កងទ័ពដែលមានភក្តីភាពចំពោះលោកមូអាម៉ា កាដាហ្វី នៅតែផ្គើនទៀតដោយបន្តធ្វើឱ្យជនស៊ីវិលមានការភ័យរន្ធត់តាមរយៈការវាយប្រហារប្រឆាំងមន្ទីរពេទ្យសំខាន់មួយក្នុងទីក្រុង Misrata ដែលកាន់កាប់ដោយពួកឧទ្ទាម កាលពីថ្ងៃទី២៣ មីនា កន្លងមក ក្រោយពីកងទ័ពប្រទេសសម្ព័ន្ធមិត្តបើកការវាយប្រហារតាមអាកាសប្រឆាំងលោកកាដាហ្វី៥ថ្ងៃជាប់ៗគ្នា។ សាក្សីម្នាក់និយាយថា កងទ័ពរបស់លោកកាដាហ្វី បានវាយប្រហារប្រឆាំងមន្ទីរពេទ្យសំខាន់មួយ ដែលមានមនុស្សដល់ទៅ៤០០នាក់ ប្រហែលពាក់កណ្តាលជាអ្នកជំងឺ ។ សាក្សីដដែលនិយាយឱ្យដឹងថា រថក្រោះធុនធ្ងន់របស់កងទ័ពលោកកាដាហ្វី បានវាយប្រហារមន្ទីរពេទ្យនោះ ដោយគ្រាប់ផ្លោងធ្លាក់ចម្ងាយ២០ម៉ែត្រប៉ុណ្ណោះពីពួកយើង ។
កាលពីថ្ងៃទី២៣ មីនា កន្លងមក ប្រទេសសម្ព័ន្ធមិត្តបារាំង អង់គ្លេស និងសហរដ្ឋអាមេរិក បានបើកការវាយប្រហារប្រឆាំងលោកកាដាហ្វី ទៀតនៅថ្ងៃទី៥ នៃការវាយប្រហារតាមអាកាស ។ ទីភ្នាក់ងារព័ត៌មានចិនស៊ីនហួរាយការណ៍ថា ការវាយប្រហារដោយយន្តហោះចម្បាំងរបស់ពួកលោកខាងលិច កាលពីយប់ថ្ងៃទី២៣ មីនា នៅភាគខាងកើតរដ្ឋធានីទ្រីប៉ូលី បណ្តាលឱ្យរបួសជនស៊ីវិលជាច្រើននាក់ ។ ការផ្ទុះគ្រាប់ជាច្រើនត្រូវបានលាន់ឮនៅក្បែរទីក្រុងទ្រីប៉ូលី កាលពីយប់ថ្ងៃទី២៣ មីនា នោះ ។ ដោយឡែកទីភ្នាក់ងារព័ត៌មានលីប៊ី រាយការណ៍ឱ្យដឹងថា ការវាយប្រហារតាមអាកាសដោយកងទ័ពប្រទេសលោកខាងលិចនៅភាគខាងកើតទីក្រុងទ្រីប៉ូលី បណ្តាលឱ្យស្លាប់ជនស៊ីវិលជាច្រើននាក់។ អ្នកកាសែតម្នាក់របស់ទីភ្នាក់ងារព័ត៌មានស៊ីនហួដែលយកព័ត៌មាននៅក្នុងទីក្រុងទ្រីប៉ូលី និយាយឱ្យដឹងថា យន្តហោះចម្បាំងជាច្រើនគ្រឿងរបស់ប្រទេសលោកខាងលិច បានហោះហើរឆ្វែលពីលើទីក្រុងទ្រីប៉ូលី ហើយកងទ័ពរដ្ឋាភិបាលលីប៊ីបានបាញ់កាំភ្លើងប្រឆាំងយន្តហោះក្នុងគោលបំណងបាញ់ទម្លាក់យន្តហោះចម្បាំងប៉ុន្តែពុំត្រូវឡើយ ៕
ចែករំលែកព័តមាននេះ