រាជធានីភ្នំពេញ ៖ ស្ថានភាពវិនិយោគនៅក្នុងប្រទេសកម្ពុជារយៈពេលប៉ុន្មានឆ្នាំមកនេះ នៅតែមានភាពល្អប្រសើរ ពោលគឺចាប់តាំងពីជួបវិបត្តិហិរញ្ញវត្ថុអំឡុងឆ្នាំ២០០៨មក ក្នុងនោះ លំហូរទុនវិនិយោគទាំងក្នុងនិងក្រៅប្រទេស ដើរតួជាកត្តាសំខាន់ដែលជំរុញកំណើនសេដ្ឋកិច្ចកម្ពុជាអោយស្ថិតក្នុងរង្វង់ប្រមាណ៧ភាគរយក្នុងមួយឆ្នាំ ។ ជាក់ស្ដែងសម្រាប់រយៈពេល៤…
រាជធានីភ្នំពេញ ៖ ស្ថានភាពវិនិយោគនៅក្នុងប្រទេសកម្ពុជារយៈពេលប៉ុន្មានឆ្នាំមកនេះ នៅតែមានភាពល្អប្រសើរ ពោលគឺចាប់តាំងពីជួបវិបត្តិហិរញ្ញវត្ថុអំឡុងឆ្នាំ២០០៨មក ក្នុងនោះ លំហូរទុនវិនិយោគទាំងក្នុងនិងក្រៅប្រទេស ដើរតួជាកត្តាសំខាន់ដែលជំរុញកំណើនសេដ្ឋកិច្ចកម្ពុជាអោយស្ថិតក្នុងរង្វង់ប្រមាណ៧ភាគរយក្នុងមួយឆ្នាំ ។ ជាក់ស្ដែងសម្រាប់រយៈពេល៤ ខែ ដើមឆ្នាំ ២០១៩ នេះ គម្រោងវិនិយោគប្រមាណ១១៥គម្រោង ដែលមានទឹកប្រាក់ប្រមាណ៤ពាន់លានដុល្លារអាមេរិកត្រូវបានអនុម័តជាបន្តបន្ទាប់ ។
ក្នុងរយៈពេលប៉ុន្មានឆ្នាំចុងក្រោយនេះស្ថានភាពវិនិយោគនៅកម្ពុជាមានភាពល្អប្រសើរ ដោយក្នុងនោះរយៈពេល៥ឆ្នាំចុងក្រោយគិតចាប់ពីឆ្នាំ ២០១៤ ដល់ឆ្នាំ ២០១៨ កម្ពុជាបានអនុម័តគម្រោងវិនិយោគសរុបចំនួន៩៥៩គម្រោង ដែលមានទុនវិនិយោគសរុបប្រមាណ២៣ពាន់លានដុល្លារអាមេរិក និងអាចបង្កើតការងារបានចំនួន១លានកន្លែងជូនពលរដ្ឋក្នុងស្រុក ។ នេះបើយោងតាមប្រសាសន៍សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ថ្លែងនៅវេទិកាធុរកិច្ចកម្ពុជា នេប៉ាល់កាលពីថ្ងៃទី ១៤ ខែឧសភា ២០១៩កន្លងទៅនេះ។
សម្តេចតេជោ បានបន្តថា ដោយឡែកក្នុងរយៈពេល៤ខែដើមឆ្នាំ ២០១៩នេះ គម្រោងវិនិយោគដែលកម្ពុជាបានអនុម័ត មានចំនួន ១១៥គម្រោងរួចហើយដែរ ដែលមានទឹកប្រាក់វិនិយោគសរុបប្រមាណ ៤ពាន់លានដុល្លារអាមេរិក ហើយបើប្រៀបធៀបទៅនឹងរយៈពេលដូចគ្នាក្នុងឆ្នាំ ២០១៨ ដែលមានគម្រោងវិនិយោគចំនួនតែ៨១គម្រោង និងមានទុនវិនិយោគប្រមាណ៨៦៣លានដុល្លារអាមេរិកប៉ុណ្ណោះ ។ សម្ដេចបានមានប្រសាសន៍បន្ថែមទៀតថា កម្ពុជានៅតែមានសក្ដានុពលវិនិយោគខ្ពស់សម្រាប់វិនិយោគិនបរទេស និងក្នុងស្រុក លើវិស័យជាច្រើនដែលកំពុងមានអាទិភាពដូចជាគម្រោងវិស័យទេសចរណ៍ វិស័យកសិកម្ម និងសំណង់ជាដើម ដែលវិស័យទាំងនេះ ត្រូវបានគេកត់សម្គាល់ឃើញថាមានសន្ទុះងើបឡើងខ្លាំង នៅក្នុងរយៈពេលប៉ុន្មានឆ្នាំកន្លងមកនេះ ។
យោងតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជាចេញជាហូរហែរកន្លងមកឃើញថា មានក្រុមហ៊ុនថ្មីៗជាបន្តបន្ទាប់បានស្នើសុំវិនិយោគលើគម្រោងផ្សេងគ្នានៅក្នុងប្រទេសកម្ពុជា ដូចជាគម្រោងវិនិយោគលើរោងចក្រកាត់ដេរ រោងចក្រកែច្នៃ កសិផល សណ្ឋាគារ និងគម្រោងអចលនទ្រព្យជាច្រើនទៀតផងដែរ ដែលគម្រោងវិនិយោគនេះ នឹងបង្កើតការងារដល់ពលរដ្ឋរាប់សិបម៉ឺននាក់ និងអាចទាញអត្ថប្រយោជន៍ ជាច្រើនសម្រាប់កំណើនជីវភាពរបស់ប្រជាពលរដ្ឋផ្ទាល់តែម្ដង ៕
ចែករំលែកព័តមាននេះ