រាជធានីភ្នំពេញ ៖ ថ្នាក់ដឹកនាំក្រសួង ពាណិជ្ជកម្មនៃកម្ពុជាបាននឹងកំពុងជំរុញធុរជនជប៉ុន ចូលមកបណ្តាក់ទុននិងធ្វើធុរកិច្ចថែមទៀតនៅកម្ពុជា ដើម្បីបង្កើនទំហំពាណិជ្ជកម្មទ្វេភាគី ស្របតាមចក្ខុវិស័យរបស់ប្រមុខរាជរដ្ឋាភិបាលនៃប្រទេសទាំងពីរ ខណៈការធ្វើពាណិជ្ជកម្មរវាងកម្ពុជា-ជប៉ុន បានកើនឡើងគួរឱ្យកត់សម្គាល់នៅក្នុងឆ្នាំ 2018 ។
លោក ឈួន ដារ៉ា រដ្ឋលេខាធិការក្រសួងពាណិជ្ជកម្មថ្មីៗនេះនាឱកាសដឹកនាំប្រតិភូចូលរួមបើកព្រឹត្តិការណ៍ «ពិព័រណ៍កម្ពុជា» ដែលរៀបចំឡើងនៅក្នុងទីក្រុងតូក្យូ កាលពីព្រឹកថ្ងៃទី០៣ ខែឧសភា ឆ្នាំ២០១៩ បានធ្វើការបង្ហាញអំពីសក្តានុពល និងវឌ្ឍនភាពនៃវិស័យពាណិជ្ជកម្មកម្ពុជា ដែលកាលពីឆ្នាំ២០១៨ សម្រេចបានទឹកប្រាក់សរុបប្រមាណជាង ២៥ពាន់លានដុល្លារ នៅក្នុងនោះការនាំចេញរបស់កម្ពុជាមានចំនួន ១១ពាន់លានដុល្លារ និងនាំចូលមានចំនួន ១៣ពាន់លានដុល្លារ ។ លោកក៏បានថ្លែងអំណរគុណរាជរដ្ឋាភិបាលជប៉ុន ដែលបានផ្តល់ហិរញ្ញប្បទានយ៉ាងច្រើន ដើម្បីគាំទ្រដល់ការអភិវឌ្ឍសង្គម-សេដ្ឋកិច្ចរបស់កម្ពុជា ជាពិសេសការកសាងសន្តិភាព និងស្តារឡើងវិញនូវនីតិសម្បទា ក៏ដូចជាលទ្ធិប្រជាធិបតេយ្យ។ បន្ថែមពីលើនេះ លោកក៏បានជម្រាបជូនអង្គពិធី អំពីគោលនយោបាយគាំពារវិនិយោគកម្ពុជា និង «បានជំរុញធុរជនជប៉ុន ចូលមកបណ្តាក់ទុន និងធ្វើធុរកិច្ចថែមទៀត ដើម្បីបង្កើនទំហំពាណិជ្ជកម្មទ្វេភាគី ស្របតាមចក្ខុវិស័យរបស់ប្រមុខរាជរដ្ឋាភិបាលនៃប្រទេសទាំងពីរ» ។
លោក ឈួន ដារ៉ា បន្តថា «តាមរយៈការចូលរួមព្រឹត្តិការណ៍ពិព័រណ៍ថ្ងៃនេះ ខ្ញុំសង្ឃឹមថានឹងធ្វើឱ្យកិច្ចសហប្រតិបត្តិការវិស័យពាណិជ្ជកម្ម និងទេសចរណ៍រវាងកម្ពុជា និងជប៉ុន កាន់តែមានវឌ្ឍភាពថែមទៀត» ។
សូមបញ្ជាក់ថា ទំហំពាណិជ្ជកម្មរវាងកម្ពុជា-ជប៉ុនក្នុងឆ្នាំ២០១៨ កន្លងមានគឺមានទំហំកើនឡើងគួរឲ្យកត់សម្គាល់។ ជាក់ស្តែងសម្រាប់ការនាំចេញពីកម្ពុជាទៅជប៉ុនមានការកើនឡើងចំនួន ២៧,៣ ភាគរយ និងការនាំចូលកើនឡើង ១៧,៨ ភាគរយ ។ នេះបើយោងតាមតួលេខចុងក្រោយបង្អស់របស់អង្គការពាណិជ្ជកម្មក្រៅប្រទេសរបស់ជប៉ុន (JETRO) ។ ក្នុងនោះផងដែរ ចាប់ពីខែមករា ដល់ខែធ្នូ ឆ្នាំ២០១៨ កន្លងទី ការដឹកជញ្ជូនទំនិញមានតម្លៃជាង ១,៦ ពាន់លានដុល្លារ ត្រូវបានបញ្ជូនទៅប្រទេសជប៉ុន ខណៈដែលកម្ពុជាបានទិញទំនិញពីជប៉ុនវិញក្នុងចំនួន ៤២១ លានដុល្លារអាមេរិក ។
សម្រាប់កម្ពុជាមុខទំនិញនាំចេញសំខាន់ៗទៅទីផ្សារជប៉ុនគឺមាន សម្លៀកបំពាក់ ផលិតស្បែកជើង គ្រឿងអេឡិចត្រូនិច ថ្មទូរស័ព្ទដៃជាដើម ៕
ចែករំលែកព័តមាននេះ