្រោះក្រុមហ៊ុននេះដាក់លក់តែនៅក្រៅប្រទេសប៉ុណ្ណោះ ប៉ុន្តែមានស្នាក់ការនៅកម្ពុជា ។ ជាមួយគ្នានេះ នៅក្នុងការចុះឆែកឆេរនាព្រឹកថ្ងៃទី១៧ ខែឧសភា សមត្ថកិច្ចក៏ឈានទៅដល់ការបិទក្រុមហ៊ុននេះជាបណ្ដោះអាសន្នដែរ ។
សូមបញ្ជាក់ថា ក្រុមហ៊ុន GCG ASIA Co., LTD បានយកឈ្មោះនិងរូបសម្ដេចតេជោនាយករដ្ឋមន្ត្រី ហ៊ុន សែន ទៅបង្ហោះក្នុងគេហទំព័ររបស់ខ្លួនដោយប្រកាសថា សម្តេចតេជោបានគាំទ្រ និងអញ្ជើញទៅកាត់ខ្សែបូសម្ពោធក្រុមហ៊ុននេះនៅថ្ងៃ២០ ខែឧសភា នៅទីតាំងក្នុងវិមានកាណាឌីយ៉ា ។ ការបង្ហោះបែបនេះក៏ធ្វើឲ្យមានប្រតិកម្មភ្លាមៗពីប្រមុខរាជរដ្ឋាភិបាល ហើយសមត្ថកិច្ច រួមជាមួយមន្ត្រីធនាគារជាតិ និងមន្ត្រី
គណៈកម្មការមូលបត្រកម្ពុជា ក៏ចុះទៅបិទស្នាក់ ការក្រុមហ៊ុនជាបណ្ដោះអាសន្ន នាព្រឹកថ្ងៃទី១៧ ខែឧសភា ឆ្នាំ២០១៩ ។
កាលពីថ្ងៃទី១៧ ខែឧសភា ក្រសួងពាណិជ្ជកម្ម បានចេញសេចក្តីជូនដំណឹងមួយទាក់ទងនឹងក្រុមហ៊ុន
នេះថា ពាក់ព័ន្ធដល់ការប្រើប្រាស់ឈ្មោះ GCG ASIA Co., LTD ក្រសួងពាណិជ្ជកម្មសូមជម្រាបជូនសាធារណជនថា ក្រសួងបានចុះបញ្ជីក្រុមហ៊ុនឈ្មោះ ជីស៊ីជី អេស៊ា ឯ.ក GCG ASIA Co., LTD អត្ថលេខចុះបញ្ជី ០០០១៨ ២០៥ ចុះថ្ងៃទី១២ ខែសីហា ឆ្នាំ២០១៦ ដែលមានអាសយដ្ឋានទីស្នាក់ការនៅអគារ Intelligent Office Center (IOC) លេខR០១ មហាវិថីព្រះមុនីវង្ស សង្កាត់បឹងរាំង ខណ្ឌ
ដូនពេញ រាជធានីភ្នំពេញ ។ ក្រុមហ៊ុននេះមានម្ចាស់ ភាគហ៊ុនតែម្នាក់ និងជាអភិបាលក្រុមហ៊ុនដែលមាន
សញ្ជាតិខ្មែរ និងមានកម្មវត្ថុអាជីវកម្មពាក់ព័ន្ធនឹងអចលនទ្រព្យ សំណង់ នាំចេញនាំចូលសណ្ឋាគារ សេវាអប់រំ និងភោជនីយដ្ឋាន ។
ក្រសួងពាណិជ្ជកម្មបានបញ្ជាក់ថា ក្រុមហ៊ុនឈ្មោះ ជីស៊ីជី អេស៊ា ឯ.ក GCG ASIA Co., LTD ដែលចុះបញ្ជីនៅក្រសួងពាណិជ្ជកម្ម មិនមានការពាក់ព័ន្ធទៅនឹងករណីយកឈ្មោះ និងរូបភាពសម្តេចអគ្គមហាសេនាបតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងយកឈ្មោះធនាគារជាតិនៃកម្ពុជា ទៅបង្ហោះក្នុង គេហទំព័ររបស់ខ្លួននោះឡើយ គឺបុគ្គលបរទេសដែលបានប្រើប្រាស់ឈ្មោះក្រុមហ៊ុន GCG ASIA Co., LTD ផ្សេងដែលមិនមែនជាក្រុមហ៊ុនចុះបញ្ជីនៅក្នុងព្រះរាជាណាចក្រកម្ពុជា ។
នៅថ្ងៃទី១៧ ខែឧសភានោះដែរ ធនាគារ ជាតិនៃកម្ពុជា ក៏បានចេញសេចក្តីប្រកាសព័ត៌មានថា ថ្មីៗនេះក្រុមហ៊ុនឈ្មោះ GCG ASIA Co., LTD បានផ្សព្វផ្សាយព័ត៌មានមិនពិត អំពីការទទួលបានអាជ្ញាប័ណ្ណប្រកបអាជីវកម្មប្តូរប្រាក់ពីធនាគារជាតិនៃកម្ពុជា និងបានប្រើប្រាស់ឈ្មោះនិងស្លាកសញ្ញាធនាគារជាតិនៃកម្ពុជាលើគេហទំព័ររបស់ខ្លួនក្នុងគោលបំណងទុច្ចរិត ។ ធនាគារជាតិនៃកម្ពុជា មិនធ្លាប់បានផ្តល់អាជ្ញាប័ណ្ណធ្វើប្រតិបត្តិការប្តូរប្រាក់ ឬអាជ្ញាប័ណ្ណណាមួយដល់ក្រុមហ៊ុន GCG ASIA Co., LTD ទេ ។ ធនាគារជាតិនៃកម្ពុជា សូមបដិសេធព័ត៌មានមិនពិតដែលបានផ្សព្វផ្សាយដោយក្រុមហ៊ុន GCG ASIA Co., LTD៕
ចែករំលែកព័តមាននេះ