រាជធានីភ្នំពេញ ៖ បន្ទាប់ពីទទួលបានក្រុមហ៊ុនចុះបញ្ជីលក់មូលបត្រកម្មសិទ្ធចំនួន៥និងសញ្ញាប័ណ្ណសាជីវកម្មឬហៅថា មូលបត្របំណុលចំនួន២ជាផ្លូវការរួចមក ក្រុមហ៊ុនផ្សារមូលបត្រកម្ពុជាបង្ហាញថានឹងទទួលបានក្រុមហ៊ុនចុះបញ្ជីថ្មីបន្ថែមចំនួន៤ទៀតនាពេលខាងមុខនេះ ខណៈដែលទំហំជួញដូរប្រចាំថ្ងៃមានសន្ទុះកើនឡើង។
លោក ហុង សុហួរ អគ្គនាយក នៃក្រុមហ៊ុនផ្សារមូលបត្រកម្ពុជាមានប្រសាសន៍ក្នុងក្នុង ពិធីចុះបញ្ជីលក់មូលបត្របំណុលជាផ្លូវការ របស់គ្រឹះស្ថានមីក្រូហិរញ្ញវត្ថុ អិលអូអិលស៊ី កាលថ្ងៃទី ១០ឧសភា ឆ្នាំ ២០១៩នេះថា «នាពេលដ៏ខ្លីខាងមុខនេះ យើងនឹងមានក្រុមហ៊ុន៣ទៅ៤ទៀត ដែលនឹងបន្តចុះបញ្ជីលក់មូលបត្រកម្មសិទ្ធិ និងមូលបត្របំណុលរបស់ខ្លួន មុនបំណាច់ឆ្នាំនេះ។ ទទ្ទឹមនឹងការកើនឡើននៃចំនួន ក្រុមហ៊ុនចុះបញ្ជីនេះ ចំនួនគណនីជួញដូរនិងតម្លៃហ៊ុននៅលើទីផ្សារក៏បានកើនឡើងគួរអោយកត់សម្គាល់»។
លោកអគ្គនាយកបន្តថា ជាក់ស្តែង មូលធននូបនីយកម្មទីផ្សារបានកើនឡើងពីប្រមាណ ១,៧៧ ទ្រីលានរៀលឬប្រហែល ៤៤២,៩ លានដុល្លារអាមេរិក នៅចុងឆ្នាំ២០១៨ ទៅ ២,១៤ ទ្រីលានរៀល ឬប្រហែល ៥៣៤,៣ លានដុល្លារអាមេរិកគិតត្រឹមចុងត្រីមាសទី១ ឆ្នាំ២០១៩ ពោលគឺមានកំណើនប្រមាណ២១%។
លោកបានលើកឡើងថា សន្ទស្សន៍ផ្សារមូលបត្រកម្ពុជាបានឡើងខ្ពស់បំផុតរហូតដល់៦៧១,៦៥ ពិន្ទុ នៅក្នុងត្រីមាសទី១ ឆ្នាំ២០១៩ ច្រើនជាងឆ្នាំ២០១៨ ដែលឡើងខ្ពស់បំផុតត្រឹម៤៨០,៩៨ ពិន្ទុ។ ចំណែកបរិមាណជួញដូរភាគហ៊ុនប្រចាំថ្ងៃជាមធ្យម នៅក្នុងត្រីមាសទី១ ឆ្នាំ២០១៩ បានកើនដល់ ៦៧.៣១១ហ៊ុន ក្នុងមួយថ្ងៃ ពោលគឺមានការកើនឡើង៤ដង ច្រើនជាងឆ្នាំ២០១៨ ដែលមានត្រឹមតែ ១៦.២២៩ ហ៊ុន។ រីឯទំហំជួញដូរភាគហ៊ុនប្រចាំថ្ងៃជាមធ្យមវិញ បានកើនឡើងជិត២ដង ពីប្រមាណ១០៦,៨៨ លានរៀលក្នុងមួយថ្ងៃ ឬប្រហែល ២៦.៧១៩ ដុល្លារអាមេរិកនៅឆ្នាំ២០១៨ ទៅ ២១១,២៦ លានរៀល ក្នុងមួយថ្ងៃ ឬប្រហែល ៥២.៨១៦ ដុល្លារអាមេរិកក្នុងត្រីមាសទី១ ឆ្នាំ២០១៩។តាមលោកអគ្គនាយកបានបញ្ជាក់យ៉ាងដូច្នេះថា « ផ្សារមូលបត្រកម្ពុជាទទួលបានទាំងនេះ សុទ្ធតែជាលទ្ធផលជាទីមោទនៈ ដែលកំពុងឆ្លុះបញ្ចាំងពីវឌ្ឍនភាពដ៏ល្អប្រសើរមិនធ្លាប់មាន របស់ផ្សារមូលបត្រកម្ពុជា។ យើងមានជំនឿជឿជាក់ថា ផ្សារមូលបត្រកម្ពុជានឹងអភិវឌ្ឍជាមួយនឹង ល្បឿនកាន់តែលឿនជាងមុន និងអាចឈានដល់ដំណាក់កាលស្វ័យចិរភាពនៅប៉ុន្មានឆ្នាំខាងមុខនេះ»។
ចំណែកលោក ស៊ូ សុជាតិ អគ្គនាយកគណៈកម្មការមូលបត្រកម្ពុជាមានប្រសាសន៍ថា «នៅឆ្នាំ២០១៨យើងធ្វើបានល្អ ហើយនៅត្រីមាសទី១ឆ្នាំ២០១៩នេះធ្វើបានកាន់តែល្អបន្ថែមទៀត។នេះជាមោទនមួយដែលទីផ្សារយើងសម្រេចបាន»។ លោកបានបន្តថា ស្របជាមួយនិងកំណើនខាងលើនេះ គណៈកម្មការមូលបត្រកម្ពុជាក្នុងនាមជាអាជ្ញាធរក្នុងវិស័យមូលបត្រ នូវតែបន្តខិតខំប្រឹងប្រែងបំពេញបេសកម្ម និងចក្ខុវិស័យរបស់ខ្លួនដើម្បីឱ្យធានាបាននៅសណ្តាប់ធ្នាប់ តម្លាភាព ប្រសិទ្ធភាពនិងនិរន្តរភាពនៃទីផ្សារ តាមរយៈការដាក់ចេញនូវផលិតផលថ្មីៗក្នុងទីផ្សារ ការពង្រឹង ហេដ្ឋារចនាសម្ព័ន្ធទ្រទ្រង់ដូចជា បទបញ្ញាតិ តួអង្គពាក់ព័ន្ធ ការលើកកម្ពស់ការយល់ដឹងរបស់សាធារណជន ក៏ដូចជាក្រុមហ៊ុនបោះផ្សាយនឹងការពង្រឹងច្បាប់។ លោកស៊ូ សុជាតិ មានប្រសាសន៍ឲ្យដឹងទៀតថា «នាពេលខាងមុខនេះ គម្រោងវិនិយោគរួម នឹងមានវត្តមាននៅក្នុងទីផ្សារមូលបត្រកម្ពុជា ហើយឧបករណ៍ហិរញ្ញវត្ថុថ្មីនេះនឹងក្លាយជាធាតុដ៏សំខាន់ក្នុងការជំរុញសន្ទនីយភាពទីផ្សារ តាមរយៈការវិនិយោគចូលទៅលើសញ្ញាប័ណ្ណឬនៅលើមូលបត្រកម្មសិទ្ធិ។ ដូចនេះយើងត្រូវចូលរួមទាំងអស់គ្នាដើម្បីអភិវឌ្ឍន៍វិស័យមូលបត្រក៏ដូចជាអភិវឌ្ឍសេដ្ឋកិច្ចជាតិ»។
លោក បណ្ឌិតសភាចារ្យ ហ៊ាន សាហ៊ីប រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃក្រុមហ៊ុនផ្សារមូលបត្រកម្ពុជាមានប្រសាសន៍ថា «ផ្សារមូលបត្រកម្ពុជាពិតជាបានបង្កើតនៅបរិយាកាសច្រើនដល់អ្នកចូលរួមនៅក្នុងទីផ្សារទាំងអស់ បានប្រែក្លាយពីទីផ្សារមូលបត្រកម្ពុជាទៅជាកន្លែងប្រភពហិរញ្ញប្បទានមួសម្រាប់បណ្តាគ្រឹះស្ថានហិរញ្ញវត្ថុនិងសហគ្រាសដែលត្រូវការមូលធនបន្ថែម។ ខ្ញុំសង្ឃឹមថាដោយកិច្ចសហការខ្ពស់ជាមួយធនាគារជាតិនៃកម្ពុជានឹងមានគ្រឹះស្ថានធនាគារនិងហិរញ្ញវត្ថុជាច្រើនផ្សេងទៀតនឹងមកចុះបញ្ជីបោះផ្សាយលក់មូលបត្រកម្មសិទ្ធនិងមូលបត្របំណុលនៅផ្សារមូលបត្រកម្ពុជា»។
គួររម្លឹកថា ក្រុមហ៊ុនផ្សារមូលបត្រកម្ពុជាទទួលបានក្រុមហ៊ុនដែលបានចុះបញ្ជីបោះផ្សាយលក់មូលបត្រកម្មសិទ្ធិនិងមូលបំណុលមានចំនួន៧ក្នុងនោះ៖១ -)រដ្ឋាករទឹកស្វយ័តក្រុងភ្នំពេញ , ទី២-) ក្រុមហ៊ុន ហ្គ្រេន ធ្វីន អ៊ិនធើណេសិនណល, ទី៣-)កំពង់ផែស្វយ័តភ្នំពេញ, ទី៤-) ភ្នំពេញអេសអ៊ីហ្សិត ភីអិលស៊ី,ទី៥-) កំពង់ផែស្វយ័តក្រុងព្រះសីហនុនិងទី៦-) គ្រឹះស្ថានមីក្រូហិរញ្ញវត្ថុ ហត្ថាកសិករ(បោះលក់មូលបត្របំណុល) និង៧-)គ្រឹះស្ថានមីក្រូហិរញ្ញវត្ថុLOLC ដែលទើបបោះផ្សាយលក់មូលបត្របំណុលកាលពីថ្មីៗនេះ៕
ចែករំលែកព័តមាននេះ