ខេត្តស្វាយរៀង ៖ កាលពីព្រឹកថ្ងៃទី២៩ កញ្ញា ២០១០ តំណាងសារព័ត៌មានកោះសន្តិភាព បាននាំយកអំណោយសប្បុរសជនទៅប្រគល់ឱ្យក្មេងប្រុសម៉ៅ ឆូយ អាយុ១៧ឆ្នាំ ដែលជាទុរគតជនមានជំងឺក្រួសតំរងនោម ហើយរស់នៅឯកោគ្មានឪពុកម្តាយបងប្អូន ត្រូវបានក្រុមគ្រួពេទ្យវះកាត់ពីរដង និងជួយអំពាវ នាវរកសប្បុរសជនជួយឧបត្ថម្ភដើម្បីបានចំណីអាហារបំប៉នសុខភាពឱ្យឆាប់ជាសះស្បើយពីជំងឺ ។
អំណោយដែលផ្តល់ឱ្យតាមរយៈភ្នាក់ងារ កោះសន្តិភាពមានចំនួន៥០ដុល្លារ ទទួលបានពី សប្បុរសជនឈ្មោះវេង ហាំង រស់នៅរដ្ឋកាលីហ្វ័រនីញ៉ា សហរដ្ឋអាមេរិក ។ ក្រោយពីទទួលបានអំណោយដ៏ថ្លៃថ្លាពីសប្បុរសជនក្មេងប្រុស អភ័ព្វជីវិតឯកោរូបនេះ បានសំដែងនូវសេចក្តី ត្រេកអរជាខ្លាំងព្រមទាំងបានលើកម្រាមដៃដប់ប្រណម្យដឹងគុណសប្បុរសជន ។
ក្រុមគ្រូពេទ្យបានប្រាប់កោះសន្តិភាពថាប្រមាណជា១០ថ្ងៃទៀតក្មេងប្រុសម៉ៅ ឆូយ នឹងជាសះស្បើយ ហើយគ្រូពេទ្យគ្រោងនឹងនាំគេទៅរស់នៅក្នុងមណ្ឌលកុមារកំព្រាខេត្ត ប៉ុន្តែបើមណ្ឌលកុមារកំព្រាមិនទទួលទេ នោះមិនដឹងថា តើនឹងត្រូវបញ្ជូនឱ្យទៅរស់នៅឯណាទេ បើគ្មាន ទាំងឪពុកម្តាយបងប្អូនបែបនេះ ៕
ចែករំលែកព័តមាននេះ