យោងតាមការសិក្សាស្រាវជ្រាវថ្មីមួយដែលធ្វើឡើងដោយក្រុមអ្នកវិទ្យាសាស្ត្រប្រទេសបារាំងបានបង្ហាញថា បណ្តាជនដែលនិយមទទួលទានសាច់ជាប្រចាំប្រឈមនឹងការកើតមានជំងឺទឹកនោមផ្អែមខ្ពស់បំផុត បើទោះជា ពួកគេទទួលទានបន្លែនិងផ្លែឈើច្រើនយ៉ាងណាក៏ដោយ ។
សាច់គឺជាប្រភេទអាហារដែលបង្កើតទៅជាសារធាតុអាស៊ីដច្រើនលើសលប់បន្ទាប់ពីត្រូវបានរំលាយក្នុងរាងកាយ ពោលគឺផ្ទុយគ្នាពីកាហ្វេ បន្លែនិងផ្លែឈើដែលបង្កើតសារធាតុអាស៊ីដតិចតួចបំផុតក្រោយពីវាត្រូវបានរំលាយដោយរាងកាយដូចគ្នា ។ ការអង្កេតតាមដានរយៈពេល១៤ឆ្នាំទៅលើស្ត្រី៦ម៉ឺន៦ពាន់៤៨៥នាក់បង្ហាញថា ក្រុមដែលទទួលទានបណ្តាអាហារបង្កើតជាសារធាតុអាស៊ីដច្រើន គឺ៥៦ភាគរយប្រឈមនឹងការកើតជំងឺទឹកនោមផ្អែមធៀបនឹងក្រុមដែលទទួលទានតិចបំផុត ។
មានការពន្យល់ថា វត្តមានអាស៊ីដច្រើនអាចបង្កើនហានិភ័យពីជំងឺទឹកនោមផ្អែម ក៏ព្រោះ វាបានបង្កការលំបាកដល់រាងកាយក្នុងការបម្លែងសារធាតុស្ករពីបណ្តាអាហារដែលយើងទទួលទានឱ្យទៅជាថាមពល ។
ក្រុមអ្នកស្រាវជ្រាវដែលមកពីវិទ្យាស្ថានស្រាវជ្រាវវេជ្ជសាស្ត្រ INSERM ក្រុងប៉ារីស ប្រទេសបារាំងបានថ្លែងថា បើទោះជាក្រូចពោធិ៍សាត់និងក្រូចឆ្មារសម្បូរដោយសារធាតុអាស៊ីដយ៉ាងច្រើនលើសលប់ ប៉ុន្តែសារធាតុនេះត្រូវបានកាត់បន្ថយអស់មួយចំនួនធំបន្ទាប់ពីត្រូវបានរំលាយដោយរាងកាយ ។ ពួកគេបានបន្តថា៖«ផ្ទុយពីជំនឿដែលមានជាទូទៅ បណ្តាផ្លែឈើស្ទើរទាំងអស់ក្នុងនោះមានដូចជា ផ្លែប៉ោម ផ្លែប៉ែស ផ្លែព័រ ចេក ក្រូចពោធិ៍សាត់ និងក្រូចឆ្មារគឺសុទ្ធតែត្រូវកាត់បន្ថយសារធាតុអាស៊ីដនៅពេលដែលវាបានឆ្លងកាត់ការរំលាយដោយរាងកាយ ទោះជាយ៉ាងនេះក្តី អ្នកជំនាញខាងជំងឺទឹកនោមផ្អែមអង់គ្លេស វេជ្ជបណ្ឌិត Richard Elliott បានថ្លែងថា ការសិក្សាបន្ថែមទៀតលើបញ្ហាខាងលើគួរតែធ្វើបន្ត ។ លោកបន្តថា៖«ពិតណាស់ អ្វីដែលយើងបានដឹងបច្ចុប្បន្ននេះគឺថា វិធីល្អបំផុតបង្ការជំងឺទឹកនោមផ្អែមប្រភេទ២គឺរក្សាទម្ងន់ខ្លួនឱ្យស្ថិតក្នុងកម្រិតធម្មតាតាមរយៈការហាត់ប្រាណនិងទទួលទានរបបអាហារដែលសម្បូរដោយបន្លែ-ផ្លែឈើ ប៉ុន្តែ មានខ្លាញ់ ស្ករនិងអំបិលតិច »៕
ចែករំលែកព័តមាននេះ