ខេត្តកំពង់ឆ្នាំង ៖ ជាអកុសល រថយន្តឡិចស៊ីសRX300មួយគ្រឿង បើកជ្រុលធ្លាក់ផ្លូវក្រឡាប់ជាច្រើនត្រឡប់ ក៏បណ្តាលស្លាប់ក្មេងអាយុ៣ឆ្នាំម្នាក់ និងមនុស្ស៥នាក់ទៀតជិះក្នុងរថយន្ត បានរងរបួសធ្ងន់-ស្រាល ខណៈបើកមកដល់ចំណុចផ្លូវកោងហើយរថយន្ត នៅតែមានល្បឿនលឿនពេកនោះ ។ អ្នកបើកបរមិនបានស្គាល់ភូមិសាស្ត្រទេ ក្រោយកើតហេតុ ត្រូវក្រុមគ្រួសារបានបញ្ជូនសពក្មេងរងគ្រោះទៅធ្វើបុណ្យតាមប្រពៃណី ចំណែកអ្នករងរបួសត្រូវបានដឹកទៅសង្គ្រោះនៅមន្ទីរពេទ្យ ។
គួររំលឹកថា គ្រោះថ្នាក់ចរាចរណ៍បានកើតឡើងកាលពីវេលាម៉ោង១១និង៣០នាទីថ្ងៃត្រង់ថ្ងៃទី១០ ខែឧសភាកន្លងទៅ នៅចំណុចផ្លូវកោងក្នុងភូមិច្រណូក ឃុំច្រណូក ស្រុកកំពង់លែង ខណៈរថយន្តបើកក្នុងល្បឿនយ៉ាងលឿន ។
សមត្ថកិច្ចនគរបាលឲ្យដឹងថា រថយន្តឡិចសុីសខាងលើ ពាក់ផ្លាកលេខសៀមរាប ២B-១១៦៣ បើកបរដោយបុរសម្នាក់មិនស្គាល់ឈ្មោះ និងនៅក្នុងរថយន្តមានមនុស្សជិះ៦នាក់ ។ រថយន្តធ្វើដំណើរចេញពីខេត្តសៀមរាប មកខេត្តកំពង់ឆ្នាំង ឡើងតាមភូមិគោកព្រះមកស្រុកកំពង់លែង គោលបំណងទៅចូលរួមបុណ្យបងប្អូននៅខេត្តកំពង់ឆ្នាំង ។
គួរបញ្ជាក់ថា នេះជាលើកទី១ហើយដែលកំណាត់ផ្លូវកាត់ពីស្រុកកំពង់លែង ខេត្តកំពង់ឆ្នាំង ឡើងទៅក្រុងស្ទឹងសែន ខេត្តកំពង់ធំ មានគ្រោះថ្នាក់ចរាចរណ៍បណ្ដាលឲ្យស្លាប់មនុស្សបែបនេះ ៕
ចែករំលែកព័តមាននេះ