រាជធានីភ្នំពេញ ៖ កំពតជាខេត្តមួយស្ថិតនៅប៉ែកនិរតីនៃប្រទេសកម្ពុជា និងជាខេត្តស្ថិតនៅជាប់មាត់សមុទ្រ ដែលមានអំណោយផលល្អសម្រាប់វិស័យទេសចរណ៍ និងកសិកម្ម ហើយសម្រាប់វិស័យកសិកម្ម គេសង្កេតឃើញថា មានដំណាំកសិកម្មមួយចំនួនត្រូវបានទទួលស្គាល់ទាំងក្នុងស្រុក រហូតដល់ទីផ្សារអន្តរជាតិ ជាក់ស្ដែងម្រេចកំពត ត្រូវបានសហភាពអឺរ៉ុបចុះបញ្ជីការពារ ដែលធ្វើអោយផលិតផលនេះកាន់តែមានទីផ្សារល្អនៅអឺរ៉ុប ។
ថ្មីៗនេះទៀតសោត ដំណាំចេកអំបូងលឿងក៏ត្រូវបានប្រទេសចិនយល់ព្រមអោយនាំចេញទៅកាន់ទីផ្សារចិនដោយផ្ទាល់ លែងពឹងលើទីផ្សារវៀតណាម និងថៃទៀតហើយ ហើយចេកអំបូងនេះដែរ ក៏ត្រូវបានដាំ នៅក្នុងទឹកដីខេត្តកំពតដែរ ។ ក្រៅពីចេក និងម្រេច ទុរ៉េនកំពត ក៏ត្រូវបានជាប់ឈ្មោះជាផលិតផលល្បីមួយសម្រាប់ប្រជាពលរដ្ឋទូទាំងប្រទេសកម្ពុជាផងដែរ ។
តើអ្វីដែលធ្វើអោយកំពតមានផលិតផលល្បីៗច្រើនបែបនេះ ? បើតាមលោក ជាវ តាយ អភិបាលនៃគណៈអភិបាលខេត្តកំពត បានមានប្រសាសន៍ថា កំពតជាទីតាំងភូមិសាស្ត្រមួយល្អប្រសើរ និងអំណោយផលចំពោះដំណាំនាំចេញមួយចំនួន និងទទួលបានការគាំទ្រពីទីផ្សារអន្តរជាតិផងដែរ ក្នុងនោះដែរ ម្រេចកំពតត្រូវបានល្បីសុះសាយទាំងក្នុងនិងក្រៅប្រទេស ហើយក៏ទទួលបានការចុះបញ្ជីការពារម៉ាកជាផលិតផលសម្គាល់ភូមិសាស្ត្រ នៅសហភាពអឺរ៉ុប ដែលធ្វើអោយផលិតផលនៃកាន់តែមានទីផ្សារ និងតម្រូវការខ្ពស់នៅអន្តរជាតិ ។ ក្រៅពីដំណាំម្រេច ក៏មានដំណាំទុរ៉េន ដែលជាផលិតផលតំណាងអោយខេត្តកំពត ហើយជាផលិតផលទទួលស្គាល់ថាមានរស់ជាតិឆ្ងាញ់ពីសំណាក់ប្រជាពលរដ្ឋកម្ពុជា ទូទាំងប្រទេសផងដែរ ។
ក៏ប៉ុន្តែផលិតផលនេះ មិនទាន់មានក្រុម ហ៊ុនឬវិនិយោគិនណាបណ្ដាក់ទុនវិនិយោគជាទ្រង់ទ្រាយធំនៅឡើយ ពោលដំណាំទុរ៉េន សព្វថ្ងៃ គឺដាំតែលក្ខណៈគ្រួសារប៉ុណ្ណោះ ។ លោកអភិបាលខេត្តកំពត ក៏បានស្នើអោយវិនិយោគិន ដាក់ទុនវិនិយោគលើដំណាំទុរ៉េន ជាលក្ខណៈទ្រង់ទ្រាយធំ ដើម្បីផ្គត់ផ្គង់លើទីផ្សារ ខណៈតម្រូវការពីមួយឆ្នាំទៅមួយឆ្នាំ មានកាន់តែច្រើន និងអាចឈានទៅដល់ ការនាំចេញទៅកាន់ប្រទេសមានតម្រូវការដំណាំនេះផងដែរ ។
លោកបានមានប្រសាសន៍បន្តថា « កំពតជាទឹកដីនៅជាប់មាត់សមុទ្រ ដូច្នេះហើយដំណាំនានា ក៏បានទទួលជំនោរខ្យល់ពីសមុទ្រ បូករួមជាមួយនឹងជីវជាតិដីក៏ល្អប្រសើរផងដែរនោះ ទើបធ្វើអោយដំណាំ នានា ដូចជាម្រេច ទុរ៉េន ចេក និងស្វាយជាដើមមានរស់ជាតិឆ្ងាញ់ និងមានគុណភាពខ្ពស់ »។
ចំណែកលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ផងដែរថា ខេត្តកំពត ក៏ជាសមរភូមិដ៏ក្ដៅគគុកមួយ នៅអំឡុងឆ្នាំ៩០ប្លាយ ហើយតំបន់មួយចំនួននៅក្នុងខេត្តកំពតក៏សំបូរទៅដោយគ្រាប់មីនផងដែរ ។ ប៉ុន្តែបច្ចុប្បន្ននេះ តំបន់សមរភូមិចុងក្រោយមួយនេះ ក៏បានប្រែក្លាយទៅជាចំការម្រេច ចំការទុរ៉េន ចំការចេក ដ៏ស្រស់បំព្រងផងដែរ ។ លោកបន្តថា ក្នុងឆ្នាំ ២០១៨កន្លងទៅនេះ កម្ពុជាបាននាំចេញផលិតផលកសិកម្មសរុបប្រមាណ៤លាន៣សែនតោនជាផ្លូវការ ហើយបើគិតទាំងផលិតផលដែលនាំចេញតាមច្រកតូចៗផ្សេងទៀត នៅព្រំដែនគោក សរុបក្នុងមួយឆ្នាំៗ មានមិនតិចជាង៧លានតោននោះទេ ខណៈកម្ពុជាអាចផលិត ផលិតផលកសិផលបានប្រមាណ៣០លានតោនក្នុងមួយឆ្នាំៗ ។
ដោយឡែកមន្ត្រីនៃអង្គការសេដាកមួយរូបសុំមិនបញ្ចេញឈ្មោះ ដោយសារតែខ្លួនមិនមែនជាអ្នកនាំពាក្យនៅអង្គភាពនោះ បាននិយាយប្រាប់ថា ការអភិវឌ្ឍវិស័យកសិកម្ម បើចង់ឲ្យរីកចម្រើនគឺត្រូវមានទីផ្សារជាមុនសិន បន្ទាប់មកត្រូវពង្រឹងគុណភាពផលិតផលទាំងនោះឲ្យល្អប្រសើរ ដោយមិនប្រើសារធាតុគីមីហាមឃាត់លើដំណាំ ។ ហើយបើសិនជាកសិករនៅតែប្រើថ្នាំគីមីហាមឃាត់លើដំណាំ នោះនឹងវាធ្វើអោយទីផ្សារកាន់តែបាត់បង់ ថែមទាំងធ្វើអោយប៉ះពាល់ដល់អ្នកដាំនិងអ្នកបរិភោគផងដែរ ។
គួរបញ្ជាក់ថាក្រៅពីដំណាំកសិកម្ម ខេត្តកំពតក៏មានកន្លែងផលិតអំបិល និងត្រូវបានទទួលស្គាល់ពីផ្សារអន្តរជាតិផងដែរ ជាក់ស្ដែងកាលពីមុនប៉ុន្មានថ្ងៃមុននេះ អំបិលដែលផលិតចេញពីខេត្តកំពតក៏បាននាំចេញជាផ្លូវការទៅកាន់ប្រទេសបារាំងក្នុងបរិមាណប្រមាណ១០០តោនផងដែរ ដោយបារាំងបានផ្ដល់គុណប្រយោជន៍ខ្ពស់លើគុណភាពអំបិលធម្មជាតិផលិតនៅក្នុងខេត្តកំពត ៕
ចែករំលែកព័តមាននេះ