រាជធានីភ្នំពេញ ៖ ក្រុមគ្រូបង្រៀនចំនួន១១នាក់ កាលពីព្រឹកថ្ងៃទី១៦ ឧសភា បាននាំគ្នាទៅកាន់សាលាដំបូងរាជធានីភ្នំពេញ ដើម្បីដាក់ពាក្យបណ្តឹងប្រឆាំងនឹងការសម្រេចរបស់ចៅក្រមសាលាដំបូងរាជធានីភ្នំពេញ ដោយបានបញ្ជាក់ប្រាប់ប្រធានតុលាការសុំប្តឹងឧទ្ធរណ៍លើសាលក្រមរដ្ឋប្បវេណីលេខ៤៧២ «ត»ចុះថ្ងៃទី២២ មេសា ឆ្នាំ២០១៩ របស់សាលាដំបូងរាជធានីភ្នំពេញ ត្រង់សេចក្តីសម្រេចទាំងមូល។
ក្នុងចំណោមលោកគ្រូអ្នកគ្រូចំនួន១១នាក់ ដែលដាក់ជូនលោកប្រធានសាលាដំបូងរាជធានីភ្នំពេញ ត្រូវបានលោករ៉ុង ឈុន បានបញ្ជាក់ថា «សូមលោកប្រធានមេត្តាបញ្ជូនសំណុំរឿងនេះ ឲ្យសាលាឧទ្ធរណ៍រកយុត្តិធម៌ជូនខ្ញុំបាទដោយអនុគ្រោះ» ។ លោករ៉ុង ឈុនបានបន្តថា លោកកើតទុក្ខមិនសុខចិត្តនឹងសេចក្តីសម្រេចក្នុងសាលក្រមរដ្ឋប្បវេណីខាងលើនេះ ដែលសាលាដំបូងរាជធានី បានលើកចោលពាក្យបណ្តឹងរបស់ក្រុមគ្រូបង្រៀនចំនួន១១នាក់ចុះថ្ងៃទី១៦ មករា ឆ្នាំ២០១៩ ដែលបានប្តឹងចូលសាលាដំបូងរាជធានី ស្នើសុំឲ្យតុលាការលុបចោលការសម្រេចរបស់ក្រសួងអប់រំ យុវជននិងកីឡា តំណាងដោយឯកឧត្តម បណ្ឌិត សភាចារ្យហង់ ជួបណារ៉ុន សម្រេចលុបក្របខណ្ឌពួកគាត់ ។
សូមបញ្ជាក់ថា លោករស់ ពិសិដ្ឋ ចៅក្រមសាលាដំបូងរាជធានីភ្នំពេញ កាលពីថ្ងៃទី២២ មេសា ឆ្នាំ២០១៩បានចេញសាលក្រមសម្រេចលើកចោលពាក្យបណ្តឹងចុះថ្ងៃទី១៦ មករា ឆ្នាំ២០១៩ ដែលសុំបដិសេធចោលប្រកាសស្តីពីការលុបឈ្មោះបុគ្គលិកអប់រំលេខ១១៩អយក.ប្រក,លេខ១២០អយក.ប្រក រហូតដល់លេខ១៦០អយក.ប្រក ចុះថ្ងៃទី៣០ខែមករាឆ្នាំ២០១៨របស់ដើមចោទ(ក្រុមគ្រូបង្រៀនចំនួន១១នាក់) ក្រុមគ្រូបង្រៀនដែលក្រសួងអប់លុបឈ្មោះនិងបានប្តឹងឧទ្ធរណ៍រួមមាន,.លោក រ៉ុង ឈុន, លោកស្រីវង វុន្នី,លោកគង់ ស៊ីវង្ស,លោកជុំ ចាន់,លោកហុង សុជា,លោកយិន ឈូករ័ត្ន,លោកខែម ស៊ីថា,លោកលី ខី,លោកមុត មណ្ឌ,លោកពៀក ម៉ាប់ និងលោកច័ន្ទ សុភាព ៕
ចែករំលែកព័តមាននេះ