សុខភាពជារឿងសំខាន់ ដែលគួរយកចិត្ដទុកដាក់ និងប្រុងប្រយ័ត្នបំផុត ។ ការហាត់ប្រាណជារឿងមួយដែលល្អសម្រាប់សុខភាព និងអាចរក្សាលំនឹងសរីរាង្គគ្រប់កម្រិតបាន ។ ចំណែកស្ប៉ាក៏មិនខុសពីការហាត់ប្រាណប៉ុន្មានដែរ ដោយគ្រាន់តែស្ប៉ាមានលក្ខណៈពិសេសខ្លះៗជាងការហាត់ប្រាណ ។ ពិតណាស់ ស្ប៉ាមានសារ ប្រយោជន៍ខ្លាំងសម្រាប់សុខភាព និងសម្រស់របស់អ្នក ។
កញ្ញា ភឿក ចាន់រ៉ា អ្នកជំនាញផ្នែកស្ប៉ានៃហាង The Swan Spa បានប្រាប់កោះសន្ដិភាពថា ស្ប៉ាមានច្រើនប្រភេទទៅតាមការចង់បានរបស់លោកអ្នក ដូចជាការម៉ាស្សាមុខ ម៉ាស្សាប្រេង ម៉ាស្សាខ្លួនបែបខ្មែរបុរាណ ម៉ាស្សាស្អំពន្លៃ ម៉ាស្សាក្បាល ម៉ាស្សាបាតជើង ម៉ាស្សាខ្លួនជាដើម ។ ការស្ប៉ាមិនត្រឹមតែផ្ដល់សារប្រយោជន៍ចំពោះសុខភាពប៉ុណ្ណោះទេ អាចជួយថែរក្សាសម្រស់ឱ្យបានស្អាតថែមទៀតផង ។ ម៉្យាងទៀត ការស្ប៉ាជួយសម្រួលដល់អ្នកនូវអាការៈចុកចង្កេះ ចុកស្រពន់ដៃជើង អារម្មណ៍ធូរស្បើយពីភាពតានតឹង តប់ប្រមល់ពេញមួយថ្ងៃ ។ ស្ប៉ាគួរធ្វើរយៈពេល៩០នាទី ជាពេលដ៏សមស្របមួយជួយបំបាត់ភាពហត់នឿយ សម្រាប់លោកអ្នកដែលមានភាពមមាញឹកនឹងការងារច្រើន ។ ការស្ប៉ាត្រូវបានធ្វើឡើងពេញរាងកាយពីលើក្បាលរហូតចុងជើង ។ ប៉ុន្ដែស្ប៉ាក៏មានផលប៉ះពាល់ដល់សុខភាព និងអារម្មណ៍ផងដែរ ប្រសិនបើអ្នកជ្រើសរើសកន្លែងដែលមិនមានជំនាញច្បាស់លាស់ ។
ពិតណាស់ រាល់ពេលចុងសប្ដាហ៍បន្ទាប់ពីបន្ធូរអារម្មណ៍តាមរយៈការហាត់ប្រាណ ដែលជាលក្ខណៈបែបធម្មជាតិ និងការដើេរកម្សាន្ដតាមទីជិតឆ្ងាយជាមួយមិត្ដភក្ដិ ឬក្រុមគ្រួសារហើយនោះ ស្ប៉ាគឺជាចំណុចបន្ទាប់ដែលលោកអ្នកគួរជ្រើសរើសយ៉ាងប្រសើរបំផុត ៕
ចែករំលែកព័តមាននេះ