ខេត្តតាកែវ ៖ ជនសង្ស័យ២នាក់ត្រូវបានប៉ូលិសស្រុកបាទីឃាត់ខ្លួនក្នុងចំណោមបក្សពួក៣នាក់ រួចបញ្ជូនមកស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនបន្តទៅសាលាដំបូងចាត់ការទៅតាមច្បាប់ ខណៈពេលដែលក្រុមជនស្ទាវទាំងនេះ បានយកកាំភ្លើងAK មួយដើមធ្វើសកម្មភាពបាញ់រះមានបំណងសម្លាប់គូទំនាស់របស់ខ្លួន និងធ្វើឱ្យខូចខាតសំភារក្នុងហាងស៊ីផឹកមួយកន្លែងដែលខ្លួនផឹកអត់លុយទូទាត់ ។
ហេតុការណ៍ចាប់ខ្លួននេះបានកើតឡើងកាលពីថ្ងៃទី២ មីនា វេលាម៉ោង៨ និង៣០នាទីនៅភូមិត្រពាំងឈូក ឃុំរវៀង ស្រុកសំរោង ។ លោកវរសេនីយ៍ត្រីង៉ាន់ សារី អធិការនគរបាលស្រុកបាទីបានឱ្យដឹងថាជនសង្ស័យ២នាក់ដែលយើងចាប់ខ្លួនបាន ម្នាក់ឈ្មោះប៉ា គឹម ស្រេង ភេទប្រុស អាយុ១៨ឆ្នាំ និងឈ្មោះភួង បុរី ហៅឈឿន ភេទប្រុស អាយុ១៩ឆ្នាំ ។ អ្នកទាំង២ រស់នៅភូមិ-ឃុំខាងលើ រួមជាមួយកាំភ្លើង AK អត់ច្បាប់១ដើម បង់មួយ និងគ្រាប់១៩គ្រាប់ ម៉ូតូ១គ្រឿង ធុនC125 ពណ៌ខ្មៅ ស៊េរី២០០៦ ពាក់ស្លាកលេខកំពង់ស្ពឺ 1A 7846 ។ ចំណែកបក្សពួកម្នាក់ទៀត និងជាម្ចាស់កាំភ្លើងបានរត់គេចខ្លួនបាត់ ។
លោកអធិការស្រុកបានឱ្យដឹងថា កាលពីថ្ងៃទី១ មីនា នារសៀលក្រុមជនសង្ស័យបាននាំគ្នាចូលទៅស៊ីផឹកក្នុងហាងមួយឈ្មោះទីក្រុងថ្មី ស្ថិតនៅភូមិស្មៅខ្ចី ឃុំត្រពាំងសាប ស្រុកបាទី។ លុះស៊ីផឹកបានមួយសន្ទុះ មិត្តគេម្នាក់ផ្សេងទៀតឈ្មោះមាន់ គង្គា ភេទប្រុស អាយុ២០ឆ្នាំ បានខឹងនឹងស្ត្រីបម្រើ រួចក៏ទៅផ្ទះមុន ។ ចំណែកអ្នកនៅសល់ក៏នៅផឹកបន្តទៀតរហូត ដល់ម៉ោង៥ និង១៥នាទី ទើបពួកគេហៅថៅកែមកគិតលុយ សរុបអស់ចំនួន១៧៧.៥០០រៀល តែពួកគេអត់លុយឱ្យ ក៏ប្រើល្បិចគេចខ្លួនទាំង៣នាក់ ។ លុះដល់ម៉ោង១៩ថ្ងៃដដែលជនសង្ស័យឈ្មោះប៉ា គឹមស្រេង ហៅជាតិ បានហៅមិត្តភក្តិ ២នាក់ទៀតឱ្យជូនទៅរកឈ្មោះឆ្អឹង ហៅសុខ នី ដែលគេធ្លាប់មានទំនាស់គ្នាពីមុន ។ ពេលរកនោះ ត្រូវគេប្រាប់ថា ឃើញនៅផឹកក្នុងហាងទីក្រុងថ្មីនោះដែរ តែរកអត់ឃើញក៏ចេញមកក្រៅវិញ ក៏ជួបឈ្មោះភួង ពិសិដ្ឋ ហៅអ៊ឹង ជាប្អូនបង្កើតម្ចាស់ហាង ក៏បានទារលុយពីឈ្មោះប៉ា គឹមស្រេង ដែលផឹកស៊ីមិនឱ្យលុយ។
តែជនសង្ស័យបានប្រកែករួចបានស្រែកដាក់គ្នា ក៏ក្លាយជាទំនាស់ ហើយប្អូនថៅកែ ហាងបានវាយពីរដៃទៅលើឈ្មោះប៉ា គឹមស្រេង ។ លុះដល់ម៉ោង៩ និង៥០នាទីយប់ ជនសង្ស័យទាំង៣នាក់បានជិះម៉ូតូ១គ្រឿងត្រឡប់មកវិញ ប្រដាប់ដោយកាំភ្លើង AK កាត់ស្នូកមួយដើមផង ។ ពេលទៅដល់អ្នកនៅក្នុងហាងនាំគ្នាគេចចេញអស់ ។ ចំណែកឈ្មោះប៉ា គឹមស្រេង ជាអ្នកកាន់កាំភ្លើងបានបាញ់រះចូលទៅក្នុងហាងចំនួន១៥គ្រាប់ ខូចខាតសំភារ តែមិនធ្វើឱ្យអ្នកណាមានរបួសឡើយ។
ក្រុមជនសង្ស័យបានសារភាពប្រាប់ប៉ូលិសថា កាំភ្លើងនេះជារបស់ឈ្មោះពុយ មីនា និងបានសារភាពថា ពិតជាបានយកកាំភ្លើងមានបំណងបាញ់សម្លាប់ម្ចាស់ហាងពិតប្រាកដមែន ។ បច្ចុប្បន្នជនសង្ស័យ២នាក់ និងកាំភ្លើងAK ១ដើម ត្រូវបានប៉ូលិសការិយាល័យកំរិតស្រាល ខេត្តបញ្ជូនទៅសាលាដំបូងខេត្តកាត់ទោសហើយ ៕
ចែករំលែកព័តមាននេះ