រាជធានីភ្នំពេញ ៖ មានការកត់សម្គាល់កន្លងមក ភូមិគ្រឹះស្កឹមស្កៃដែលជួលឱ្យក្រុមជនជាតិចិននេះ មិនតិចម៉ឺនដុល្លារទេក្នុង១ខែ ហើយស្ថានភាពភូមិគ្រឹះស្តុកស្តម្ភបែបនេះ បានក្លាយជារនាំងសុវត្ថិភាព សម្រាប់ក្រុមម៉ាហ្វ៊ីយ៉ាទាំងនេះលាក់ខ្លួន ធ្វើសកម្មភាពបានយ៉ាងសុខសាន្តរាប់ឆ្នា ំទើបបែកពាងប្រហុក…
រាជធានីភ្នំពេញ ៖ មានការកត់សម្គាល់កន្លងមក ភូមិគ្រឹះស្កឹមស្កៃដែលជួលឱ្យក្រុមជនជាតិចិននេះ មិនតិចម៉ឺនដុល្លារទេក្នុង១ខែ ហើយស្ថានភាពភូមិគ្រឹះស្តុកស្តម្ភបែបនេះ បានក្លាយជារនាំងសុវត្ថិភាព សម្រាប់ក្រុមម៉ាហ្វ៊ីយ៉ាទាំងនេះលាក់ខ្លួន ធ្វើសកម្មភាពបានយ៉ាងសុខសាន្តរាប់ឆ្នា ំទើបបែកពាងប្រហុក ៕
គួរបញ្ជាក់ថា ភូមិគ្រឹះដ៏ស្កឹមស្កៃមួយកន្លែង ត្រូវបានកម្លាំងនគរបាលនាយដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន ក្រសួងមហាផ្ទៃធ្វើការឡោព័ទ្ធដោយឃាត់ខ្លួនជនជាតិចិន ប្រុសស្រីចំនួន២៨នាក់ព្រមទាំងដកហូតសម្ភារមួយចំនួនធំ ដែលជាប់សង្ស័យពីបទល្មើសតាមប្រព័ន្ធអុីនធើរណេត ។
ប្រតិបត្តិការនេះ ធ្វើឡើងនៅវេលាម៉ោង៣និង៣០នាទីរសៀលថ្ងៃទី៧ ឧសភា នៅចំណុចភូមិគ្រឹះគ្មានលេខ ផ្លូវលំ ភូមិសំរោង សង្កាត់ឃ្មួញ ខណ្ឌសែនសុខ ។ ប្រតិបត្តិការនេះដែរក៏មានការសម្របសម្រួលពីលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញព្រមទាំងមានការចូលរួមពីអាជ្ញាធរ និងសមត្ថកិច្ចមូលដ្ឋានផងដែរ ។
តាមនគរបាលបានឱ្យដឹងថា ដោយមានការស្រាវជ្រាវពីកម្លាំងនគរបាលជំនាញនិងមានការសង្ស័យថា ភូមិគ្រឹះខាងលើត្រូវបានជនជាតិចិនជួលប្រព្រឹត្តបទល្មើស តាមប្រព័ន្ធអុីនធើរណេត សមត្ថកិច្ចក៏បានចុះឆែកឆេរនិងបង្ក្រាបតែម្តង ។ទោះបីជាយ៉ាងណា សមត្ថកិច្ចពុំបានបញ្ជាក់ឱ្យច្បាស់ថា ជនជាតិចិនទាំងនោះប្រព្រឹត្តបទល្មើស ជំវិតទារប្រាក់ ឬក៏លេងល្បែងតាមប្រព័ន្ធធើរណេត ឬយ៉ាងណានោះទេ ។
តាមនគរបាលឱ្យដឹងថា ជនជាតិចិនចំនួន ២៨នាក់ (ស្រី្ត៥នាក់) ត្រូវបានកម្លាំងសមត្ថកិច្ច ឃាត់ខ្លួន ដោយចងដៃ(ខ្នោះជ័រ)គ្រប់គ្នា ព្រមទាំងដកហូតសម្ភារមួយចំនួនដូចជាទូរស័ព្ទដៃ៤គ្រឿង, ទូរស័ព្ទដៃណូគៀ១១គ្រឿង, IPADMINI ៥គ្រឿង, ម៉ាស៊ីនបែងចែកអុីនធើរណេត ៦គ្រឿង, ដុំភ្លើង១ដុំ, LAPTOP ៣គ្រឿង, ម៉ាស៊ីនបំផ្លាញក្រដាស់១គ្រឿង, ម៉ាស៊ីនព្រីន១គ្រឿង, ឯកសារមួយចំនួន, រថយន្ត LEXUS.RX300 មួយគ្រឿង និងម៉ាស៊ីនថតរូប០១គ្រឿង ។
ជនសង្ស័យរួមទាំងវត្ថុតាងត្រូវបានសមត្ថកិច្ចបញ្ជូនទៅកាន់នាយដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃដើម្បីសាកសួរនិងបន្តនីតិវិធី ។
ចែករំលែកព័តមាននេះ