រាជធានីភ្នំពេញ ៖ ខណៈថាមពលអគ្គិសនី នៅក្នុងប្រទេសកម្ពុជាកំពុងមានបញ្ហាប្រឈមដូចបច្ចុប្បន្ននេះ វិនិយោគិនក្នុងវិស័យសំណង់បានលើកឡើថា វានឹងមានបញ្ហាសម្រាប់វិស័យសំណង់ បើសិនជាបញ្ហានេះ នៅតែអូសបន្លាយយូរ ពីព្រោះរាល់ការងារក្នុងការអភិវឌ្ឍវិស័យសំណង់គឺត្រូវការថាមពលអគ្គសិនីជាចាំបាច់ ។
លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA បានឲ្យដឹងថាជាការពិតណាស់ បញ្ហារអាក់រអួលថាមពលអគ្គិសនី វានឹងប៉ះពាល់ដល់ការអភិវឌ្ឍវិស័យសំណង់ និងវិស័យអចលនទ្រព្យទាំងមូលផងដែរ ។ នៅក្នុងការអភិវឌ្ឍវិស័យសំណង់ ជាចាំបាច់ត្រូវការថាមពលអគ្គិសនី ដើម្បីដំណើរការសាង់សង់ចាប់តាំងពីបុកគ្រឹះ ខួងសរសរ រហូតដល់ចុងបញ្ចប់នៃការសាងសង់ ដូច្នេះបើសិនជាមានបញ្ហារអាក់រអួលថាមពល អ្នកសាងសង់ត្រូវការបញ្ចេះម៉ាស៊ីន ដើម្បីដំណើរការ ដែលទាមទារអោយពួកគេត្រូវ ការចំណាយថ្លៃទិញម៉ាស៊ីនភ្លើងមកទុកប្រើប្រាស់នៅពេលដាច់ភ្លើង និងត្រូវចំណាយថ្លៃលើប្រេងឥន្ធនៈផងដែរ ។
លោកឧកញ៉ាបន្តថា អ្នកវិនិយោគគេប្រាកដជាស៊ើបសួរមុននឹងចូលទៅកាន់ប្រទេសណាមួយ ថាតើប្រទេសនោះមានថាមពលគ្រប់គ្រាន់សម្រាប់អោយគេវិនិយោគឬនៅ ហើយនៅពេលដែលដឹងថាប្រទេសនោះមានបញ្ហាថាមពលធ្ងន់ធ្ងរគេប្រាកដជាដកខ្លួន និងរកប្រទេសណាដែលមានថាមពលគ្រប់គ្រាន់ក្នុងការបណ្ដាក់ទុនវិនិយោគគម្រោងណាមួយរបស់ពួកគេ ។
លោកនួន រឹទ្ធី បន្តថា «សម្រាប់កម្ពុជា បញ្ហារអាក់រអួលផ្នែកថាមពលអគ្គិសនីនេះ មិនមែនកើតមានឡើងរហូតនោះទេ គឺវាកើតឡើងតែនៅក្នុងរដូវក្ដៅប៉ុណ្ណោះ ហើយរដ្ឋាភិបាល ក៏បានសុំការយោគយល់ និងរកវិធីដើម្បីដោះស្រាយផងដែរ តែទន្ទឹមនឹងនោះរដ្ឋាភិបាលក៏បានគៀងគរវិនិយោគិន ដើម្បីវិនិយោគវិស័យថាមពលនៅក្នុងប្រទេសកម្ពុជាបន្ថែមទៀត អោយគ្រប់ទៅតាមតម្រូវការជាក់ស្ដែង ធ្វើយ៉ាងណាអោយថាមពលសំបូរនិងមានតម្លៃប្រកួតប្រជែងជាមួយបណ្ដាប្រទេសជិតខាង» ។
លោក ឃាង ពុទ្ធី ប្រធានសមាគមអ្នក ជំនាញអចលនទ្រព្យ បានមានប្រសាសន៍ផងដែរថា ជាការពិតណាស់ យើងមិនអាចប្រកែកបាននោះទេ ពីបញ្ហាប៉ះពាល់ក្នុងវិស័យសំណង់ពីការរអាក់រអួលថាមពលអគ្គិសនី នៅក្នុងប្រទេសកម្ពុជា ក៏ប៉ុន្តែទំហំនៃការប៉ះពាល់អាចនិយាយបានថាតិចតួចបំផុត ពីព្រោះទំហំនៃការដាច់ភ្លើង តែមួយពេលៗមិនមែនមួយថ្ងៃៗពេញ ដូច្នេះម្ចាស់ការដ្ឋានសំណង់ក៏បានត្រៀមម៉ាស៊ីនភ ្លើង ដើម្បីដំណើរការសាងសង់បន្តចំណែកការដ្ឋានសំណង់មួយចំនួនតូច បានផ្អាកបណ្ដោះអាសសន្នពេលដាច់ភ្លើង និងដំណើរការវិញពេលភ្លើងត្រលប់មកវិញ ។
លោកបន្តថា បញ្ហាអគ្គិសនីនៅឆ្នាំនេះ គឺជាបទពិសោធន៍មួយសម្រាប់អាជ្ញាធរអគ្គិសនីក្នុងការស្វែងរកប្រភពថាមពល ដើម្បីផ្គត់ផ្គង់នៅឆ្នាំក្រោយៗបន្តទៀត ដូចជាការជំរុញការវិនិយោគថាមពលអគ្គិសនីបន្ថែម ស្វែងរកប្រភពអគ្គិសនីពីប្រទេសជិតខាង ដើម្បីត្រៀមនៅពេលមានតម្រូវការខ្ពស់ដូចឆ្នាំនេះជាដើម។
លោក ឃាង ពុទ្ធី បានបន្តថា « បញ្ហារអាក់រអួលអគ្គិសនីនេះ ក្នុងនាមជាពលរដ្ឋមិនគួរអង្គុយចាំតែបន្ទោស និងជេរប្រមាថនោះទេ តែត្រូវចូលរួមផ្ដល់ជាយោបល់ ដើម្បីស្វែងរកដំណោះស្រាយទាំងអស់គ្នា ព្រោះនេះ ជាប្រទេសរបស់យើង អញ្ចឹងហើយត្រូវចូលរួមដើម្បីកសាងប្រទេសយើងទាំងអស់គ្នា » ។
លោកបន្ថែមថា សម្រាប់សតិអារម្មណ៍របស់វិនិយោគិនវិស័យសំណង់នៅកម្ពុជា អាចនឹងមានតិចតួច តែមិនធ្ងន់ធ្ងរនោះទេ ដោយសារតែបញ្ហាមានរយៈពេលខ្លី ជាក់ស្ដែងពេលនេះអគ្គិសនី ហាក់មានភាពប្រសើរឡើងវិញបន្តិចហើយ ហើយជឿថា នៅរយៈពេលប៉ុន្មានថ្ងៃទៀត ក្រោយពេលភ្លៀងធ្លាក់ខ្លាំង ថាមពលអគ្គិសនី នៅក្នុងប្រទេសកម្ពុជានឹងត្រលប់មកប្រក្រតីវិញ ដោយសារតែអាកាសធាតុក៏បានបន្ថយកម្ដៅ ធ្វើអោយអ្នកប្រើថាមពលច្រើននិងកាត់បន្ថយ ហើយអាចសល់សម្រាប់ផ្គត់ផ្គង់ទៅតាមការដ្ឋាន សហគ្រាសនានាដូចប្រក្រតីវិញ ។
សម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងនាពេលកន្លងមកថា សេចក្ដីត្រូវការនៃការប្រើប្រាស់ថាមពលអគ្គិសនី មានការកើនឡើងជាខ្លាំងជាពិសេសវិស័យសំណង់គឺហក់ឡើងដល់ទៅ៧០០ភាគរយដែលនាំអោយក្រុងធំៗនៅកម្ពុជាជួបការ ខ្វះថាមពលអគ្គិសនី ។
បើតាមលោក ប៉ែន សុផល រដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់បានអោយដឹង ផងដែរថាក្នុងរយៈពេល៤ខែ ដើមឆ្នាំ ២០១៩នេះ កម្ពុជាទទួលបានទុនវិនិយោគក្នុងវិស័យសំណង់សរុបប្រមាណ ២.៧៤២លាន ដុល្លារអាមេរិកមានកំណើនប្រមាណ ៦៧ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨កន្លងមកនេះ ។ ដូច្នេះអាចវាយតម្លៃបានថា វិស័យសំណង់ក៏បានទាញស្រូវយកថាម ពលអគ្គិសនីអស់មួយចំណែកធំ ដើម្បីដំណើរការសាងសង់ និងបំពេញនៅតាមអគារខុនដូ អគារការិយា ល័យពាណិជ្ជកម្មជាដើម ៕
ចែករំលែកព័តមាននេះ