រាជធានីភ្នំពេញ ៖ អ្នកនាំពាក្យរាជរដ្ឋាភិបាលអះអាងថា ពលករខ្មែរធ្វើការងារនៅក្រៅប្រទេសគឺមិនស្ថិតនៅក្នុងស្ថានភាពជាទាសករដូចសម័យកាលដែលប្រទេសអភិវឌ្ឍមួយចំនួនបានជួញដូរមនុស្ស ដើម្បីបំពេញកង្វះខាតកម្លាំងពលកម្មនោះទេ ។ ការអះអាងរបស់អ្នកនាំពាក្យរាជរដ្ឋាភិបាលនេះ ក្រោយពីមានមតិមួយចំនួនលើកឡើងថា ពលករខ្មែរធ្វើការងារនៅក្រៅប្រទេសដូចជាទាសករ ។…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលអះអាងថា ពលករខ្មែរធ្វើការងារនៅក្រៅប្រទេសគឺមិនស្ថិតនៅក្នុងស្ថានភាពជាទាសករដូចសម័យកាលដែលប្រទេសអភិវឌ្ឍមួយចំនួនបានជួញដូរមនុស្ស ដើម្បីបំពេញកង្វះខាតកម្លាំងពលកម្មនោះទេ ។ ការអះអាងរបស់អ្នកនាំពាក្យរាជរដ្ឋាភិបាលនេះ ក្រោយពីមានមតិមួយចំនួនលើកឡើងថា ពលករខ្មែរធ្វើការងារនៅក្រៅប្រទេសដូចជាទាសករ ។
យោងតាមសេចក្ដីថ្លែងការណ៍របស់អ្នកនាំពាក្យរាជរដ្ឋាភិបាល នៅថ្ងៃទី៩ ខែឧសភា ឆ្នាំ២០១៩ បានឲ្យដឹងថា «ពលករខ្មែរដែលធ្វើការនៅក្រៅប្រទេស គឺមិនស្ថិតនៅក្នុងស្ថានភាពជាទាសករដូចសម័យកាលដែលប្រទេសអភិវឌ្ឍមួយចំនួនបានជួញដូរមនុស្ស ដើម្បីបំពេញកង្វះខាតកម្លាំងពលកម្មនោះទេ ។ និន្នាការចំណាកស្រុកទៅកាន់បរទេស ដើម្បីការងារនឹងជីវភាពរួមជាមួយបទពិសោធ គឺជាលក្ខខណ្ឌសកលដែលប្រជាពលរដ្ឋនៃប្រទេសមួយចំនួនធំក្នុងលោកកំពុងតែអនុវត្តជាក់ស្ដែង» ។
ថ្លែងការអ្នកនាំពាក្យបានបន្ដថា រាជរដ្ឋាភិបាលក៏បានបង្កើតទីភ្នាក់ងារជាតិមុខរបរ និងការបណ្ដុះបណ្ដាលជំនាញវិជ្ជាជីវៈឲ្យស្របទៅតាមតម្រូវការទីផ្សារពលកម្មផ្ទៃក្នុង និងក្រៅប្រទេ ស ។ អ្នកនាំពាក្យថា ពលករខ្មែរដែលកំពុងបំពេញការងារនៅក្រៅប្រទេសទទួលបានផលប្រយោជន៍ពីការអនុវត្តច្បាប់អង្គការអន្ដរជាតិដូចជា ផ្នែកអន្តោប្រវេសន៍ (IOM) អង្គការពលកម្ម អន្ដរជាតិ (ILO) អង្គការពាណិជ្ជកម្មពិភពលោក (WTO) ក៏ដូចជា ច្បាប់ និងលក្ខខណ្ឌផ្សេងៗ បន្ថែមទៀត ។
ជាមួយគ្នានេះដែររាជរដ្ឋាភិបាលកំពុងយកចិត្តទុកដាក់យ៉ាងខ្លាំងក្នុងការពារពលករខ្លួនដែលមានចំនួនជាង១,២លាននាក់កំពុងធ្វើការនៅក្រៅប្រទេស តាមរយៈអនុស្សារនៈនៃកិច្ចព្រមព្រៀងទ្វេភាគីរវាងរាជរដ្ឋាភិបាលកម្ពុជា ជាមួយរាជរដ្ឋាភិបាលមួយចំនួនដែលជាម្ចាស់ផ្ទះ (MoU) ។
សូមរំលឹកថា ពលករខ្មែរដែលធ្វើការនៅក្រៅប្រទេសបានបញ្ជូនប្រាក់មកកាន់មាតុភូមិរបស់ខ្លួនជាង២,៣ពាន់លានដុល្លារជារៀងរាល់ឆ្នាំ ។ ព្រមទាំងធ្វើឲ្យក្រុមគ្រួសារមានជីវភាពកាន់តែល្អប្រសើររស់នៅក្នុងបរិយាកាសមានសន្ដិភាព ស្ថិរភាព សុភមង្គល និងការអភិវឌ្ឍរួមជាមួយរាជរដ្ឋាភិបាល ដើម្បីរក្សាបាននូវកំណើនសេដ្ឋកិច្ចខ្ពស់ជាង៧.៥% តាមការវាយតម្លៃដោយធនាគារពិភពលោក ។ ក្នុងថ្លែងការណ៍ក៏បានលើកឡើងថា ទិដ្ឋភាពទីផ្សារសេរីនៃសកលភាវូបនីយកម្ម ប្រជាពលរដ្ឋខ្មែរគ្រប់រូបសុទ្ធតែមានសិទ្ធិទទួលបានការងារ និងផលប្រយោជន៍ ដែលត្រូវបានការពារទាំងក្នុងស្រុក និងក្រៅប្រទេសដែលខ្លួនពេញចិត្តជ្រើសរើសស្របទៅតាមច្បាប់ដែលបានចែងជាមាននឹងគោលការណ៍ពលកម្មរអន្តរជាតិ ។
ប្រភពបន្តថា នៅក្នុងបរិបទនេះរាជរដ្ឋាភិបាលបាន និងកំពុងប្រឹងប្រែងពង្រឹងកិច្ចសហ ប្រតិបត្តិការជាមួយបណ្តាប្រទេសជាមិត្តជាច្រើន ដើម្បីបង្កភាពងាយស្រួលទាំងផ្នែកច្បាប់ បច្ចេកទេស សមត្ថភាព និងលក្ខខណ្ឌផ្សេងៗទៀតសម្រាប់ផលប្រយោជន៍ និងសិទ្ធិរបស់ប្រ ជាពលករខ្មែរ ដែកលោកកំពុងបំពេញការងារនៅឯក្រៅប្រទេស ។ ក្រៅពីឱកាស និងបទពិសោធន៍ការងារជាមួយនឹងប្រាក់ចំណូលល្អប្រសើរពួកគេក៏បានទទួលបានបន្ថែមទៀតផងដែលនូវវប្បធម៌ និងចរិតការងារពីប្រទេសអភិវឌ្ឍ និងពង្រឹងបន្ថែមទៅកាន់ដំណាក់កាលថ្មីមួយទៀតរបស់កម្ពុជាទៅជាប្រទេសដែលមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងកម្រិតខ្ពស់នៅឆ្នាំ២០៥០ ៕
ចែករំលែកព័តមាននេះ