ខេត្តកំពង់ចាម ៖ ស្ពានដែកបាឡេមានទទឹង៤ម៉ែត្រ និងបណ្តោយ១៥០ម៉ែត្រ ស្ថិតនៅឃុំអង្គរបាន ស្រុកកងមាស ត្រូវបានកសាងឡើងក្នុងអំឡុងឆ្នាំ២០០៣ ដោយកម្លាំងកងវិស្វកម្មនៃក្រសួងការពារជាតិជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន រហូតមកដល់សព្វថ្ងៃដូចមានសភាពរាងទ្រុឌទ្រោមបន្តិចហើយ និងខ្វះការថែទាំពីសំណាក់អាជ្ញាធរមូលដ្ឋាន ដោយបណ្តោយឲ្យមានរថយន្តខ្នាតយក្សដឹកទំនិញ និងស៊ីម៉ង់តិ៍បើកឆ្លងកាត់ហាក់ដូចមិនមានវិធានការទប់ស្កាត់ឲ្យមានប្រសិទ្ធភាព ។
ប្រជាពលរដ្ឋនៅស្រុកកងមាស សូមមិនបញ្ចេញឈ្មោះប្រាប់ឲ្យដឹងនៅព្រឹកថ្ងៃទី១៨ ឧសភាថា ផ្លូវមាត់ទន្លេមេគង្គកាលពីមុនរាងពិបាក ដោយសារផ្លូវក្រាលក្រួសក្រហម តែក្រោយមកប្រែក្លាយទៅជាផ្លូវកៅស៊ូត្រូវបានគេមើលឃើញមានម៉ូតូរថយន្តជាច្រើនបើកឆ្លងកាត់ទៅវិញទៅមកឆ្លងស្ពានបាឡេចេញពីភ្នំពេញ-ខេត្តកំពង់ចាម ដោយសារតែនេះផ្លូវជាកាត់ ហើយចំណេញពេលវេលាទៀតផង ។
ប្រជាពលរដ្ឋប្រាប់បន្តថា នៅពេលថ្ងៃៗគេឃើញមានយានយន្តបើកឆ្លងកាត់ស្ពានបាឡេធម្មតា ប្រសិនណាបើកមិនបន្ថយល្បឿនរាងឮសូរសម្លេងថ្លង់បន្តិច ព្រោះតែបាតក្រាលដោយបន្ទះដែក ហើយជួនកាលនៅពេលយប់ឃើញរថយន្តបើកឆ្លងកាត់ចេញពីក្បាលស្ពាន ត្រង់រូបសំណាក់មានរទេះគោ ក្នុងពេលដែលរថយន្តបើកឆ្លងនោះឡើងញ័ររញ្ជួយតែម្តង។
ពលរដ្ឋប្រាប់ថា កន្លងមក ធ្លាប់មានរថយន្តដឹកអុសស្ទែរមានកង់ធំចេញទៅលក់នៅតាមឡដ្ឋ នៅព្រែកអញ្ចាញជិតរាជធានីភ្នំពេញ ប្រជាពលរដ្ឋមានចង្ងល់ថា ត្រង់ក្បាលស្ពានគេមានដាក់ដែកបារ៉ាសកំពស់៣,៣០ម៉ែត្រ កំណត់ឲ្យរថយន្តធុនតូចបើកឆ្លងកាត់ដើម្បីចៀសវាងការពារកុំឲ្យបាក់ស្ពានដោយប្រការណាមួយ តែនេះហេតុអ្វីបានជានមានរថយន្តធុនធំៗបើកឆ្លងកាត់ទៅវិញ ។ ជាក់ស្តែងនៅព្រឹកថ្ងៃទី១៨ឧសភា ដែកបារ៉ាសដាក់ទទឹងស្ពានដោយឃើញចាក់សោតែម្ខាង សូម្បីតែដែកបន្ទះសសរកំណត់កំពស់៣,៣០ម៉ែត្រ ត្រូវរថយន្តធំៗបុកប៉ើងជ្រុះមកដី ។
បើតាមលោកមឿន ផា អភិបាលស្រុកកងមាស វិញប្រាប់ឲ្យដឹងនៅល្ងាចថ្ងៃទី១៨ ឧសភាថា ដោយសារតែមានបាតុភាពឲ្យបណ្តោយឲ្យរថយន្តធំបើកឆ្លងកាត់ស្ពានបាឡេព្រែកអង្គរបាន ទើបរូបលោកបានឲ្យដាក់ដែកបារ៉ាសកាត់ទទឹងពីលើ ដោយមានចាក់សោសងខាង និងកំណត់កំពស់៣,៣០ម៉ែត្រ ដើម្បីកំណត់ឲ្យរថយន្តបើកឆ្លងកាត់ ហើយអ្នកនៅមើលទីនោះមានមន្ត្រីនគរបាលមូលដ្ឋាន។ ស្ពាននេះបានអនុញ្ញាតឲ្យតែរថយន្តធុនតូចបើកឆ្លងកាត់ទេ ហើយបើប្រភេទធុនធំដឹកស៊ីម៉ង់តិ៍មិនឲ្យឆ្លងកាត់នោះទេ៕
ចែករំលែកព័តមាននេះ