រាជធានីភ្នំពេញ ៖ ថ្នាក់ដឹកនាំក្រសួងពាណិជ្ជកម្មថ្មីៗនេះបានធ្វើការស្នើដល់ មហាអំណាចចិន ដែលត្រូវបានចាត់ទុកថាជាមិត្តដែកថែបរបស់ប្រទេសកម្ពុជា ជួយជំរុញពាណិជ្ជករចិន បង្កើនការទិញផលិតផល ជាពិសេសកសិផលពីកម្ពុជាឲ្យបានអតិបរិមា ។ ការស្នើនេះត្រូវបានធ្វើឡើងនាឱកាសដែលលោករដ្ឋមន្ត្រីក្រសួងកសិកម្មកម្ពុជា លោក ប៉ាន សូរស័ក្តិ បានជួបពិភាក្សាការងារជាមួយ លោកស្រី រិន អាយរ៉ុង អភិបាលរងខេត្តសានទុង ទីក្រុងជីណាន ប្រទេសចិន កាលពីរសៀលថ្ងៃទី ១០ ខែឧសភា ឆ្នាំ២០១៩ នេះ។
ដំណើរជួបពិភាក្សាការងារនេះ លោកស្រី រិន អាយរ៉ុង អភិបាលរងខេត្តសានទុង បានជម្រាបជូនគណៈប្រតិភូខ្មែរ អំពីប្រវត្តិខេត្តសានទុង និងចំនួនក្រុមហ៊ុននៃខេត្តសានទុង ដែលបានកំពុងធ្វើធុរកិច្ចនៅក្នុងប្រទេសកម្ពុជា។ ព្រមជាមួយគ្នានោះ លោកស្រី ក៏បានស្នើសុំ រដ្ឋមន្ត្រីក្រសួងពាណិជ្ជកម្មកម្ពុជា ជួយគាំទ្រគម្រោងរបស់វិនិយោគរបស់ខេត្តសានទុង លើការបង្កើតសួនឧស្សាហកម្ម និងគ្រឿងម៉ាស៊ីន នៅកម្ពុជា។
ជាការឆ្លើយតប លោក ប៉ាន សូរស័ក្តិ បានសម្តែងការគាំទ្រពេញទំហឹងចំពោះគម្រោងវិនិយោគខាងលើ និងបានថ្លែងអំណរគុណ លោកស្រី រិន អាយរ៉ុង ដែលកន្លងមកបានខិតខំជំរុញវិនិយោគិនខេត្តសានទុង ឱ្យចូលទៅបណ្តាក់ទុនវិនិយោគនៅកម្ពុជា រហូតដល់ ១១២ក្រុមហ៊ុន ។
បន្ថែមពីលើនេះ លោករដ្ឋមន្ត្រីក្រសួង ពាណិជ្ជកម្មបាន «សន្យាជួយសម្របសម្រួលធុរកិច្ច ដល់វិនិយោគិនខេត្តសានទុងទាំងអស់ និងបានសំណូមពរ លោកជំទាវអភិបាលរងខេត្ត ជួយជំរុញពាណិជ្ជករចិន ធ្វើការទិញកសិផលពីកម្ពុជាឱ្យបានអតិបរិមា ដូចជា អង្ករ ស្វាយ ដំឡូងមី មៀន ចេក និងផលិតផលផ្សេងៗទៀត ដើម្បីបង្កើនទំហំពាណិជ្ជកម្មទ្វេភាគីកម្ពុជា-ចិន » ។
តើការវិនិយោគរបស់ចិនមានន័យអ្វីចំពោះកម្ពុជា? បើយោងតាមលោករដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ កន្លងមកបានលើកយកវឌ្ឍនភាពវិស័យពាណិជ្ជកម្មជាតិ បង្ហាញជូនវេទិកាជំរុញពាណិជ្ជកម្ម និងវិនិយោគកម្ពុជា-ចិន ឆ្នាំ២០១៩ ដែលបានរៀបចំកាលពីថ្ងៃទី២២ ខែមករា ឆ្នាំ២០១៩ ដែលពេលនោះលោកបានឲ្យដឹងអំពីវឌ្ឍនភាពទំហំពាណិជ្ជកម្មទ្វេភាគីកម្ពុជា និងចិន ដែលកាលពីឆ្នាំ២០១៧ ដែលសម្រេចបានទឹកប្រាក់ ៥ប៊ីលានដុល្លារ តាមផែនការកំណត់ ។ ជាងនេះទៅទៀតនោះ កម្ពុជា-ចិន ក៏បានព្រមព្រៀងធ្វើឲ្យសម្រេចឲ្យបាននូវផែនការបង្កើនឱ្យបានដល់ ៦ប៊ីលានដុល្លារ នៅឆ្នាំ២០២០ និង ១០ប៊ីលានដុល្លារ នៅត្រឹមឆ្នាំ២០២៣។
សូមបញ្ជាក់ថារដ្ឋមន្ត្រីក្រសួងពាណិជ្ជកម្មបានដឹកនាំប្រតិភូកម្ពុជាទៅប្រទេសចិន និងបានសម្ពោធមជ្ឈមណ្ឌលពាណិជ្ជកម្មខ្មែរ មួយ នៅទីក្រុងយានថាយ ខេត្តសានទុង នៃសាធារណរដ្ឋប្រជាមានិតចិន កាលពីថ្ងៃទី ១០ ខែឧសភា ឆ្នាំ២០១៩ នេះ។
ជាមួយគ្នានោះដែរ ថ្នាក់ដឹកនាំកម្ពុជាបានឲ្យដឹងថា មជ្ឈមណ្ឌលពាណិជ្ជកម្មកម្ពុជាគឺជាច្រកទ្វារមួយសម្រាប់ផ្តល់ព័ត៌មានទាក់ទងនឹងពាណិជ្ជកម្ម វិនិយោគ ទេសចរណ៍ និងវប្បធម៌ នៃព្រះរាជាណាចក្រកម្ពុជា ជូនវិនិយោគិនចិន នៅក្នុងខេត្តសានទុង និងខេត្តដទៃទៀត នៃប្រទេសចិន ដែលមានបំណងទស្សនា ឬ ធ្វើធុរកិច្ច និងវិនិយោគនៅកម្ពុជា។
នៅក្នុងឱកាសនោះ លោក ប៉ាន សូរស័ក្តិ បានស្នើលោកស្រី ចាង យ៉ាម៉ី ប្រធានមជ្ឈមណ្ឌលពាណិជ្ជកម្មកម្ពុជា ធ្វើការដាក់តាំងបង្ហាញផលិតផលខ្មែរ ឱ្យបានអតិបរមា ដើម្បីទាក់ទាញការបញ្ជាទិញពីទីផ្សារប្រទេសចិន និងជំរុញការនាំចេញផលិតផលជាតិ ៕
ចែករំលែកព័តមាននេះ