ខេត្តសៀមរាប ៖ អាជីវករចិញ្ចឹមក្រពើនៅក្នុងក្រុងសៀមរាបបានត្អូញត្អែរ និងអំពាវនាវដល់អាជ្ញាធរខេត្ត និងស្ថាប័នពាក់ព័ន្ធជួយពួកគាត់ផង ! ព្រោះសព្វថ្ងៃឈ្មួញកណ្តាលដែលមកទិញកូនក្រពើនិងក្រពើធំយកទៅលក់លើទីផ្សារ ឯប្រទេសវៀតណាមលក់បានតម្លៃថ្លៃ ប៉ុន្តែមកទិញក្រពើពីពួកគាត់ដោយឱ្យតម្លៃថោក ។…
ខេត្តសៀមរាប ៖ អាជីវករចិញ្ចឹមក្រពើនៅក្នុងក្រុងសៀមរាបបានត្អូញត្អែរ និងអំពាវនាវដល់អាជ្ញាធរខេត្ត និងស្ថាប័នពាក់ព័ន្ធជួយពួកគាត់ផង ! ព្រោះសព្វថ្ងៃឈ្មួញកណ្តាលដែលមកទិញកូនក្រពើនិងក្រពើធំយកទៅលក់លើទីផ្សារ ឯប្រទេសវៀតណាមលក់បានតម្លៃថ្លៃ ប៉ុន្តែមកទិញក្រពើពីពួកគាត់ដោយឱ្យតម្លៃថោក ។
អ្នកចិញ្ចឹមរៀបរាប់ថា កូនក្រពើ១ក្បាល ឈ្មួញកណ្តាលកំណត់ឱ្យតែ១១ដុល្លារ និងក្រពើធំ ក្នុង១គីឡូក្រាម តម្លៃត្រឹមតែ៣ទៅ៥ដុល្លារ ដែលតម្លៃនេះថោកជាងឆ្នាំមុន ហើយពួកគាត់ចង់សុំឱ្យអាជ្ញាធរ ឬក្រសួងពាក់ព័ន្ធជួយដល់ពួកគាត់ផង ដើម្បីសុំប័ណ្ណស្របច្បាប់ យកទៅលក់នៅប្រទេសវៀតណាមដោយខ្លួនឯង ។ពួកគាត់បានត្អូញត្អែរថា ការធ្វើប័ណ្ណម្តងៗ អស់ប្រាក់រាប់ម៉ឺនដុល្លារ ក្នុងម្នាក់ៗ ហើយនៅតែមិនបានចេញទៀតនេះក៏ជាបញ្ហាចោទដែរ ។
លោក លី ជាអាជីវករចិញ្ចឹមក្រពើមានចំនួនសរុបជាង១.០០០ក្បាល ទាំងតូចទាំងធំដែលរស់នៅភូមិវត្តបូព៌ សង្កាត់សាលាកំរើក ក្រុងសៀមរាប បានរៀបរាប់ប្រាប់កោះសន្តិភាពថា លោកចិញ្ចឹមក្រពើនេះ ជាង១០ឆ្នាំមកហើយ គឺតាំងពីឆ្នាំ២០០៨មកម្ល៉េះ ដែលកាលពី៥ឆ្នាំមុន ពួកគាត់មានចិត្តចង់ចិញ្ចឹមណាស់ ព្រោះវាបានថ្លៃ ។ លោកថា មកដល់បច្ចុប្បន្នមានឈ្មួញកណ្តាលមកប្រមូលដេញថ្លៃ ទិញពីសមាគមចិញ្ចឹមក្រពើនៅខេត្តសៀមរាបទាំងអស់ ដូច្នេះខាងសមាគម បានឱ្យពួកឈ្មួញ ប្រមូលទិញយកទៅលក់នៅវៀតណាមយ៉ាងរំភើយ អត់គិតពីការខាតបង់ឬសុខទុក្ខរបស់ពួកគាត់ឡើយ ។
លោកបានរៀបរាប់បន្តថា កូនក្រពើក្នុង១ក្បាល កាលពីប៉ុន្មានឆ្នាំមុនៗ យកទៅលក់នៅវៀតណាមខ្លួនឯងតម្លៃចាប់ពី១៥ទៅដល់១៨ដុល្លារ ។ សព្វថ្ងៃឈ្មួញកណ្តាលមកទិញកូនក្រពើក្នុង១ក្បាលបានតម្លៃតែ១០ទៅ១២ដុល្លារ ហើយក្រពើធំ គេគិតឱ្យជាគីឡូក្រាម ក្នុង១គីឡូក្រាម ពួកគេឱ្យតម្លៃបានត្រឹម៣ទៅ៥ដុល្លារ ។ លោក លី បានរៀបរាប់បន្ថែមថា ក្នុងការចិញ្ចឹមក្រពើរាល់ថ្ងៃ ពួកវាស៊ីក្នុង១ខែ២ដង ហើយ ក្រពើមេ ក្នុង១ក្បាលពងបានចាប់ពី៤០ទៅ៥០ពងក្នុង១រដូវ គឺចាប់ពីខែកុម្ភៈ ដល់ខែមេសាទើបអស់ពង ។ ចំណែកចំណីទិញពីគេ យកមកឱ្យវាស៊ីវិញ ឡើងថ្លៃទៀត ។ កាលពីមុនកូនត្រីទិញចូលក្នុង១តោន តម្លៃ១លាន៧០ម៉ឺនរៀលទៅ២លាន១០ម៉ឺនរៀល ។ ដល់ថ្ងៃបុណ្យទាន ឡើងថ្លៃក្នុង១តោនតម្លៃជិត៣លានរៀល។
ចំណែក លោក សេង ដែលជាអាជីវករចិញ្ចឹមក្រពើជាង១ពាន់ក្បាលដែរ រស់នៅភូមិស្លក្រាម សង្កាត់ស្លក្រាម ក្រុងសៀមរាប បានរៀបរាប់ប្រាប់ កោះសន្តិភាពតាមទូរស័ព្ទនៅព្រឹកថ្ងៃទី១៣ ឧសភា ឆ្នាំ២០១៩នេះថា លោកចិញ្ចឹមក្រពើជិត២០ឆ្នាំហើយ ដែលមានចំនួនជាង១.០០០ក្បាល មិនដែលត្អូញត្អែរទេ តែនៅឆ្នាំ២០១៩នេះពិតជាប្រឈមនឹងការលំបាក ព្រោះក្រពើចុះថ្លៃហួសពីការស្មាន ។ លោកបានរៀបរាប់ទៀតថា លោកគ្មានអ្វីនិយាយច្រើនទេ ក្រៅពីសូមឱ្យអាជ្ញាធរខេត្ត និងក្រសួងកសិកម្មរុក្ខាប្រមាញ់និងនេសាទជួយដល់ពួកគាត់ផង ។
ព្រោះសព្វថ្ងៃឈ្មួញកណ្តាលដែលមកទិញកូនក្រពើ និងក្រពើធំយកទៅលក់ឱ្យវៀតណាម គេឱ្យតម្លៃថោកពេក ។ ដោយសារតែប្រឈមបែបនេះទើបពួកគាត់ ចង់សុំធ្វើអាជ្ញាប័ណ្ណដោយខ្លួនឯង ដើម្បីយកក្រពើទៅលក់ឱ្យវៀតណាមដោយខ្លួនឯង ក្រែងបានថ្លៃជាងឈ្មួញកណ្តាល ។ លោកបានរៀបរាប់បន្តថា កូនក្រពើ ក្នុង១ក្បាល កាលពីឆ្នាំមុនៗយកទៅលក់នៅវៀតណាមខ្លួនឯង តម្លៃចាប់ពី១៥ទៅដល់១៨ដុល្លារ ។ សព្វថ្ងៃឈ្មួញកណ្តាលមកទិញកូនក្រពើ១ក្បាល បានតម្លៃតែ១០ទៅ១២ដុល្លារ ហើយក្រពើធំ ក្នុង១គីឡូក្រាម ពួកគេឱ្យតម្លៃបានត្រឹម៣ទៅ៥ដុល្លារប៉ុណ្ណោះ ។
រីឯអ្នកស្រី ណារី រស់នៅភូមិចុងឃ្លៀស សង្កាត់សៀមរាប ក្រុងសៀមរាប បានរៀបរាប់ប្រហាក់ប្រហែលគ្នានិងលោក សេង ដែរថា គាត់ចិញ្ចឹមក្រពើជាង៦ឆ្នាំ តាំងពីឆ្នាំ២០០៩ រហូតដល់បច្ចុប្បន្ន ។ តាំងពីនៅស្ថានីយចិញ្ចឹមក្រពើ នៅម្តុំអាងក្រពើ ក្នុងភូមិសាស្ត្រសង្កាត់សាលាកំរើកម្ល៉េះ ។ អ្នកស្រីថា ឈ្មួញកណ្តាលដែលប្រមូលទិញឱ្យតម្លៃថោក ។
ប្រឈមនឹងបញ្ហានេះអ្នកស្រីបានសំណូមពរឱ្យខ្មែរជួយខ្មែរផង ជាពិសេសខាងអាជ្ញាធរពាក់ព័ន្ធទាំងអស់ មេត្តាជួយរកដំណោះស្រាយឱ្យពួកគាត់ផង ព្រោះសព្វថ្ងៃ ពួកគាត់បានទៅចងការនៅធនាគារអេស៊ីលីដាជាង១០ម៉ឺនដុល្លារ ដើម្បីយកមកទិញចំណីឱ្យក្រពើស៊ីតាំងពីវានៅតូច រហូតដល់ធំឥឡូវចំណីត្រីដែលទិញពីគេវាក៏ឡើងថ្លៃទៀត តើឱ្យអ្នកស្រី រកស៊ីម្តេចបានចំណេញទៅ។ គាត់ថាបើតម្លៃក្រពើចុះថ្លៃដល់ថ្នាក់នេះ តើឱ្យពួកខ្ញុំ មានចិត្តឯណាចង់ចិញ្ចឹមទៀត ។
ជុំវិញករណីខាងលើ កោះសន្តិភាពមិនអាចសុំការពន្យល់ពីលោក សាយ អនុប្រធានសមាគម ក្រពើខេត្តសៀមរាបបានទេ ដោយសារគ្មានលេខទូរស័ព្ទទំនាក់ទំនង ។ មជ្ឈដ្ឋាននានាក្នុងខេត្តសៀមរាបរង់ចាំមើលថា តើអាជ្ញាធរឬស្ថាប័នពាក់ព័ន្ធអាចជួយដោះស្រាយដល់អាជីវករចិញ្ចឹមក្រពើបានកម្រិតណា?
ចែករំលែកព័តមាននេះ