រាជធានីភ្នំពេញ៖អតីតពិធីករលោកលាន អាព្រីលគីនីន បានក្តុកក្តួលនៅពេលទទួលពាក្យទូន្មានពីថ្នាក់ដឹកនាំសម្តេចតេជោនាយករដ្ឋមន្ត្រី។ ភាពក្តុកក្តួលនោះកើតចេញដោយសារលោកបានលឺពាក្យទូន្មានដ៏ខ្លីមួយពីថ្នាក់ដឹកនាំ ក្នុងពេលដែលលោកបានជួបដោយផ្ទាល់ជាមួយសម្តេចក្នុងទិវាសប្បុរសធម៌កាកបាទក្រហម៨ឧសភា ២០១៩ ។
តាមអ្វីដែលលោកអាព្រីល គីនីន បញ្ជាក់គឺ សម្តេចតេជោបានសួរសុខទុក្ខក្រុមគ្រួសាររបស់លោក ហើយអ្វីដែលលោកមានភាពរំភើប និងក្តុកក្តួលបំផុតនៅពេលសម្តេចបានទូន្មានមកលោកថា «តស៊ូឡើងកូន»។
បើយោងតាមអ្វីដែលលោកលាន អាព្រីលគីនីន បញ្ជាក់នៅលើហ្វេសប៊ុកនោះបញ្ជាក់ថា «ថ្ងៃនេះមានមោទនភាពបំផុតសម្រាប់ត្រកូល«លាន»ខ្ញុំបាទដែលសម្តេចពុកបានសួរពីដំណើរជីវិតរបស់ខ្ញុំបាទ និងបងប្រុសលាន សូនី ហើយមានអារម្មណ៍ក្តុកក្តួលសម្រាប់ពាក្យដ៏មានអត្ថន័យ«ខំឡើងកូន» នេះបញ្ជាក់ថាសម្តេចពុក និងសម្តេចម៉ែបានយកចិត្តទុកដាក់ចំពោះសិល្បករទាំងអស់ទូទាំងប្រទេស ។ ខ្ញុំបាទសូមបួងសួងដល់វត្ថុសក្តិសិទ្ធិសូមតាមថែរក្សាសម្តេចពុក សម្តេចម៉ែ និងក្រុមគ្រួសារសូមជួបតែសេចក្តីសុខ»។
បើទោះបីជាពេលលោកអាព្រីល គីនីន បានឃ្លាតពីវិស័យសិល្បៈក៏ពិតមែន ប៉ុន្តែលោកតែងតែបង្ហាញខ្លួនចូលរួមក្នុងកម្មវិធី ផ្សេងៗរបស់សិល្បៈដែលជិតស្និទ្ធដដែល ។ លោកបានឃ្លាតឆ្ងាយពីសិល្បៈដោយសារតែបច្ចុប្បន្នលោកកំពុងកាន់កាប់ជំនួញផ្ទាល់ខ្លួននៅក្នុងដៃ ដែលធ្វើឲ្យលោកមិនអាចដកឃ្លាបាន ។
បើទោះបីជាបានចាកឆ្ងាយពីសិល្បៈក៏ពិតមែន ប៉ុន្តែលោកលាន អាព្រីលគីនីន ធ្លាប់ទទួលរងព័ត៌មានមិនល្អជាបន្តបន្ទាប់ ។ យ៉ាងណាក្តីរហូតមកទល់ពេលនេះរលកព័ត៌មានទាំងអស់នោះបានស្ងប់ទៅវិញ ហើយលោកក៏បានសម្ងំរកសុីជាធម្មតា ខណៈពេល កូនៗរបស់លោកក៏បានចម្រើនវ័យកាន់តែធំ ៕
ចែករំលែកព័តមាននេះ