រាជធានីភ្នំពេញ៖ អតីតតារាសម្តែងលោកស៊ុក សុភា បានចាកចេញពីស្រុកកំណើតទៅរស់នៅដែនកោះអូស្ត្រាលីច្រើនឆ្នាំមកហើយ ។ តើជីវិតរបស់លោកនៅទីនោះក្នុងស្ថានភាពបែបណា ?
រហូតមកទល់ពេលនេះជិត១០ឆ្នាំហើយអតីតតួឯកនេនទុំលោកស៊ុក សុភា បានឃ្លាតចេញពីស្រុកកំណើតដែលធ្លាប់ល្បីឈ្មោះទៅសាងជីវិតគូជាមួយអ្នកនាងសារីណា ជានារីមេម៉ាយមានកូន ។ អ្នកទាំង២ស្រឡាញ់គ្នា និងរស់នៅសុខសាន្តលើទឹកដីអូស្ត្រាលី ។ ស៊ុក សុភា បើទោះជាលោករស់នៅឆ្ងាយស្រុកក៏ពិតមែន តែកេរ្តិ៍ឈ្មោះរបស់លោកក្នុងពិភពសិល្បៈនៅតែមានការចងចាំ ព្រោះលោកមានស្នាដៃច្រើន ។ លោកសម្តែងភាពយន្ត និងបទចម្រៀងខារ៉ាអូខេឲ្យផលិតកម្មក្នុងនិងក្រៅស្រុកជាច្រើន ។
ចំណែកភរិយារបស់លោកស៊ុក សុភា អ្នកនាងសារីណាវិញ ធ្លាប់ដើរតួក្នុងបទចម្រៀងខារ៉ាអូខេឲ្យផលិតកម្មក្នុងស្រុកមួយដែលជារបស់លោកហ្វៃ សំអាង ក្នុងបទចម្រៀងរបស់អ្នកនាងម៉េង កែវពេជ្ជតា ។ ដូចនេះទាំង២នាក់ប្តីប្រពន្ឋគឺមានបទពិសោធសិល្បៈដូចគ្នា ។
កាលពីពេល ថ្មីៗកន្លងមកមានប្រភពឲ្យដឹងថាលោកស៊ុក សុភា និងភរិយាសារីណា នឹងចេញពីប្រទេសអូស្ត្រាលីទៅកាន់ប្រទេសញូវហ្សឺឡែន ចូលរួមសម្តែងនៅចុងខែឧសភានេះ ។ដំណឹងនេះធ្វើឲ្យមានការចាប់អារម្មណ៍ខ្លាំងព្រោះតាំងពីទៅនៅអូស្ត្រាលីមកលោកសុភា មិនដែលច្រៀងរាំទេក្រៅពីចូលរួមលើកទឹកចិត្តសិល្បករដែលចេញពីក្នុងស្រុកទៅសម្តែង ។ ចាត់ទុកជារឿងពិសេសមួយដែលលោកស៊ុក សុភា និងភរិយា ចូលរួមសម្តែងជូនជនរួមជាតិខ្មែររស់នៅញូវហ្សឺឡែនទស្សនា ។
រយៈពេល១ខែលោកស៊ុក សុភា ទទួលសម្តែងដោយសហការរួមសម្តែងជាមួយតារាមួយចំនួនទៀតចេញពីកម្ពុជា ។ ដូចនេះគេរំពឹងថាលោកស៊ុក សុភា នៅតែមានការគាំទ្រពេញនិយមស្របពេលដែលឈ្មោះរបស់លោកនៅតែមានការទទួលស្គាល់ពីទស្សនិកជន ។
ស៊ុក សុភា និងភរិយាទោះនៅឆ្ងាយពីមាតុភូមិ តែអ្នកទាំង២មានទឹកចិត្ត ចូលរួមក្នុងកម្មវិធីសប្បុរសធម៌ជួយសង្គមនៅលើទឹកដីស្រុកកំណើតជា រឿយៗ ។ លោក និងភរិយារមែងផ្ញើប្រាក់ជួយសិល្បករចាស់ជរា ឬសិល្បៈមានបញ្ហាដើម្បីចែករំលែកការស្រឡាញ់ក្នុងនាមសិល្បៈដូចគ្នា ៕
ចែករំលែកព័តមាននេះ