រាជធានីភ្នំពេញ ៖ ព្រះឆាយាលក្ខណ៍ជាច្រើនសន្លឹក ដែលបានផ្សព្វផ្សាយក្នុងផេកព្រះបរមរាជវាំង បានបង្ហាញពីសម្តេចព្រះមហាក្សត្រី ព្រះវររាជមាតាជាតិខ្មែរ យាងទៅសួរសុខទុក្ខសម្តេចក្រុមព្រះ នរោត្តម រណឫទ្ធិ កាលពីថ្ងៃទី១៥ ខែឧសភាកន្លងទៅ ខណៈដែលសម្តេចក្រុមព្រះកំពុងសម្រាកព្យាបាលរបួសដែលមិនទាន់សះស្បើយនៅឡើយនៅដំណាក់វាលស្បូវ ក្នុងសង្កាត់និរោធ ខណ្ឌច្បារអំពៅ ដោយមានការថែទាំពីម្ចាស់ក្សត្រីម៉ារី ។
ការយាងទៅសួរសុខទុក្ខនេះបានបង្ហាញថា សម្តេចម៉ែពិតជាមានសេចក្តីនឹករឭក អាណិត និងស្រឡាញ់ព្រះរាជវង្សានុវង្សរបស់ព្រះអង្គ ដែលពេលនេះទ្រង់ជាព្រះអធិបតី បន្ទាប់ពីព្រះបរមរតនកោដ្ឋ សោយទិវង្គតទៅ ។
សម្តេចព្រះមហាក្សត្រី បានសព្វព្រះរាជហឫទ័យយាងសំណេះសំណាលសួរសុខទុក្ខសម្តេចក្រុមព្រះ នរោត្តម រណឫទ្ធិ ព្រះប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលកំពុងសម្រាកព្យាបាលព្រះសុខភាពនៅដំណាក់វាលស្បូវ ក្នុងសង្កាត់និរោធ ។
តាមរយៈព្រះឆាយាលក្ខណ៍ជាច្រើនសន្លឹក អ្វីដែលធ្វើឱ្យមហាជនមានការចាប់អារម្មណ៍នោះ គឺសម្តេចក្រុមព្រះ នរោត្តម រណឫទ្ធិ បន្ទាប់ពីរងរបួសធ្ងន់ក្នុងគ្រោះថ្នាក់ចរាចរណ៍នៅផ្លូវជាតិលេខ៤ ដែលបណ្តាលឱ្យអ្នកម្នាង អ៊ុក ផល្លា ស្លាប់នោះ គេមិនដែលបានឃើញព្រះភ័ក្ត្រព្រះអង្គជាសាធារណៈទេ គឺបានត្រឹមទទួលព័ត៌មានថា ព្រះអង្គយាងទៅសម្រាកព្យាបាលនៅមន្ទីរពេទ្យក្នុងក្រុងបាងកក ប្រទេសថៃ ។
តាមព្រះឆាយាលក្ខណ៍ទាំងនេះ គេឃើញព្រះអង្គត្រូវបានគ្រាហ៍ ដោយសម្តេច មហិស្សរា ចក្រពង្ស់ ជាព្រះអនុជដែលបង្ហាញថា ព្រះអង្គមិនទាន់ជាសះស្បើយនៅឡើយទេ ហើយក៏មានភាពចាស់ជរាស្មានមិនដល់ផងដែរឬដូចជាខ្សោយថាមពល ។
សូមរំឭកថា សម្តេចក្រុមព្រះ នរោត្តម រណ ឫទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍នៅតាមផ្លូវជាតិលេខ៤ ចន្លោះគីឡូ ម៉ែត្រលេខ២០០-២០១ នៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ នាវេលាម៉ោងជាង៩ព្រឹកថ្ងៃទី១៧ ខែមិថុនា ឆ្នាំ២០១៨ មុនការបោះឆ្នោតនាខែកក្កដា។
នៅក្នុងគ្រោះថ្នាក់ចរាចរណ៍នេះ សម្តេចក្រុមព្រះបានរងរបួសធ្ងន់ជាមួយនឹងអង្គរក្ស ចំណែកអ្នកម្នាង អ៊ុក ផល្លា បានទទួលមរណភាពនៅពេលក្រោយមកដោយសាររបួសធ្ងន់ពេក ។ ពេលនេះ សម្តេចក្រុមព្រះហាក់បានយាងមកទ្រនំចាស់វិញហើយ គឺម្ចាស់ក្សត្រីម៉ារី រណឫទ្ធិ ៕
ចែករំលែកព័តមាននេះ