ខេត្តកំពង់ធំ ៖ បុរសជាជាងភ្លើងម្នាក់បានចងកសម្លាប់ខ្លួនលើដើមអាកាស្យា បង្ករការភ្ញាក់ផ្អើលកាលពីព្រឹកថ្ងៃទី១៦ ខែឧសភា ឆ្នាំ២០១៩ នៅចំណុចទួលតាខេង ភូមិវាំងខាងត្បូង ឃុំតាំងក្រសាំង ស្រុកសន្ទុក…
ខេត្តកំពង់ធំ ៖ បុរសជាជាងភ្លើងម្នាក់បានចងកសម្លាប់ខ្លួនលើដើមអាកាស្យា បង្ករការភ្ញាក់ផ្អើលកាលពីព្រឹកថ្ងៃទី១៦ ខែឧសភា ឆ្នាំ២០១៩ នៅចំណុចទួលតាខេង ភូមិវាំងខាងត្បូង ឃុំតាំងក្រសាំង ស្រុកសន្ទុក ខេត្តកំពង់ធំ ។
តាមប្រភពពីសមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះ ចាន់ វណ្ណ: (ហៅប្រុស) ភេទប្រុស អាយុ២៤ឆ្នាំ ជាជាងភ្លើងឲ្យក្រុមហ៊ុន រស់នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរខេត្តកំពង់ឆ្នាំង និងបានមកស្នាក់នៅបណ្ដោះអាសន្នក្នុងភូមិ៧មករា ឃុំតាំងក្រសាំង ស្រុកសន្ទុក ខេត្តកំពង់ធំ។
បើតាមការបំភ្លឺរបស់ឈ្មោះ ម៉ក់ សុភារិទ្ធ ភេទប្រុស អាយុ២៧ឆ្នាំ ត្រូវជាបងជីដូនមួយរបស់ជនរងគ្រោះ ដែលធ្វើការជាមួយគ្នាបានប្រាប់ឱ្យដឹងថា ប្អូនជីដូនមួយ(ជនរងគ្រោះ)របស់គាត់ជាកូនកំព្រាឪពុក ម្ដាយ មួយរយៈកន្លងមកនេះ គាត់ឃើញជនរងគ្រោះចេះតែមានអារម្មណ៍រវើរវាយ និងមានសតិមិនសូវល្អ ហើយជនរងគ្រោះចេះតែនិយាយថា «ពីរបីថ្ងៃទៀតឪពុកម្ដាយនឹងមកយកទៅនៅជាមួយហើយ» ជួនកាលពេលយប់អធ្រាត្រ ជនរងគ្រោះបានដើរទៅអង្គុយនៅឯវាលស្រែតែម្នាក់ឯងក៏មាន។
តាមប្រភពដដែលបានបន្តថា លុះនៅវេលាម៉ោងប្រហែល៨ព្រឹកថ្ងៃកើតហេតុ ក្រោយពេលហូបបាយព្រឹករួច ជនរងគ្រោះបានប្រាប់គាត់ថា «ទៅរកទិញបារីមួយភ្លែត» ហើយក៏បាត់មិនឃើញវិលមកវិញឡើយ រហូតដល់ពេលមេជាងឈ្មោះលី ឡាត់ តម្រូវឲ្យពួកគាត់ប្រមូលគ្នាថតរូប ដើម្បីបង្ហោះរាយការណ៍ទៅមេនៅឯងភ្នំពេញ ស្រាប់តែបាត់ជនរងគ្រោះមិនឃើញ ក៏នាំគ្នាដើររកចេញពីភូមិទៅទិសខាងជើងមានចម្ងាយប្រហែល៤០០ម៉ែត្រ ។
តាមប្រភពដដែលបានបន្តទៀតថា ពេលពួកគាត់ដើររកជនរងគ្រោះតាមផ្លូវលំក៏បានជួបក្មេងប្រុស២នាក់មិនស្គាល់ឈ្មោះប្រាប់ថា ពួកគេបានប្រទះឃើញមនុស្សចង.កនៅលើដើមកាស្យា ពេលឮដូច្នេះពួកគាត់ក៏សួរក្មេងប្រុសនោះថា នៅឯណា? ក្មេងប្រុសនោះចង្អុលប្រាប់ ហើយក៏ពួកគាត់នាំគ្នាដើរទៅរកតាមការចង្អុលរបស់ក្មេងៗ ស្រាប់តែប្រទះឃើញជនរងគ្រោះយកខ្សែស្មាច់ចងកភ្ជាប់នឹងមែកដើមកាស្យា ដែលមានកម្ពស់ផុតពីដីប្រហែលជាង២ម៉ែត្រស្លាប់បាត់ទៅហើយ រួចពួកគាត់ក៏បាននាំគ្នាប្រញាប់ទៅប្រាប់មេជាងនៅឯភូមិវិញ និងរាយការណ៍ប្រាប់សមត្ថកិច្ចដើម្បីឱ្យចុះពិនិត្យកន្លែងកើតហេតុ ។
តាមប្រភពពីមិត្តរួមការងារជាមួយជនរងគ្រោះបានបញ្ជាក់ថា ជនរងគ្រោះជាមនុស្សស្លូតបូតណាស់ ពុំដែលមានរឿងរ៉ាវអ្វីជាមួយនឹងពួកគាត់ទេ គិតតែពីធ្វើការងារ ហើយពួកគាត់ក៏មិននឹកស្មានថាជនរងគ្រោះបែរជាទៅចងកសម្លាប់ខ្លួនយ៉ាងដូច្នេះសោះ ។
បន្ទាប់ពីទទួលបានព័ត៌មានខាងលើភ្លាម កម្លាំងជំនាញបានសហការជាមួយប៉ុស្តិ៍រដ្ឋបាល និងក្រុមប្រឹក្សាឃុំមេភូមិ ចុះទៅដល់ទីកន្លែងកើតហេតុដើម្បីពិនិត្យទីកន្លែងកើតហេតុ និងសពជនរងគ្រោះ រកឃើញមានស្នាមទ្រុឌពណ៌ក្រម៉ៅព័ទ្ធជុំវិញ.ក ក្រៅពីនេះនៅលើខ្លួនជនរងគ្រោះរកពុំមានស្លាកស្នាមអ្វីគួរឱ្យកត់សម្គាល់ឡើយ ទើបសមត្ថកិច្ចធ្វើការសន្និដ្ឋានថា ជនរងគ្រោះស្លាប់ដោយសារចងកពិតប្រាកដមែន និងបានប្រគល់សពជនរងគ្រោះជូនសាច់ញាតិដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ