ខេត្តប៉ៃលិន ៖ បន្ទាប់ពីមានរឿងរ៉ាវដ៏ចម្រូងចម្រាស់កើតឡើងដោយសារទំនាស់ដីធ្លីរវាងភាគីម្ខាង និងភាគីម្ខាងទៀត នៅលើទឹកដីភូមិផ្សារព្រំ ឃុំស្ទឹងកាច់ ស្រុកសាលាក្រៅ បុរសម្នាក់ ដែលបានអះអាងថា ខ្លួនបានទិញដីមួយកន្លែងរួច ស្រាប់តែមានបញ្ហាកើតឡើងដោយមានគេមករករឿងយកដីនោះដើម្បីធ្វើជាកម្មសិទ្ធិរបស់ខ្លួន ហើយថែមទាំងជួលដីនោះឱ្យទៅក្រុមហ៊ុនទូរស័ព្ទចល័តចូលទៅជីកដីដាក់បង្គោលធ្វើជាកន្លែងដាក់អង់តែនសេវាទូរស័ព្ទ ទើបប្តឹងអាជ្ញាធរមូលដ្ឋានឱ្យជួយអន្តរាគមន៍ទប់ស្កាត់ហាមឃាត់តែម្តង ។
ហេតុការណ៍អាជ្ញាធរចុះទប់ស្កាត់មិនឱ្យនរណាម្នាក់សាងសង់អ្វីនៅលើដីទំនាស់ខាងលើនេះបានកើតឡើងកាលពីវេលាម៉ោង១០និង៤០នាទីព្រឹក ថ្ងៃទី៧ ខែឧសភា ឆ្នាំ២០១៩ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីបុរសម្នាក់ឈ្មោះ គង់ សុទ្ធវិចិត្រ អាយុ៤៦ឆ្នាំ ជាមន្ត្រីយោធា រស់នៅភូមិប៉ាហ៊ី ត្បូង សង្កាត់ប៉ៃលិន ក្រុងប៉ៃលិន បានឱ្យដឹងថា លោកបានទិញដីមួយកន្លែងកាលពីឆ្នាំ២០១៦ ដែលមានបណ្តោយប្រវែង៣៩ម៉ែត្រ និងទទឹង១០ម៉ែត្រ ពីបុរសម្នាក់ឈ្មោះ ហ៊ាង ភារក្ស អាយុ៣៤ឆ្នាំ ប្រពន្ធឈ្មោះ កែវ ស្រីមុំ អាយុ២៦ឆ្នាំ រស់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
លុះក្រោយមកស្រាប់តែមានបុរសម្នាក់ទៀតឈ្មោះ ឆន ចាន់ថុន ជាមន្ត្រីយោធា អត្តសញ្ញាណលេខ០៧៧៤៤៦ អង្គភាព៥០៤ នៅក្នុងខេត្តប៉ៃលិនបានអះអាងថា ដីនោះជាដីរបស់ឪពុកក្មេកគេឈ្មោះ ម៉ៅ សាមាន អាយុ៧០ឆ្នាំ និងម្តាយក្មេកឈ្មោះ អៀង ឡាយអេង អាយុ៦៤ឆ្នាំ រស់នៅភូមិបឌិននៀវ សង្កាត់ប៉ៃលិន ក្រុងប៉ៃលិន ដែលបានលក់ និងផ្ទេរកម្មសិទ្ធិដីនោះទៅឱ្យ ហ៊ាង ភារក្ស ជាដីដែលលោកបានទិញកន្លងមក ។
លោកបន្តទៀតថា ប៉ុន្តែក្រោយមកឈ្មោះ ឆន ចាន់ធុន និយាយថា ឈ្មោះ ហ៊ាង ភារក្ស បានជំពាក់លុយឪពុកម្តាយក្មេកខ្លួនមិនបានសងនោះឡើយទើបរូបគេមិនឱ្យអ្នកដែលទិញដីនោះទៅប៉ះពាល់ ឬលក់ដីឱ្យអ្នកផ្សេងបន្តនោះឡើយ ។
លោកបញ្ជាក់ថា ទោះបីជាយ៉ាងណាក៏ដោយភាគីមានបញ្ហាទាំងអស់ត្រូវដោះស្រាយបញ្ហានេះឱ្យរួចសិនដោយមិនត្រូវយកដីនោះទៅជួលឱ្យក្រុមហ៊ុនដាក់អង់តែនសេវាទូរស័ព្ទនោះឡើយ ។ លើសពីនេះ បើសិនជានរណាជំពាកក់លុយឪពុកម្តាយក្មេករបស់ខ្លួនត្រូវតែទៅដោះស្រាយជាមួយអ្នកនោះដោយលោកជាអ្នកទិញពីអ្នកនោះមិនពាក់ព័ន្ធនោះទេ ហើយលោក ឆន ចាន់ថុន ជាមន្ត្រីយោធា បែរជាគំរាមកំហែងដល់មេភូមិ និងលោក មិនឱ្យប្រើប្រាស់ដីដែលខ្លួនបានទិញគឺខុសនឹងច្បាប់ ។
បើតាមលោក ព្រាប សារុន មេភូមិផ្សារព្រំជើងបានឱ្យដឹងថា ដីខាងលើជាដីរបស់លោក គង់ សុទ្ធវិចិត្រ ដែលបានទិញពីលោក ហ៊ាង ភារក្ស ហើយមានការចុះហត្ថលេខាពីមេភូមិ មេឃុំ រួចរាល់អស់ ហើយ ដូច្នេះអ្នកផ្សេងមិនអាចមកដណ្តើមដីនោះធ្វើជាដីរបស់ខ្លួនបានឡើយ ។
លោកបន្តទៀតថា ចំណែកលោក ឆន ចាន់ធុន គ្មានសិទ្ធិអ្វីទៅសាងសង់ ឬជួលដីនោះឱ្យក្រុមហ៊ុនទូរស័ព្ទដាក់អង់តែននៅលើដីរបស់គេនោះទេ ព្រោះលោកគ្មានពាក់ព័ន្ធអ្វីសូម្បីតែបន្តិចនោះឡើយ ។ លោកបញ្ជាក់ថា បញ្ហាទំនាស់ដីខាងលើនេះលោកបានចុះទៅធ្វើការហាមឃាត់ជាច្រើនលើកច្រើនសារមកហើយតែលោក ឆន ចាន់ថុន មិនព្រមស្តាប់នោះឡើយដោយបំពានទៅលើច្បាប់ទាំងស្រុងតែម្តង ។
ចំណែកលោក ឆន ចាន់ថុន ជាមន្ត្រីយោធាបានឱ្យដឹងថា ដីនោះជារបស់ឪពុកម្តាយក្មេក របស់ខ្លួនហើយខាងលោកមិនព្រមឱ្យនរណាម្នាក់ទៅកាន់កាប់ដីខាងលើនេះបានឡើយ ព្រោះដំបូងឡើយលោក និង ហ៊ាង ភារក្ស ជាមិត្តភក្តិនឹងគ្នាហើយលោកបានចាញ់ល្បួងមិត្តភក្តិ ដោយផ្តិតមេដៃលក់ដីនេះទៅឱ្យរូបគេ ដើម្បីយកប្លង់ទៅដាក់ឱ្យអង្គការ លុះមិនទាន់បង់លុយឱ្យរូបគេផងបែរជាយកដីទៅលក់ឱ្យអ្នកដទៃទើបមិនព្រមព្រគល់ឱ្យអ្នកដទៃគ្រប់គ្រងនោះឡើយ ។
ពាក់ព័ន្ធទៅនឹងបញ្ហានេះលោក កង ថេង មេឃុំស្ទឹងកាច់បានឱ្យដឹងថា បញ្ហាជម្លោះដីធ្លីខាងលើខាងលោកមិនទាន់មានពេលដើម្បីដោះស្រាយនោះទេ ព្រោះជាប់រវល់ប្រជុំរាល់ថ្ងៃ ដូច្នេះទុកឱ្យបញ្ហានេះកើតឡើងសិនចុះខាងលោកមិនដឹងអ្វីនោះទេ បើសិនជានរណាអាចដោះស្រាយបានក៏ទុកឱ្យគេដោះស្រាយទៅចុះ ៕
ចែករំលែកព័តមាននេះ