ខេត្តបាត់ដំបង ៖ សេចក្តីរាយការណ៍ឱ្យដឹងថា ប្រជាពលរដ្ឋយ៉ាងតិចជិត៣០នាក់ ត្រូវគេសង្ស័យថា ពុលក្ដាមប្រៃ ហើយក្នុងនោះជនរងគ្រោះចំនួន១៥នាក់ ត្រូវបានក្រុមគ្រួសារបញ្ជូនទៅសង្រោះបន្ទាន់នៅមន្ទីរពេទ្យបង្អែកស្រុកមោងប្ញស្សី ខណ:ជនរងគ្រោះមួយចំនួនទៀតសម្រាកព្យាបាលនៅផ្ទះ និងនៅតាមគ្លីនិកឯកជន តែក៏មានជនរងគ្រោះបានធូរស្រាលចាកចេញពីមន្ទីរពេទ្យវិញហើយដែរ ។ នេះបើតាមព័ត៌មានបឋមដែលកោះសន្តិភាពទទូលបានពីមន្ត្រីស្រុកមោងឬស្សី នៅព្រឹកថ្ងៃទី១៨ ឧសភា នេះ ។
គួរបញ្ជាក់ដែរថា ៖ បានស្គាល់ជនរងគ្រោះពុលផ្សិតទាំង៥នាក់នេះហើយ…
តាមរដ្ឋបាលស្រុកមោងប្ញស្សីបានឲ្យដឹងទៀតថា ប្រជាពលរដ្ឋដែលរងគ្រោះទាំងនោះមានប្រុស មានស្រី ហើយហេតុការណ៍នេះ បានកើតឡើងកាលពីរសៀលថ្ងៃទី១៧ ឧសភា ។ បើគិតត្រឹមម៉ោង១០ព្រឹកថ្ងៃទី១៨ ឧសភា នេះ មានជនរងគ្រោះចំនួន១៥នាក់ ក្នុងនោះមានស្ត្រី៦នាក់ ត្រូវបានបញ្ជូនមកសង្គ្រោះនៅមន្ទីរពេទ្យបង្អែកស្រុក ចាប់តាំងពីល្ងាចថ្ងៃកើតហេតុ រហូតមកដល់ព្រឹកថ្ងៃទី១៨ឧសភានេះ។ ប៉ុន្តែបើតាមព័ត៌មានពីតាមមូលដ្ឋានអាចមានពលរដ្ឋរងគ្រោះជាច្រើននាក់ទៀត កំពុងសម្រាកព្យាបាលនៅតាមផ្ទះឬតាមគ្លីនិកឯកជន។
ពាក់ព័ន្ធនឹងករណីនេះ បើតាមការស្រង់សំដីរបស់ក្រុមគ្រូពេទ្យដែលបានសួរនាំជនរងគ្រោះ បានឲ្យដឹងថា ជនរងគ្រោះទាំងអស់សុទ្ធតែមានអាការ:ក្អួតចង្អោរ ឈឺពោះ និងរាករូស ។ បើតាមចម្លើយជនរងគ្រោះស្ទើរទាំងអស់បានអះអាងប្រហាក់ប្រហែលគ្នាប្រាប់គ្រូពេទ្យថា ពួកគេបានហូបក្ដាមប្រៃ ឬហូបក្ដាមប្រៃបុកជាមួយល្ហុង ។ ពួកគេបានប្រាប់ទៀតថា ក្ដាមប្រៃទាំងនោះភាគច្រើនទិញពីផ្សារមោងប្ញស្សី ។
យោងតាមការពិនិត្យលើអាការ:រោគរបស់ជនរងគ្រោះ គ្រូពេទ្យបានធ្វើការសន្និដ្ឋានជំហានដំបូងថា ជនរងគ្រោះអាចពុលនឹងចំណីអាហារទាំងនោះដែលធ្វើគ្មានអនាម័យ។ ទោះយ៉ាងណាបើតាមគ្រួពេទ្យបានឲ្យដឹងថា មកដល់ព្រឹកថ្ងៃទី១៨ ឧសភា នេះ អ្នកជំងឺមួយចំនួនបានធូរស្រាល និងចាកចេញពីមន្ទីរពេទ្យហើយ តែចំពោះអ្នកជំងឺដទៃទៀត ដែលសម្រាកព្យាបាលនៅកន្លែងផ្សេង គេមិនអាចវាយតំលៃបានទេ។
ជុំវិញពលរដ្ឋពុលក្ដាមប្រៃខាងលើនេះ បើតាមអ្នកភូមិបាននិយាយថា ប្រជាពលរដ្ឋរងគ្រោះខាងលើ ទំនងអាចពុលក្ដាមប្រៃមែន។ ព្រោះពេលនេះមានភ្លៀងធ្លាក់ជាញឹកញ៉ាប់ ដែលនាំឲ្យដក់ទឹកតាមស្រែ តាមប្រឡាយ។ ប្រភពដដែលបានឲ្យដឹងទៀតថា ស្រែខ្លះត្រូវគេបាចជីឬបាចថ្នាំពុលសម្លាប់សត្វ លុះអ្នកភូមិដើរចាប់ក្ដាមតាមស្រែឬប្រឡាយ យកទៅធ្វើក្ដាមប្រៃ ក៏បណ្ដាលឲ្យពុលអ្នកទិញហូបតែម្ដង។
បើយោងតាមរបាយការណ៍បឋមរបស់រដ្ឋបាលស្រុកមោងប្ញស្សីដដែលបានបញ្ជាក់ថា ប្រជាពលរដ្ឋដែលរងគ្រោះដោយសារពុលក្ដាមប្រៃបុកល្ហុងខាងលើនេះ បានប៉ះពាល់ទៅលើពលរដ្ឋចំនួន១៣ភូមិ នៅក្នុងឃុំចំនួន៦ ក្នុងចំណោមឃុំចំនួន៧ នៅស្រុកមោងឬស្សី។ សមត្ថកិច្ចដែលកំពុងស្រាវជ្រាវបានផ្ដល់ព័ត៌មានជាបឋមថា ពលរដ្ឋដែលរងគ្រោះមានចាប់ពីអាយុ៤ឆ្នាំឡើងទៅ ហើយជាក់ស្ដែងមានជនរងគ្រោះចំនួន១៥នាក់ បានបញ្ជូនដល់មន្ទីរពេទ្យបង្អែកស្រក រីឯជនរងគ្រោះយ៉ាងតិចជាង១០នាក់ទៀតត្រូវគេដឆងថា បានសម្រាកព្យាបាលនៅផ្ទះ ឬនៅតាមគ្លីនិកឯកជននានា។
ទោះយ៉ាងណាពេលនេះ អាជ្ញាធរ និងក្រុមគ្រូពេទ្យកំពុងញាប់ដៃជើងក្នុងការជួយសង្គ្រោះហើយ ។
ចែករំលែកព័តមាននេះ