ខេត្តឧត្តរមានជ័យ ៖ អ្នករស់នៅជិតខាងធុំក្លិនស្អុយពេក ដោយមានការសង្ស័យក៏រាយការណ៍ដល់សមត្ថ កិច្ចចុះមកពិនិត្យ ទើបដឹងថាបុរសម្នាក់បានគាំងបេះដូងស្លាប់នៅក្នុងបន្ទប់ជួល បង្កឱ្យមានការភ្ញាក់ផ្អើលកាលពីវេលាម៉ោង៨ព្រឹកថ្ងៃទី១៨ ឧសភា ឆ្នាំ២០១៩ ស្ថិតក្នុងភូមិពោធិថ្មី ឃុំគោកមន ស្រុកបន្ទាយអម្ពឹល ខេត្តឧត្តរមានជ័យ។
ជនរងគ្រោះដែលស្លាប់ឈ្មោះស៊ុន ភ័ស្ថ ភេទប្រុស អាយុ៣៧ឆ្នាំ ជាជាងប្លាទីន មានស្រុកកំណើតនៅឯខេត្តស្វាយរៀង តែបានមកស្នាក់នៅភូមិឃុំកើតហេតុខាងលើ។
បើតាមប្រជាពលរដ្ឋឈ្មោះហ៊ុយ ហៀភេទប្រុស អាយុ៤០ឆ្នាំ ជាជាងកាត់សក់ ដែលមានតូបជាប់នឹងបន្ទប់ជួលរបស់ជនរងគ្រោះបានឱ្យដឹងថា មុនពេលកើតហេតុ គាត់បានមកបើកតូបកាត់សក់ ហើយក៏ធុំក្លិនស្អុយ ដោយមានការសង្ស័យក៏រាយកាណ៍ដល់សមត្ថកិច្ចដើម្បីឱ្យចុះមកពិនិត្យតែម្តង ។
តាមប្រភពពីអធិការស្រុកបន្ទាយអម្ពឹលបានឱ្យដឹងថា បន្ទាប់ពីទទួលបានព័ត៌មានខាងលើនេះភ្លាម សមត្ថកិច្ចបានចុះទៅដល់កន្លែងកើតហេតុ និងបើកបន្ទប់ជួលមើល ស្រាប់តែឃើញជនរងគ្រោះដេកស្លាប់នៅលើគ្រែ ។
ក្រោយពីការពិនិត្យសពជនរងគ្រោះ និងពិនិត្យនៅជុំវិញកន្លែងកើតហេតុរួច សមត្ថកិច្ចបានធ្វើការសនិដ្ឋានថា ជនរងគ្រោះអាចដេកគាំងបេះដូងក្នុងបន្ទប់ជួល ដោយពុំមាននរណាម្នាក់បានដឹង និងជួយធ្វើការសង្គ្រោះឡើយ ទើបបណ្តាលឱ្យស្លាប់បែបនេះ ។
ក្រោយពីពិនិត្យរួច សមត្ថកិច្ចបានប្រគល់សពជនរងគ្រោះទៅឱ្យក្រុមគ្រួសារដើម្បីរៀបចំធ្វើបុណទៅតាមប្រពៃណី៕
ចែករំលែកព័តមាននេះ