រាជធានីភ្នំពេញ ៖ ប្រជាពលរដ្ឋជាង៣០នាក់ បានលើកគ្នាទៅសាលាខណ្ឌព្រែកព្នៅ បន្ទាប់ពីអាជ្ញាធរប្រើកម្លាំងចុះទៅលើកទំនប់ព័ទ្ធផ្ទៃបឹងសំរោង ដែលជាការអនុវត្តតាមអនុក្រឹត្យរបស់រាជរដ្ឋាភិបាល និងបានឃាត់ខ្លួនអ្នកតវ៉ាម្នាក់ ។ ហេតុការណ៍នេះ បង្កឱ្យមានការភ្ញាក់ផ្អើលឡើងកាលពីវេលាម៉ោង១២ថ្ងៃត្រង់ថ្ងៃទី១៥ខែឧសភា នៅភូមិសំរោងខាងត្បូង សង្កាត់សំរោង ខណ្ឌព្រែកព្នៅ ក្រោមការស្រែកទ្រហ៊ោយំរបស់ប្រជាពលរដ្ឋដែលបានកាន់កាប់និងអាស្រ័យផលលើដីនោះ ។
តាមអ្នកតវ៉ានិយាយថា ពលរដ្ឋចំនួន៧គ្រួសារបានកាន់កាប់និងអាស្រ័យផលលើផ្ទៃដីជាង២ហិកតា ក្នុងចំណោមដីរាប់រយហិកតា ដែលរងផលប៉ះពាល់ លើផ្ទៃបឹងសំរោងនេះ ។ ថ្មីៗនេះ អាជ្ញាធរខណ្ឌព្រែកព្នៅបានយកគ្រឿងចក្រដែលការពារដោយកងកម្លាំងប្រដាប់អាវុធទៅឈូសឆាយ ដោយអះអាងថាកាយ
ដីធ្វើជាទំនប់និងជាព្រំព័ទ្ធផ្ទៃបឹងសំរោងតាមការកំណត់របស់អនុក្រឹត្យ ។
នៅក្នុងការកាយដីដោយពុំមានដំណោះស្រាយបែបនេះ ពួកគាត់ក៏បាននាំគ្នាតវ៉ាជាបន្តបន្ទាប់ ។ លុះនៅវេលាថ្ងៃត្រង់ ខណៈពួកគាត់មួយចំនួននាំគ្នាទៅហូបបាយ ស្រាប់តែអាជ្ញាធរបានប្រើកងកម្លាំងនិងគ្រឿងចុះទៅកាយរំលោភយកដីរបស់ពួកគាត់តែម្តង ។
តាមព័ត៌មានឱ្យដឹងទៀតថា ខណៈនោះម្តាយរបស់ឈ្មោះ យ៉ន គឹមយ៉ុន បានស្ទុះទៅរារាំងនិងរត់ចូលសំដៅគ្រឿងចក្រ ហើយឈ្មោះ យ៉ន គឹមយ៉ុន រត់ទៅជួយម្តាយក៏ត្រូវកម្លាំង សណ្តាប់ខណ្ឌ និងនគរបាលនាំគ្នាចាប់ក្រៀក រួចអូសយកទៅដាក់ម៉ូតូដឹកយកទៅសាលាខណ្ឌព្រែកព្នៅ ។
ដោយសារមានការចាប់ខ្លួនអ្នកតវ៉ានេះហើយ ទើបពួកគាត់លើកគ្នាទៅសាលាខណ្ឌ ដើម្បីទាមទារឱ្យដោះលែងមកវិញ ។ប្រជាពលរដ្ឋនិយាយទៀតថា ពួកគាត់មិនជំទាស់នឹងការស្តារបឹងនេះទេ តែសូមឲ្យមានការដោះស្រាយ ព្រោះពួកគាត់បានកាន់កាប់ដីនេះតាំងតែពីឆ្នាំ១៩៩០មុនចេញអនុក្រឹត្យរបស់រាជរដ្ឋាភិបាលទៅទៀត ។
ក្រុមប្រជាពលរដ្ឋបញ្ជាក់ថា ការបោះព្រំស្តារបឹងសំរោង បានប៉ះពាល់ជាន់លើដីប្រជាពលរដ្ឋជាច្រើន ដែលក្នុងនោះបើដីរបស់ក្រុមហ៊ុននិងអ្នកមានមុខមាត់ ត្រូវបានគេដោះស្រាយកាត់ឃ្វៀលចេញអស់ហើយដូចជា ដីរបស់ក្រុមហ៊ុន ម៉ែន សារុន ក្រុមហ៊ុនតេលា និងដីលោកជឹម សារ៉េត ់ប្រធាននាយកដ្ឋានមួយនៃក្រសួងសេដ្ឋកិច្ច និងហិរញ្ញាវត្ថុ ព្រមទាំងដីមួយចំនួនទៀត ។
ចំណែកដីរបស់ពួកគាត់ ត្រូវបានអាជ្ញាធរយកគ្រឿងចក្ររំលោភយក ។ លោក ស៊ឹម សុផង់ នាយករដ្ឋបាលសាលាខណ្ឌព្រែកព្នៅ និយាយថា ការប្រើគ្រឿងចក្រស្តារបឹងសំរោង គឺអាជ្ញាធរធ្វើឡើងតាមការណែនាំរបស់សាលារាជធានីភ្នំពេញ ធ្វើយ៉ាងណា ស្តារផ្ទៃបឹងឡើងវិញឱ្យហើយនៅក្នុងរដូវប្រាំងនេះ ស្របតាមផែនការគ្រោងទុក ។
លោកនាយករដ្ឋបាលឱ្យដឹងទៀតថា នៅពេលអាជ្ញាធរចុះកាយដីនេះ ប្រជាពលរដ្ឋអាស្រ័យផលក៏នាំគ្នាតវ៉ារារាំង ហើយត្រូវបានកម្លាំងសមត្ថកិច្ចឃាត់ខ្លួនចេញពីគ្រឿងចក្រ បញ្ជូន មកកាន់សាលាខណ្ឌ ធ្វើកិច្ចសន្យាអប់រំហើយដោះលែងឱ្យត្រឡប់ទៅផ្ទះវិញ ។គួរបញ្ជាក់ថា ផ្ទៃបឹងសំរោងដែលបានកំណត់
ដោយអនុក្រឹត្យទុកជាសម្បត្តិសាធារណៈរបស់រដ្ឋមានទំហំ៣៣៦ហិកតា ។
ទន្ទឹមនឹងអនុក្រឹត្យនេះ បឹងសំរោងដែលជាបឹងធម្មជាតិត្រូវបានប្រជាពលរដ្ឋ និងភាគច្រើនអ្នកមានអំណាច និងមានលុយ នាំគ្នាទៅបោះបង្គោលរំលោភយកស្ទើរអស់ទៅហើយ ។ លុះក្រោយមក សាលារាជធានីភ្នំពេញ បង្កើតគណៈកម្មការមួយចុះទៅវាស់វែងកំណត់ផ្ទៃបឹង និងបោះបង្គោលកំណត់ព្រំដឹបឹងទៅតាមអនុក្រឹត្យរបស់រាជរដ្ឋាភិបាលហើយពេលនេះក៏បានប្រើគ្រឿងចក្រទៅកាយដីលើកជាទំនប់ការពារផ្ទៃបឹង និងត្រូវបានប្រជា ពលរដ្ឋផ្ទុះការតវ៉ាជាបន្តបន្ទាប់ ៕
ចែករំលែកព័តមាននេះ