រាជធានីភ្នំពេញ ៖ ស្ត្រីម្នាក់ចេញពីផឹកស៊ីច្រៀងខារ៉ាអូខេ ត្រូវជនសង្ស័យឌុបយកទៅរំលោភនៅក្នុងចំការត្រែងដីវាលបឹងកក់ រួចឌុបយកទៅទម្លាក់ចោល ហើយត្រូវនាងអង្គុយយំ និងយករូបភាពដែលនាងលួចថតពេលជនសង្ស័យធ្វើសកម្មភាព ដើម្បីឱ្យសមត្ថកិច្ចជួយអន្តរាគមន៍បង្កឲ្យមានការភ្ញាក់ផ្អើល កាលពីម៉ោង3និង15នាទីទៀបភ្លឺ ថ្ងៃទី11 ខែឧសភា ឆ្នាំ២០១៩ តាមបណ្តោយផ្លូវបឹងកក់ នៅចំណុចដីឡូតិ៍មួយកន្លែង សង្កាត់ស្រះចក ខណ្ឌដូនពេញ ។
នារីរងគ្រោះមានអាយុ២៩ឆ្នាំ មុខរបរជាងអ៊ុតសក់ ស្នាក់នៅខណ្ឌមានជ័យ៣ ។
តាមប្រភពពីជនរងគ្រោះឱ្យដឹងថា រូបគាត់ស្គាល់មិត្តភក្តិស្រីម្នាក់ស្លៀកពាក់ធ្វើប្រុសបាន៣ខែ ហើយមុនកើតហេតុនៅម៉ោង៩យប់ មិត្តភក្តិស្រីធ្វើជាប្រុសនោះបានជិះម៉ូតូកង់បីមកយកនាងទៅញុំាអាហារនៅត្រើយម្ខាងជ្រោយចង្វារ ពេលទៅដល់មានមិត្តភក្តិស្រីប្រុសផ្សេងទៀតដែលត្រូវជាមិត្តភក្តិរបស់មនុស្សធ្វើប្រុសនោះទៅដែរ ។ លុះពេលញុំារួចក៏បន្តទៅច្រៀងខារ៉ាអូខេនៅម្តុំជ្រោយចង្វាររហូតដល់យប់ជ្រៅ ហើយជនសង្ស័យដែលជាមិត្តភក្តិរបស់ស្រីធ្វើប្រុសនោះនិយាយលួងលោមនាងចង់ជូនទៅផ្ទះ ដោយយកលេសថាផ្ទះនៅក្បែរគ្នា ទើបរូបគាត់ព្រមជិះម៉ូតូមួយគ្រឿងហុងដាស្តុបពី ពណ៌ទឹកក្រូច ពាក់ស្លាកលេខភ្នំពេញ1HL5880 ទៅជាមួយ ។
ប្រភពដដែលបន្តទៀតថា ខណៈពេលជនសង្ស័យជិះម៉ូតូឌុបនាងទៅផ្ទះ បែរជាឌុបនាងចូលក្នុងផ្ទះសំណាក់មួយកន្លែងនៅម្តុំផ្លូវទំនប់៧០ ហើយចាប់រំលោភ តែនាងមិនព្រមបានស្រែកផ្អើលដល់សន្តិសុខផ្ទះសំណាក់មកជួយ រួចនាងរត់ចេញមកក្រៅ ស្រាប់តែត្រូវជនសង្ស័យតាមនិយាយលួងលោមសុំអត់អោនទោសឲ្យរូបគេផង ព្រោះគេស្រវឹងទើបធ្វើបែបនេះ ។ បន្ទាប់មកនាងយល់ព្រមលើកលែងទោសឱ្យ ហើយជនសង្ស័យប្រាប់ថាជិះម៉ូតូជូននាងទៅផ្ទះ លុះជិះទៅដល់ម្តុំដីឡូតិ៍មួយកន្លែងក្នុងបឹងកក់ ស្រាប់បតែជនសង្ស័យចាប់រំលោភនាងម្តងទៀតដោយជនសង្ស័យប្រើអំពើហិង្សាទះកំផ្លៀងនាងចំនួនមួយកំផ្លៀង ហើយរំលោភរហូតបានសម្រេច ម្តង ទើបជនសង្ស័យឌុបរូបនាងយកទៅទំលាក់ចោលនៅម្តុំ DN ធ្វើឲ្យនាងអង្គុយយំផ្អើលទៅដល់សមត្ថកិច្ចមូលដ្ឋានចុះមកដល់កន្លែងកើតហេតុ ។
គួរបញ្ជាក់ថា ខណៈពេលនោះនារីរងគ្រោះបានយករូបវីដេអូដែលរូបគេលួចថត ដែលជនសង្ស័យធ្វើសកម្មភាពរំលោភរួចហើយនោះយកមកបង្ហាញសមត្ថកិច្ច និងដាក់ពាក្យបណ្តឹងនៅប៉ុស្តិ៍រដ្ឋបាលនគរបាលស្រះចក ដើម្បីឱ្យសមត្ថកិច្ចតាមស្រាវជ្រាវតាមជនល្មើសមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ