ខេត្តកំពង់ធំ ៖ បុរសម្នាក់បានស្លាប់សង្ស័យគាំងបេះដូង កាលពីព្រឹកថ្ងៃទី៩ ខែឧសភា ឆ្នាំ២០១៩ នៅចំណុចអូរទឹកថ្លា ក្នុងកសិដ្ឋានមួយរបស់ក្រុមហ៊ុនបារៀកំពង់ធំអភិវឌ្ឍន៍កៅស៊ូ ស្ថិតនៅក្នុងភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ ។
តាមប្រភពពីនគរបាលបានប្រាប់ឱ្យដឹងថា ជនរងគ្រោះដែលស្លាប់ឈ្មោះ ជិន សឿង ភេទប្រុស អាយុ៥៣ ឆ្នាំ មុខរបរកសិករ មានទីលំនៅភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ។
បើតាមការរៀបរាប់ពីឈ្មោះ ឡុង ឃាង ភេទស្រី អាយុ៤៨ឆ្នាំ ត្រូវជាប្រពន្ធរបស់ជនរងគ្រោះនិយាយថា ពួកគាត់មានកូនប្រុសម្នាក់ឈ្មោះ សូ គីម អាយុ២៧ឆ្នាំ មកធ្វើការជាកម្មករចៀរជ័រនៅក្រុមហ៊ុនខាងលើ ដោយសារតែមានក្តីនឹករលឹកកូនពេក គាត់ក៏បាននាំកូនចៅ និងប្តីមកលេងកូនប្រុសដែលធ្វើការជាកម្មករចៀរជ័រនៅក្រុមហ៊ុនខាងលើ ។
តាមប្រភពដដែលបានបន្តថា ក្រោយពីបានហូបបាយល្ងាចរួច ពេលយប់ក៏នាំគ្នាសម្រាកនៅក្នុងរោងស្នាក់នៅរបស់កម្មករ លុះវេលាម៉ោងប្រហែលជា៣ទៀបភ្លឺ ប្ដីរបស់គាត់មានអាការ:មិនស្រួលខ្លួន ហើយទន់ដៃទន់ជើងត្រជាក់ស្រេប បែកញើសពេញខ្លួន ឃើញដូច្នេះគាត់ក៏បានប្រើកូនប្រុសឈ្មោះ សូ គីម ហៅអ្នកជិតខាងមកជួយមើលប្តីរបស់គាត់ ពេលនោះអ្នកជិតខាងបាននាំគ្នាមកជួយច្របាច់ គក់ កោសខ្យល់ដែរ នៅតែមិនប្តីរបស់គាត់មិនដឹងខ្លួនទៀត រហូតដល់ព្រឹក ប្ដីរបស់គាត់បានក៏ផុតដង្ហើមស្លាប់បាត់ទៅ ហើយក៏បានរាយការណ៍ប្រាប់សមត្ថកិច្ចដើម្បីឱ្យចុះមកពិនិត្យ។
ក្រោយពេលបានទទួលព័ត៌មានខាងលើភ្លាម កម្លាំងជំនាញសហការជាមួយប៉ុស្តិ៍នគរបាលរដ្ឋបាល និងអាជ្ញាធរភូមិ ចុះទៅដល់កន្លែងកើតហេតុ ដើម្បីពិនិត្យហេតុនិងសពជនរងគ្រោះ ជាលទ្ធផលរកពុំឃើញមានស្លាកស្នាមអ្វីគួរឲ្យកត់សម្គាល់នោះឡើយគឺជនរងគ្រោះពិតជាស្លាប់ដោយសារជំងឺគាំងបេះដូងប្រាកដមែន ហើយក៏បានប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ