រាជធានីភ្នំពេញ ៖ ការអង្កេតលើវីដេអូមួយសង្ស័យជនជាតិចិនមួយក្រុមជាជនសង្គមងងឹត ដែលប្រកាសបង្កភាពវឹកវរនៅក្នុងខេត្តព្រះសីហនុនោះបានរកឃើញថា វីដេអូនេះគឺថតដោយជនជាតិចិន មកពីទីក្រុង Chongqing ដែលបានមកធ្វើការនៅប្រទេសកម្ពុជា កាលពីខែមីនា ឆ្នាំនេះ ។ ហើយក្រោយពីស្រវឹងស្រា ពួកគេបានថតវីដេអូមិនល្អបែបនេះ ដោយគ្រាន់ជាការលេងសើចប៉ុណ្ណោះ ។ ហើយបុគ្គលទាំងឡាយនៅក្នុងវីដេអូនេះ មិនមានជាប់ពាក់ព័ន្ធនឹងសង្គមងងឹតណាមួយទេ ។ នេះយោងសេចក្តីជូនដំណឹងលើទំព័រហ្វេសប៊ុករបស់ស្ថានទូតនៃសាធារណរដ្ឋប្រជាមានិតចិនប្រចាំកម្ពុជាបានបង្ហោះ ។ គួររំលឹកថា៖ ស្ថានទូតចិនប្រកាសសហការវែកមុខជាមួយកម្ពុជា
សេចក្តីជូនដំណឹងមានខ្លឹមសារដើមទាំងស្រុងថា ៖ «សេចក្ដីជូនដំណឹងរបស់ស្ថានទូតចិនប្រចាំកម្ពុជាអំពីស្ថានភាពនៃការស៊ើបអង្កេតលើវីដេអូជនជាតិចិនសង្ស័យពាក់ព័ន្ធនឹងសង្គមងងឹតដែលត្រូវបានផ្សព្វផ្សាយលើប្រព័ន្ធអ៊ីនធើណេតក្នុងពេលថ្មីៗនេះ នៅលើប្រព័ន្ធអ៊ីនធើណេតមានវីដេអូខ្លីមួយសង្ស័យពាក់ព័ន្ធនឹងសកម្មភាពសង្គមងងឹត ដែលថតដោយបុរសជាងដប់នាក់ដោយហៅខ្លួនឯងថាមកពីទីក្រុងChongqing ប្រទេសចិនហើយនិយាយក្អេងក្អាងថានឹងបំពុលដល់សន្តិសុខរបស់ខេត្តព្រះសីហនុ។ក្រោយការស៊ើបអង្កេតយ៉ាងម៉ត់ចត់របស់សមត្ថកិច្ចចិន រកឃើញថា វីដេអូនេះត្រូវបានថតដោយជនជាតិចិនមកពីទីក្រុង Chongqing ដែលបានមកធ្វើការនៅប្រទេសកម្ពុជាកាលពីខែមីនា ឆ្នាំនេះ ហើយក្រោយពីស្រវឹងស្រារួច ពួកគេបានថតវីដេអូមិនល្អបែបនេះ ដោយគ្រាន់ជាការលេងសើចប៉ុណ្ណោះ។ បុគ្គលទាំងឡាយនៅក្នុងវីដេអូនេះ មិនមានជាប់ពាក់ព័ន្ធនឹងសង្គមងងឹតណាមួយទេ។ឆ្នាំនេះគឺជាឆ្នាំសហប្រតិបត្តិការអនុវត្តច្បាប់រវាងចិន និងកម្ពុជា ភាគីទាំងពីរនឹងចាត់វិធានការណ៍ជាក់ស្ដែង ធ្វើឲ្យកាន់តែស៊ីជម្រៅលើកិច្ចសហការផ្នែកសន្តិសុខ និងការអនុវត្តច្បាប់ ដែលនឹងនាំមកនូវភាពសុខដុមរមនា និងអត្ថប្រយោជន៍ជូនដល់ប្រជាជនប្រទេសទាំងពីរ» ។
ព័ត៌មានលម្អិតនឹងមានផ្សាយជូនបន្ត ។
ចែករំលែកព័តមាននេះ