តារាចម្រៀងលោក ឆាយ វីរៈយុទ្ធ បានប្រកាសពីការពពោះកូនដំបូងនៃភរិយារបស់លោក បន្ទាប់ពីបានចំរើនវ័យនៅក្នុងផ្ទៃបានប្រមាណជាង២០សប្តាហ៍ ដែលដំណឹងនេះបានធ្វើឲ្យលោកមានក្តីរំភើបយ៉ាងខ្លាំង ព្រោះជាកូនដំបូងក្នុងជីវិតអាពាហ៍ពិពាហ៍របស់លោក។
បើទោះបីជាតារាចម្រៀងរូបនេះមិនបានបញ្ជាក់ឲ្យច្បាស់ថា កូននៅក្នុងផ្ទៃភរិយារបស់លោកជាកូនស្រី ឬកូនប្រុសក៏ដោយ ប៉ុន្តែទាំងរូបលោក និងភរិយាយ រួមជាមួយនឹងមិត្តភក្តិ និងអ្នកគាំទ្រជាច្រើនបានសម្តែងការអបអរសាទរយ៉ាងខ្លាំង នូវចំណងដៃកូនលើកដំបូងរបស់លោកនាពេលនេះ។
លោក ឆាយ វីរៈយុទ្ធ បានបញ្ជាក់ថា មួយជីវិតរបស់ខ្ញុំ គាត់ជាកូនដំបូងរបស់ខ្ញុំ គាត់នៅក្នុងផ្ទៃ 20សប្តាហ៍ 6ថ្ងៃហើយ អរគុណបងប្អូនទាំងអស់គ្នាដែលតែងតែយកចិត្តទុកដាក់ចំពោះគ្រួសាររបស់ខ្ញុំ ជូនពរបងប្អូន ប្រិយមិត្តជួបតែសេចក្តីសុខគ្រប់ៗក្រុមគ្រួសារ។ ការបញ្ជាក់របស់លោកនាពេលនេះបានបង្ហាញយ៉ាងច្បាស់ថា លោកពិតជាសប្បាយរីករាយនៅពេលដែលលោក និងភរិយាបានទទួលនូវចំណងដៃកូនលើកដំបូងនាពេលនេះ ខណៈពេលដែលដំណក់ឈាមរួមគ្នានេះនឹងរឹតតែរឹតចំណងជាប្តីប្រពន្ធរបស់លោកកាន់តែផ្អែមល្ហែម និងមានភាពរឹងមាំកាន់តែខ្លាំង។
ជាការកត់សម្គាល់ បន្ទាប់ពីលោក ឆាយ វីរៈយុទ្ធ បានបង្ហាញរូបថតកូននៅក្នុងផ្ទៃប្រពន្ធរបស់លោក ដែលបានមកពីការឆ្លុះអេកូនោះទាំងមិត្តភក្តិក្នុង និងក្រៅរង្វង់សិល្បៈ ជាមួយប្រិយមិត្តគាំទ្របានចូលរួមសម្តែងការអបអរសាទរនូវចំណងដៃដែលមិនអាចកាត់ផ្លៃបាននាពេលនេះ។
គួរបញ្ជាក់ថា លោក ឆាយ វីរៈយុទ្ធ បានបញ្ចប់ភាពនៅលីវរបស់ខ្លួនកាលពីថ្ងៃទី២១ ខែឧសភា ឆ្នាំ២០១៧ បន្ទាប់ពីបានចោលរោងការជាមួយនឹងកូនថៅកែរោងម៉ាស៊ីនកិនស្រូវដ៏ធំនៅទឹកដីខេត្តកំពង់ចាម អ្នកនាង សែ ចាន់ឌី ខណៈពេលមង្គលការរបស់លោកបានរៀបចំឡើងយ៉ាងឱឡារិកនៅតាមបណ្តាយផ្លូវជាតិលេខ៦A ស្ថិតក្នុង ភូមិតាសែន ឃុំសុទិប ស្រុកជើងព្រៃ ខេត្តកំពង់ចាម ពោលគឺនៅទីលានដីដ៏ធំរបស់ថៅកែស្រូវ លោក ហាក់ សែ ដែលជាឪពុកក្មេករបស់លោកតែម្តង។
នៅក្នុងពិធីមង្គលការនោះលោក ឆាយ វីរៈយុទ្ធ បានអះអាងនៅមុខភរិយារបស់លោកថា «ការព្យាយាម និងភាពស្មោះស្នេហ៍ ៧ ឆ្នាំបានសម្រេច មានថ្ងៃនេះជាសាក្សី ជីវិតអាពាហ៍ពិពាហ៍ និងការផ្សំផ្គុំពីអ្នកមានគុណទាំងសងខាង បងសន្យា មានមេបាជាសាក្សី បងនឹងមើលថែអូនអស់មួយជីវិត លុះចាស់កោងខ្នង»៕
ចែករំលែកព័តមាននេះ