ខេត្តសៀមរាប ៖ ពលរដ្ឋនាំគ្នានិយាយថា ផ្លូវសំខាន់ៗមួយចំនួនក្នុងខេត្តមួយនេះហាក់រងការខូចខាតយ៉ាងដំណំអស់ជាច្រើនឆ្នាំមកហើយ មិនឃើញមានអាជ្ញាធរពាក់ព័ន្ធខាងណាមួយមានវិធានការឱ្យមានប្រសិទ្ធភាព ក្នុងការថែទាំផ្លូវទាំងនេះសោះឡើយ ។ ពួកគាត់មើលឃើញទៀតថា ជញ្ជីងថ្លឹង រថយន្តរបស់មន្ទីរសាធារណការនិងដឹកជញ្ជូនខេត្តបានដាក់ដល់ទៅ២កន្លែង គឺក្នុងស្រុកពួក១ និងស្រុកប្រាសាទបាគង
១ សម្រាប់ត្រួតពិនិត្យរថយន្តដឹកលើសទម្ងន់ដែលដឹកឆ្លងកាត់តាមដងផ្លូវជាតិលេខ៦ ។
ជុំវិញករណីខាងលើនេះ មហាជនងឿងឆ្ងល់ថា ហេតុអ្វីបានជារៀងរាល់ថ្ងៃគេឃើញមានរថយន្តធុនធំទ្រុងវែងៗ ដឹកឈើឆ្លងកាត់ជញ្ជីងទាំង២កន្លែងខាងលើយ៉ាងរំភើយដោយគ្មានការត្រួតពិនិត្យ ។ ក្នុងនោះ ក៏គេមិនដែលឃើញមន្ត្រីឈរជើងនៅទីនោះកាក់ទម្លាក់អីវ៉ាន់ដែលដឹកលើសទម្ងន់ចេញទេ ។ គេសង្ស័យថា ទង្វើបែបនេះអាចជាអំពើពុករលួយដែលមានការឃុបឃិតគ្នាទទួលលុយសំណូកជាថ្នូរនឹងការមិនបង្ក្រាប ។ មន្ត្រីមួយចំនួនអាចប្រព្រឹត្តបែបនេះ ទើបបានជាផ្លូវសំខាន់ៗមួយចំនួនក្នុងខេត្តសៀមរាប ដែលជាខេត្តមាន
សក្តានុពលខាងទេសចរណ៍រងការខួចខាតយ៉ាងដំណំបែបនេះ ។
មហាជនបានបន្ថែមថា អស់រយៈពេលជាច្រើនឆ្នាំនិងជាច្រើនអាណត្តិមកហើយ ដែលខេត្តសៀមរាបបានប្រែមុខមាត់ថ្មី និងមានហេដ្ឋារចនាសម្ព័ន្ធស្អាតៗជាច្រើន ។ ប៉ុន្តែបញ្ហាស្មុគស្មាញច្រើនហាក់គ្មានដំណោះស្រាយសោះ ព្រោះតែលូក៏ស្ទះ ផ្លូវក៏ខូច ធ្វើឱ្យពលរដ្ឋខឹងសម្បា តែបើផ្លូវធ្វើរួចឃើញតែកាយដាក់លូ និងកាយបង្កប់ខ្សែភ្លើងឥតឈប់ឈរ ហើយផ្លូវក៏ខូចទៅវិញ ។ មហាជនសំណូមពរទៅលោកអភិបាលខេត្តសូមជួយពិនិត្យមើលរថយន្តធុនធំៗដែលធ្វើឱ្យខូចផ្លូវ ហើយគួរមានវិធានការចំពោះមន្ត្រីខិលខូចខ្លះដែលប្រព្រឹត្តអំពើពុករលួយផង ។
ទាក់ទិននឹងករណីខាងលើនេះ លោក គឹម ប៊ុណ្ណា ប្រធានមន្ទីរសាធារណការនិងដឹកជញ្ជូនខេត្ត មិនអាចទាក់ទងសុំការពន្យល់បានទេ នៅព្រឹកថ្ងៃទី១៤ ខែឧសភា ដោយសារការហៅទូរស័ព្ទចូលតែគ្មានអ្នកលើកទទួល ។ ទោះជាយ៉ាងណាសង្ឃឹមថា លោកអភិបាលខេត្តនឹងមានវិធានការចំពោះកង្វល់របស់មហាជនពីបញ្ហាផ្លូវដែលខូចនេះជាពុំខាន ៕
ចែករំលែកព័តមាននេះ