រាជធានីភ្នំពេញ ៖ អាជ្ញាធររាជធានីភ្នំពេញបានរៀបចំកែលម្អសោភណ័ភាពយ៉ាងស្រស់ស្អាតនៅតាមដងផ្លូវសំខាន់ៗ និងនៅតំបន់សួនច្បារមាត់ទន្លេក្នុងរាជធានីភ្នំពេញ ដើម្បីអបអរសាទរព្រះរាជពិធីបុណ្យចំរើនព្រះជន្មព្រះមហាក្សត្រ រយៈពេលបីថ្ងៃ។
នៅក្នុងឱកាសព្រះរាជពិធីបុណ្យចម្រើនព្រះជន្មព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងគម្រប់ព្រះជន្ម៦៦យាងចូល៦៧ព្រះវស្សា ចាប់ពីថ្ងៃទី១៣ ដល់ថ្ងៃទី១៥ ខែឧសភា ឆ្នាំ២០១៩នេះ ទោះបីរាជរដ្ឋាភិបាលពុំបានរៀបចំព្រឹត្តការណ៍ជាសាធារណៈអធឹកអធមក៏ដោយ ប៉ុន្តែអាជ្ញាធរនៅតែបានរៀបចំសោភណ័ភាពយ៉ាងស្រស់ស្អាតនៅតាមតំបន់សួនច្បារនានានៅក្នុងក្រុង ក្នុងនោះមានការកែលម្អសួនច្បារ បំពាក់ភ្លើងពណ៌សំអាតអនាម័យបរិស្ថាន និងការដាក់តាំងរូបព្រះឆាយ៉ាលក្ខណ៍ព្រះករុណាជាអម្ចាស់ជីវិតលើត្បូងទាំងនៅមុខព្រះបរមរាជវាំង និងតំបន់សួនច្បារនានា។
ចំណែកនៅពីមុខក្រសួងមន្ទីរស្ថាបន័រដ្ឋក៏បានរៀបចំយ៉ាងដូច្នេះដែរ ដើម្បីអបអរសាទព្រះរាជពិធីនេះឲ្យកាន់តែមានភាពអធិអធម។ រីឯនៅតាមមហាវិថីសំខាន់ៗមួយចំនួន បានដាក់បដាពាក្យស្លោកថ្វាយព្រះពរ និងមានចង់ទង់ជាតិព្រះរាជាណាចក្រកម្ពុជា នៅអមសាងខាងផ្លូវផងដែរ។ ការរៀបចំនេះបានធ្វើឡើងតាមសរាចរណែនាំរបស់រាជរដ្ឋាភិបាល ដើម្បីឲ្យព្រះរាជពិធីបុណ្យនេះមានភាពអធិកអធមសក្តិសមទៅនឹងព្រះរាជកិត្តិនាម និងព្រះរាជកិត្តិយសដ៏ខ្ពង់ខ្ពស់បំផុតរបស់ព្រះករុណាជាអម្ចាស់ជីវិតលើត្បួង។
លោកជុំ វឌ្ឍីប្រធានមន្ទីរវប្បធម៌និងវិចិត្រសិល្បៈរាជធានីភ្នំពេញបានឲ្យដឹងថា ក្រៅពីការរៀបចំសោភណ័ភាព និងអនាម័យបរិស្ថាន មន្ទីរវប្បធម៌បានរៀបចំឲ្យ មានការប្រគំតន្ត្រីសិល្បៈសម័យបុរាណនិងរបាំបុរាណប្រពៃណីអាយ៉ៃចាប៉ីដងវែង ក្នុងរយៈពេល៣ថ្ងៃនេះក្នុងតំបន់រមណីយដ្ឋានវត្តភ្នំ ដើម្បីផ្តល់ភាពសប្បាយរីករាយជូនប្រជាពលរដ្ឋនៅថ្ងៃឈប់សំរាកនេះ។
លោកបានបន្តថា កម្មវិធីកម្សាន្តសប្បាយនេះនឹងត្រូវចាប់ផ្តើមឡើងតាំងពីម៉ោង៤រសៀលដល់ ម៉ោង១០យប់ ដូច្នេះប្រជាពលរដ្ឋដែលពុំបានទៅលេងក្សាន្តនៅតំបន់ទេសចរណ៍នានានោះ សូមអញ្ចើញមកកាន់តំបន់រមណីយដ្ឋានវត្តភ្នំដើម្បីមកទទួលយកភាពសប្បាយរីករាយផង និងអបអរសាទរព្រះរាជពិធីបុណ្យចំរើនព្រះជន្មព្រះករុណាជាម្ចាស់ជីវិតលើត្បូងឲ្យកាន់តែមានភាពអធឹកអធមសប្បាយក្រៃលែង។
នៅក្នុងឱកាសដ៏មហានក្ខត្តឫក្សប្រកបដោយក្តីអភិរម្យមង្គលសោមនស្សរីករាយនៃព្រះរាជពិធីបុណ្យចំរើនព្រះជន្មព្រះករុណាជាអម្ចាស់ជីវិតលើត្បូងព្រះមហាក្សត្រនៃព្រះរាជាណាចក្រកម្ពុជានេះសមាជិកសមាជិកានៃព្រឹទ្ធសភា រដ្ឋសភា និងរាជរដ្ឋាភិបាលបានសរសេរសារលិខិតថ្វាយព្រះពរថ្វាយអង្គព្រះមហាក្សត្រជាទីសក្ការៈដ៏ខ្ពង់ខ្ពស់បំផុតផងដែរ៕
ចែករំលែកព័តមាននេះ