ព្រះវិហារ ៖ ខណៈរដូវផ្សិតប៉ក់កំពុងមកដល់អាជីវករខ្មែរលក់ដូរនៅច្រកទ្វាអានសេះព្រំដែនកម្ពុជា-ថៃ នៃទឹកដីខេត្តព្រះវិហារ កំពុងតែផ្អែមមាត់នឹងរកបានប្រាក់ចំណូលប្រចាំថ្ងៃបានច្រើនគួរសម តាមរយៈការលក់ផ្សិតប៉ក់ ជារៀងរាល់ថ្ងៃ ក្នុងចន្លោះចាប់ពី១តោនឡើងទៅឲ្យជនជាតិថៃ សម្រាប់យកទៅធ្វើជាម្ហូបអាហារដ៏ពេញនិយមរបស់ពួកគេ ។
បើតាមប្រសាសន៍របស់អ្នកស្រី ថន ស្រីមុំ ជាអាជីវករលក់ដូរនៅក្នុងផ្សារ ច្រកទ្វារអានសេះទឹកដីកម្ពុជាបានឲ្យដឹងថា ចាប់ពីពាក់កណ្តាលខែមេសាមកដល់ពេលនេះ អាជីវករខ្មែររកស៊ីលក់ដូរនៅច្រកទ្វារអានសេះ បាននាំគ្នាប្រមូលទិញ ផ្សិតប៉ក់មកពីបណ្តាខេត្តផ្សេងៗ ដើម្បីយកមកលក់ឲ្យជនជាតិថៃ ដែលចូលមកទិញជារៀងរាល់ថ្ងៃ ក្នុងតម្លៃច្រើនគួរសម ដែលធ្វើឲ្យអាជីវករកាក់កបឡើងផ្អែមមាត់ ។
សូមបញ្ជាក់ថាផ្សិតប៉ក់នេះ នៅពេលដែលមានភ្លៀងធ្លាក់ផ្សិតនេះនឹងដុះ រហូតដល់ពេលដែលភ្លៀងធ្លាក់ជោគជាំ ទើបផ្សិតនេះឈប់ដុះ ហើយកសិករអាចដើរជីកផ្សិតនេះបានយកមកលក់ ចាប់ពីពាក់កណ្តាលខែមេសា រហូតដល់ខែកក្កដា ទើបផ្សិតនេះផុតរដូវកាលសម្រាប់ប្រមូលផល ។
អ្នកស្រី ថន ស្រីមុំ បានបន្ថែមថាក្នុងមួយថ្ងៃៗ អាជីវករ នៅក្នុងផ្សារច្រកទ្វារអានសេះនេះ អាចលក់បានចន្លោះពី២០គីឡូក្រាម ទៅ៥០គីឡូក្រាម ដោយក្នុងមួយគីឡូក្រាម ទទួលបានតម្លៃ ចាប់ពី ៤៥០បាត ទៅ៥០០បាត (ប្រមាណជា ៥៧,០០០ ទៅ ៦៣,០០០ រៀល) ទៅតាមគុណភាពផ្សិត ហើយអាចឲ្យអាជីវកររកប្រាក់ចំណូលបានក្នុងមួយថ្ងៃ ចន្លោះពី ២០០០ បាត ទៅ ៥០០០ ពាន់បាត ដែរ (ប្រមាណពី ២៥ម៉ឺនរៀល ដល់ជាង ៦៣ ម៉ឺនរៀល) ។ ក្នុងរដូវកាលនេះផងដែរ ក្រៅពីផ្សិតប៉ក់ ដែលដុះដោយធម្មជាតិនោះ អាជីវករខ្មែរ ក៏មានបន្លែព្រៃជាច្រើនមុខទៀតដូចជា ផ្កាចាហ៊ួយ ស្លឹកព្រិច ជាដើម ពោលគឺអាជីវករនៅទីនោះ លក់បន្លែព្រៃទៅតាមរដូវនីមួយៗ ហើយបន្លែទាំងអស់នេះជាអាហារដ៏ពេញនិយមបំផុតរបស់ជនជាតិថៃ ។
ជាមួយគ្នានេះជនជាតិថៃម្នាក់ដែលបានចូលមកទិញបន្លែ និងទំនិញផ្សេងៗនៅទឹកដីកម្ពុជាក្នុងផ្សារច្រកទ្វាអានសេះនេះ បានលើកឡើងថាមូលហេតុដែលពួកគេបាននាំគ្នាមកទិញផ្សិតប៉ក់ ក៏ដូចជាបន្លែព្រៃផ្សេងៗនេះពីអាជីវករខ្មែរដោយសារតែនៅក្នុងទឹកដីថៃ ពុំសូវមាន បន្លែប្រភេទទាំងអស់នេះទេ ម្យ៉ាងវិញទៀតនៅក្នុងព្រៃទឹកដីរបស់ពួកគេសម្បូរគ្រាប់មីន ដូច្នេះហើយទើបពុំមាននរណាម្នាក់ ចូលទៅរកបន្លែ ទាំងនេះយកមកលក់ ។
សូមបញ្ជាក់ថា បើទោះបីជាច្រកទ្វាអានសេះនេះមិនទាន់ក្លាយជាច្រកអន្តរជាតិក្តី តែការផ្តោះប្តូរទំនិញរវាងប្រជាជនទាំងពីរ កម្ពុជា-ថៃ បានធ្វើឡើងជារៀងរាល់ថ្ងៃ ប៉ុន្តែភ្ញៀវដែលមកលេងកម្សាន្តច្រើនមាននៅក្នុងថ្ងៃអង្គារ និងថ្ងៃព្រហស្បត្តិ៍ ៕
ចែករំលែកព័តមាននេះ