ចិន៖ តាមប្រភពពី Oddity Central បានឱ្យដឹងថា បុរសចំណាស់វ័យ៦៣ឆ្នាំ បានធ្វើឱ្យសារព័ត៌មានការភ្ញាក់ផ្អើល ព្រោះតែបានក្អួតចេញសាច់ដុះមួយដុំពីក្នុងមាត់ ដែលមានប្រភពចេញពីបំពង់ករបស់គាត់។ ដោយសារតែភ័យពេកក៏រើសលេបចូលទៅក្នុងវិញ។
បុរសមិនបញ្ចេញឈ្មោះម្នាក់ ដែលមកពីខេត្ត Hubei ប្រទេសចិន មានអារម្មណ៍មិនស្រួលក្នុងបំពង់កជាយូរមកហើយ តែគាត់មិនដែលទៅពេទ្យទេ ព្រោះតែយល់ថា មិនធ្ងន់ធ្ងរ។ តែកាលពីសប្តាហ៍មុន គាត់បានផឹកជ្រុល ក៏ចាប់ផ្តើមមានអារម្មណ៍ថា ចង់ក្អួត។ ពេលដែលក្អួតចេញមក ស្រាប់តែគាត់ឈឺនៅត្រង់បំពង់កខាងក្រោមយ៉ាងខ្លាំង ហើយក៏ឃើញសាច់មួយដុំធ្លាក់ចេញតាមមាត់ ។ វាហាក់បីដូចជាមានទងជាប់ទៅនឹងបំពង់កខាងក្នុង ដែលធ្វើឱ្យគាត់ភ័យ ក៏លេបចូលទៅវិញ ។
ក្រោយពីមានរឿងបែបនេះកើតឡើង គាត់ក៏សម្រេចចិត្តទៅជួបពេទ្យ ដើម្បីធ្វើការពិនិត្យតាមអង់ដូស្កូប។ វេជ្ជបណ្ឌិតនៅមន្ទីរពេទ្យ Wuhan បានរកឃើញដុំសាច់ដុះនៅក្នុងបំពង់ករបស់គាត់ ដែលមានទងជាប់ដល់ទៅ១៥សង់ទីម៉ែត្រ។ វេជ្ជបណ្ឌិតបានវះកាត់យកវាចេញ ទើបដឹងថា វាជាសាច់ស្លូត ។
ថ្វីបើវាស្លូតមែន តែវាអាចបង្កជាផលរំខានដល់សុខភាព ព្រោះតែទីតាំង និងទំហំដែលវាកើតមាន។ ម្យ៉ាង វិញទៀត ក្នុងករណីខ្លះ វាក៏អាចក្លាយទៅជាសាច់កាចបានដែរ បើយោងតាមប្រសាសន៍របស់អ្នកជំនាញ ៕
ចែករំលែកព័តមាននេះ