ខេត្តមណ្ឌលគិរី ៖ សេចក្តីរាយការណ៍បានឲ្យដឹងថា ផ្លូវជាតិលេខ៧៦ប្រវែងជាង២០០គីឡូម៉ែត្រ ឆ្លងកាត់ខេត្តមណ្ឌលគិរី និងខេត្តក្រចេះ កំពុងប្រឈមការខូចខាតជាថ្មីម្តងទៀត ក្រោយមានសកម្មភាពរថយន្តខ្នាតយក្សសម្រុកដឹកជញ្ជូនឈើចេញពីស្រុកកោះញែក ដោយក្រុមរថយន្តទាំងនោះ បានផ្ទុកលើសទម្ងន់…
ខេត្តមណ្ឌលគិរី ៖ សេចក្តីរាយការណ៍បានឲ្យដឹងថា ផ្លូវជាតិលេខ៧៦ប្រវែងជាង២០០គីឡូម៉ែត្រ ឆ្លងកាត់ខេត្តមណ្ឌលគិរី និងខេត្តក្រចេះ កំពុងប្រឈមការខូចខាតជាថ្មីម្តងទៀត ក្រោយមានសកម្មភាពរថយន្តខ្នាតយក្សសម្រុកដឹកជញ្ជូនឈើចេញពីស្រុកកោះញែក ដោយក្រុមរថយន្តទាំងនោះ បានផ្ទុកលើសទម្ងន់ ។
ដោយកាលពីល្ងាចថ្ងៃទី១៩ ឧសភា ២០១៩ មានរថយន្តប្រភេទវេរអងចំនួន១០គ្រឿងបានដឹកឈើប្រភេទលេខ២ ចេញពីរោងម៉ាស៊ីនក្រុមហ៊ុនយ៉ានចាវ (ខេមបូដា) ឯ.ក ដែលមានទីតាំងនៅឃុំសុខសាន្ត ស្រុកកោះញែក ខេត្តមណ្ឌលគិរី ។ យោងទៅលើលិខិតដែលរដ្ឋបាលព្រៃឈើប្រចាំខេត្តមណ្ឌលគិរីចេញឲ្យក្រុមហ៊ុនយ៉ានចាវ បញ្ជាក់ថា អនុញ្ញាតឲ្យឈ្មោះ Zhang Wentao ជានាយកក្រុមហ៊ុនដឹកជញ្ជូនផលអនុផល ឈើអារលេខ២ ចំនួន១៦ម៉ែត្រគូប ក្នុង១រថយន្ត ដោយទម្ងន់ផ្ទុករថយន្តនីមួយៗត្រូវអនុវត្តតាមប្រកាសលេខ៤១១ ប្រ.ក.ស.កា.ក.ត.ល.ង ចុះថ្ងៃទី០២ កញ្ញា ២០០៩ ។
ក្នុងលិខិតដដែលថា ការដឹកជញ្ជូនឈើទាំងនេះត្រូវដឹកចេញពីចំនុច រោងម៉ាស៊ីនអារកែច្នៃឈើ នៃរដ្ឋបាលព្រៃសង្កាត់ស្រែសង្គម ផ្នែករដ្ឋបាលកោះញែក ខណ្ឌរដ្ឋបាលព្រៃឈើមណ្ឌលគិរី ឆ្ពោះទៅភូមិជ្រលង ឃុំប្រាសាទ ស្រុកកំពង់ត្របែក ខេត្តព្រៃវែង ។ បច្ចុប្បន្នការដឹកជញ្ជូនឈើ ពីបណ្តាក្រុមហ៊ុនដីសម្បទានសេដ្ឋកិច្ចក្នុងខេត្តមណ្ឌលគិរី ត្រូវបានគេមើលឃើញថា មានសកម្មភាពមមាញឹកឡើងវិញ ក្រោយស្ងប់ស្ងាត់អស់មួយរយៈ នាអំឡុងចុងឆ្នាំ២០១៨ ។
ប្រជាពលរដ្ឋដែលរស់នៅតាមបណ្តោយផ្លូវជាតិលេខ៧៦ បានបង្ហាញពីការព្រួយបារម្ភជាខ្លាំង លើគុណភាពផ្លូវ ដែលត្រូវរងការខូចខាតដោយសារការដឹកឈើលើសទម្ងន់ ។ ប្រជាពលរដ្ឋក៏បានសំណូមពរដល់អាជ្ញាធរ ឬមន្ត្រីជំនាញ ជួយពិនិត្យលើលក្ខណៈបច្ចេកទេស ក្រុមរថយន្តដឹកឈើទាំងនោះជៀសវាងបង្កការខូចខាតធ្ងន់ធ្ងរលើទ្រព្យសម្បត្តិសាធារណៈ ៕
ចែករំលែកព័តមាននេះ