សហរដ្ឋអាមេរិក ៖ សោកនាកម្មថ្មីក្នុងសាលារៀន កើតមានជាថ្មីទៀតហើយ ដោយសារកាំភ្លើងនៅសហរដ្ឋអាមេរិក។ យោងតាមប៉ូលិសថា ការបាញ់ប្រហារមួយកើតមាននាថ្ងៃទី៧ ឧសភា ២០១៩ ក្នុងសាលាវិទ្យាសាស្ត្រ បច្ចេកវិទ្យា វិស្វកម្មនិងគណិតវិទ្យា នៃទីក្រុង HIGHLANDS RANCH រដ្ឋកូឡូរ៉ាដូ បណ្ដាលឲ្យមនុស្សម្នាក់ស្លាប់ហើយច្រើននាក់រងរបួស។
តាម TWITTER ប៉ូលិសតំបន់ DOUGLAS បានរាយការណ៍ថា សិស្សវិទ្យាល័យម្នាក់អាយុ១៨ឆ្នាំស្លាប់ក្នុងការបាញ់ប្រហារនោះ។ ចំណែកសិស្ស៨នាក់ទៀត មានអាយុចាប់ពី១៥ឆ្នាំទៅ រងរបួសដោយសារគ្រាប់កាំភ្លើងហើយបញ្ជូនទៅមន្ទីរពេទ្យ។
ប៉ូលិសបានប្រាប់ក្រុមអ្នកកាសែតថា អ្នករបួសច្រើននាក់ស្ថិតក្នុងសភាពធ្ងន់ធ្ងរ។ ជនសង្ស័យ២នាក់បានត្រូវចាប់ខ្លួនក្នុងបរិវេណសាលា ហើយក្នុងចំណោមមនុស្សទាំង២នាក់នោះ ម្នាក់ជាមនុស្សពេញវ័យរួចម្នាក់ទៀតជាអនីតិជន។ តាមគេដឹកជនសង្ស័យទាំង២នាក់ជាសិស្សនៃសាលារៀននោះ។
ការបាញ់ប្រហារកើតមាននាវេលាម៉ោង១៤ម៉ោងក្នុងស្រុក ក្នុងសាលានេះដែលមានសិស្ស ប្រមាណជា១៨០០នាក់។ មូលហេតុនៃការបាញ់ប្រហារនៅពុំទាន់ដឹងនៅឡើយ៕
ចែករំលែកព័តមាននេះ