សហរដ្ឋអាមេរិក ៖ សហរដ្ឋអាមេរិកកាលពីថ្ងៃទី៧ឧសភា បានបដិសេធមិនចុះហត្ថលេខាលើសេចក្ដីថ្លែងការណ៍មួយ ស្ដីពីអនាគតនៃតំបន់អាក់ទិក ដែលកំណត់ពីការផ្លាស់ប្ដូរបរិយាកាស ដែលចាត់ទុកថារងការគំរាមកំហែងធ្ងន់ធ្ងរសម្រាប់តំបន់ប៉ូលផែនដីនោះ។ រួមប្រជុំគ្នានៅទីក្រុងROVANIEMIហ្វាំងឡង់ រដ្ឋមន្ត្រីការបរទេសរបស់ប្រទេស៨ជាសមាជិកក្រុមប្រឹក្សាអាក់ទិក បានបញ្ចប់កិច្ចពិភាក្សាគ្នារយៈពេល២ថ្ងៃ…
សហរដ្ឋអាមេរិក ៖ សហរដ្ឋអាមេរិកកាលពីថ្ងៃទី៧ឧសភា បានបដិសេធមិនចុះហត្ថលេខាលើសេចក្ដីថ្លែងការណ៍មួយ ស្ដីពីអនាគតនៃតំបន់អាក់ទិក ដែលកំណត់ពីការផ្លាស់ប្ដូរបរិយាកាស ដែលចាត់ទុកថារងការគំរាមកំហែងធ្ងន់ធ្ងរសម្រាប់តំបន់ប៉ូលផែនដីនោះ។
រួមប្រជុំគ្នានៅទីក្រុងROVANIEMIហ្វាំងឡង់ រដ្ឋមន្ត្រីការបរទេសរបស់ប្រទេស៨ជាសមាជិកក្រុមប្រឹក្សាអាក់ទិក បានបញ្ចប់កិច្ចពិភាក្សាគ្នារយៈពេល២ថ្ងៃ ដែលផ្ដោតលើការសន្យាជាថ្មីរបស់ពួកគេ ជាគុណប្រយោជន៍ដល់ការអភិវឌ្ឍន៍ដ៏ស្ថិតស្ថេរ ហើយការពារបរិស្ថានតំបន់នោះ។ នេះជាលើកដំបូងហើយដែលបណ្ដាប្រទេសជាសមាជិកក្រុមប្រឹក្សាអាក់ទិក បង្កើតឡើងកាលពីឆ្នាំ១៩៩៦ពុំអាចព្រមព្រៀងគ្នា លើសេចក្ដីថ្លែងការណ៍ចុងក្រោយមួយស្ដីពីកិច្ចការពារបរិស្ថានតំបន់នោះ។
ក្រុមប្រឹក្សានោះមានសមាជិក កាណាដា ដាណឺម៉ាក់ សហរដ្ឋអាមេរិក ហ្វាំងឡង់ អុីស្លង់ ន័រវែស រុស្ស៊ី និងស៊ុយអែត ហើយចិនមានលក្ខន្តិកៈជាអ្នកសង្កេតការណ៍។ ជាតំបន់មួយដែលសីតុណ្ហភាពមានការកើនឡើង២ដង លឿនជាងនៅកន្លែងឯទៀតៗនៃភពផែនដី ការរលាយទឹកកក បានបង្កើនការចាប់អារម្មណ៍របស់បណ្ដាប្រទេសនៅជាប់តំបន់នោះ ក៏ដូចជាបណ្ដាប្រទេសនៅជាប់ជិតខាង ដូចជាចិនជាដើមព្រោះតំបន់នោះសម្បូរដោយប្រេងកាតនិងឧស្ម័នធម្មជាតិ ដែលនៅពុំទាន់ធ្វើអាជីវកម្មនៅឡើយ។
ចំណែកនៅក្រោមដីវិញសម្បូរដោយរ៉ែកម្រ ដែលប្រទេសនានាមានការចាប់អារម្មណ៍ខ្លាំង។ ម្យ៉ាងទៀតតំបន់នោះ ដោយសារការរលាយទឹកកកឆាប់ ក៏នឹងក្លាយជាផ្លូវធ្វើនាវាចរណ៍សមុទ្រដែលខ្លីផងដែរ។
សហរដ្ឋអាមេរិកលាតត្រដាងកាលពីថ្ងៃទី៦ឧសភា ពីមហិច្ឆតារបស់ខ្លួន ពង្រឹងកម្លាំងនៅតំបន់អាក់ទិកនេះ ដើម្បីប្រឈមមុខនឹងអ្វីដែលខ្លួនហៅថា ឥរិយាបថឈ្លានពានរបស់ចិននិងរុស្ស៊ីក្នុងតំបន់សម្បូរដោយធនធានធម្មជាតិនិងពោរពេញដោយកាលានុវត្តភាពសេដ្ឋកិច្ចនោះ។
ក្នុងសុន្ទរកថាមួយនៅទីក្រុងROVANIEMI់ រដ្ឋមន្ត្រីការបរទេសអាមេរិក លោកMIKE POMPEOថ្លែងថា តំបន់នោះក្លាយទៅជាទីលាននៃអំណាចពិភពលោកនិងការប្រកួតប្រជែង។ ប្រការដែលតំបន់អាក់ទិកធ្លាប់ជាកន្លែងព្រៃផ្សៃមួយ តែគេមិនត្រូវនិយាយថាវាក្លាយជាកន្លែងគ្មានចិត្តនិងគ្មានច្បាប់ឡើយ។
មុនកិច្ចប្រជុំរបស់ក្រុមប្រឹក្សាអាក់ទិក រដ្ឋមន្ត្រីការបរទេសអាមេរិក បានវាយប្រហារជាពិសេសលើក្រុងប៉េកាំងនិងក្រុងមូស្គូ។ លោកថាឥរិយាបថឈ្លានពានរបស់ចិន បង្ហាញឲ្យយើងឃើញវិធីដែលចិននឹងធ្វើអាជីវកម្មនៅអាក់ទិក។ ចិនកាន់តែបង្កើនឥទ្ធិពលរបស់ខ្លួននៅទីនោះ។ លោកថាតើយើងចង់ឲ្យមហាសមុទ្រនេះ ប្រែក្លាយទៅជាសមុទ្រចិនខាងត្បូងថ្មី ដោយចិនបង្កើនសកម្មភាពយោធានិងទាមទារបណ្ដាដែនដីដែលមានទំនាស់ឬ?
លោកPOMPEOបន្តថា ដោយវិនិយោគក្នុងតំបន់នោះប្រមាណជាជិត៩០ពាន់លានដុល្លារ រវាងឆ្នាំ២០១២និង២០១៧ ក្រុងប៉េកាំងចង់ធ្វើឲ្យតំបន់នោះ ក្លាយជាផ្លូវសូត្រខាងជើងដែលអាចកាត់បន្ថយ ចម្ងាយផ្លូវសមុទ្ររវាងមហាសមុទ្រប៉ាស៊ីហ្វិកនិងមហាសមុទ្រអត្លង់ទិក។ ដោយកាត់ភាគខាងជើងរុស្ស៊ី ផ្លូវសមុទ្រនោះជាផ្លូវអាចច្វើនាវាចរណ៍បានកាន់តែច្រើន ដោយសារការរលាយនៃផ្ទាំងទឹកកក។ ចិននិងរុស្សុីចង់ធ្វើឲ្យតំបន់នេះជាផ្លូវសូត្រថ្មី៕
ចែករំលែកព័តមាននេះ