រាជធានីភ្នំពេញ ៖ នៅព្រឹកថ្ងៃទី១៧ ឧសភា សមត្ថកិច្ចបានធ្វើការបិទទ្វារក្រុមហ៊ុន GCG Asia ដែលបើកស្នាក់ការនៅវិមានកាណាឌីយ៉ា ក្នុងរាជធានីភ្នំពេញ ព្រមទាំងឃាត់ខ្លួនប្តី-ប្រពន្ធជាជនជាតិម៉ាឡេស៊ី…
រាជធានីភ្នំពេញ ៖ នៅព្រឹកថ្ងៃទី១៧ ឧសភា សមត្ថកិច្ចបានធ្វើការបិទទ្វារក្រុមហ៊ុន GCG Asia ដែលបើកស្នាក់ការនៅវិមានកាណាឌីយ៉ា ក្នុងរាជធានីភ្នំពេញ ព្រមទាំងឃាត់ខ្លួនប្តី-ប្រពន្ធជាជនជាតិម៉ាឡេស៊ី ដែលជាប្រធានក្រុមហ៊ុនយកទៅសួរនាំផងដែរ នៅក្រសួងមហាផ្ទៃ ។ វិធានការច្បាប់ត្រូវអនុវត្តលើក្រុមហ៊ុន GCG Asia Co., LTD នេះគឺបន្ទាប់ពីបានយកឈ្មោះ និងរូបថតសម្ដេចតេជោ ហ៊ុន សែន បង្ហោះក្នុងគេហទំព័ររបស់ខ្លួន ដោយខុសច្បាប់ ដែលនាំឲ្យសម្តេចតេជោមានប្រតិកម្ម កាលពីយប់ថ្ងៃទី១៦ ឧសភា ឆ្នាំ២០១៩ ។
មន្ត្រីនគរបាលក្រសួងមហាបានប្រាប់អ្នកសារព័ត៌មានថា ក្រុមហ៊ុនម៉ាឡេស៊ីនេះអាចជាប់ពាក់ព័ន្ធនឹងការលាងលុយកខ្វក់ និងឆបោកលុយពីពលរដ្ឋនៅតាមបណ្តាខេត្តនានា ។ក្រោយពីមានប្រតិកម្មពីសម្តេចតេជោ ហ៊ុន សែន ទើបនៅព្រឹកថ្ងៃទី១៧ ឧសភា អគ្គស្នងការដ្ឋានគរបាលជាតិ បានបើកកិច្ចប្រជុំបន្ទាន់ ជាមួយលោក ជា ចាន់តូ អគ្គទេសាភិបាលធនាគារជាតិនៃកម្ពុជា មុនពេលឈានទៅបន្តនីតិវិធីតាមផ្លូវច្បាប់ ដោយការចុះបិទក្រុមហ៊ុននេះ និងនាំខ្លួនថៅកែក្រុមហ៊ុន GCG ប្តី-ប្រពន្ធយកទៅសាកសួរ ។
កាលពីយប់ថ្ងៃទី១៦ ឧសភា សម្តេចតេជោ ហ៊ុន សែន បានប្រកាសតាមហ្វេសប៊ុកផ្លូវការរបស់សម្តេចថា «ដំណឹងសន្តិសុខជាតិបន្ទាន់» កាលពីពេលថ្មីៗនេះ មានក្រុមហ៊ុន ឈ្មោះ GCG Asia Co., LTD បានយករូបថតខ្ញុំ និងឈ្មោះខ្ញុំ ទៅបង្ហោះនៅក្នុង Website របស់ក្រុមហ៊ុន http://gcgasiacoin.com/ ដែលនិយាយថា ខ្ញុំជាអ្នកគាំទ្រ និងចូលរួមសម្ពោធកាត់ខ្សែបូក្រុមហ៊ុន នៅក្នុងប្រទេសកម្ពុជានៅថ្ងៃទី២០ឧសភា ២០១៩ ។
ទន្ទឹមនឹងនោះ ក្រុមហ៊ុននេះ បានយកឈ្មោះធនាគារជាតិ និងធនាគារចិននៅកម្ពុជាថា ជាដៃគូទទួលខុសត្រូវក្នុងជំនួញដូរលុយ ក្នុងរូបភាពគ្រីបតូឃឺរិនស៊ី (Crypto Currency) ។ តាមព័ត៌មានពីស្ថានទូតឥណ្ឌូណេស៊ីនៅកម្ពុជា គឺបញ្ជាក់ថា GCG Asia ជាក្រុមហ៊ុនរកស៊ី មិនត្រឹមត្រូវហើយត្រូវបានដាក់ចូលក្នុង Black List» ផងដែរ ។ សម្តេចបានគូសបញ្ជាក់ថា «ក្នុងនាមខ្ញុំជានាយករដ្ឋមន្ត្រីនៃព្រះរាជាណាចក្រកម្ពុជា ខ្ញុំសូមបដិសេធព័ត៌មានដែលផ្សាយក្នុងវេបសាយរបស់ក្រុមហ៊ុនខាងលើនេះគឺមិនពិតទេ» ។
សម្តេច តេជោក៏សូមអាជ្ញាធរ និងសមត្ថកិច្ចពាក់ព័ន្ធទាំងអស់ពិនិត្យតាមដាន និងស្រាវជ្រាវរកមុខជនខិលខូចយកមកផ្តន្ទាទោសតាមច្បាប់ជាធរមានជាបន្ទាន់ ។ ជាមួយគ្នានោះដែរ សម្តេចក៏សូមបងប្អូនប្រជាពលរដ្ឋ និងពាណិជ្ជករទាំងក្នុងនិងក្រៅប្រទេសមានការប្រុងប្រយ័ត្នខ្ពស់ ចំពោះការទិញដូរប្រាក់ដែលគ្មានការអនុញ្ញាតពីរាជរដ្ឋាភិបាលកម្ពុជាជាការឆបោកដ៏ពិសពុលមួយ ៕
ចែករំលែកព័តមាននេះ