ខេត្តសៀមរាប ៖ កងរាជអាវុធហត្ថខេត្តសៀមរាបបានចុះបង្ក្រាបករណីឆបោក និងកាន់កាប់ដឹកជញ្ជូនអាវុធខុសច្បាប់តាមពាក្យបណ្តឹងរបស់ប្រជាពលរដ្ឋ និងដោយបានការអនុញ្ញាតពីលោកឧត្តមសេនីយ៍ត្រីប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងដោយមានការសម្របសម្រួលពីលោកកើត សុវណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប…
ខេត្តសៀមរាប ៖ កងរាជអាវុធហត្ថខេត្តសៀមរាបបានចុះបង្ក្រាបករណីឆបោក និងកាន់កាប់ដឹកជញ្ជូនអាវុធខុសច្បាប់តាមពាក្យបណ្តឹងរបស់ប្រជាពលរដ្ឋ និងដោយបានការអនុញ្ញាតពីលោកឧត្តមសេនីយ៍ត្រីប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងដោយមានការសម្របសម្រួលពីលោកកើត សុវណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បានឱ្យលោកវរសេនីយ៍ឯកថាដាលុច មេបញ្ជាការរងទទួលការងារយុត្តិធម៌ដឹកនាំកម្លាំងបានចុះធ្វើការឃាត់ខ្លួនបានជនសង្ស័យចំនួន០២នាក់រួចយកមកធ្វើការសួរនាំនៅទីបញ្ជាការកងរាជអាវុធហត្ថខេត្ត ។
ហេតុការណ៍ឃាត់ខ្លួនជនសង្ស័យឆបោកលុយពីប្រជាពលរដ្ឋនៅវេលាម៉ោង៨និង០០នាទីព្រឹកថ្ងៃទី០៤ ខែឧសភា ឆ្នាំ២០១៩ នៅចំណុចភូមិខ្នារ សង្កាត់ជ្រាវ ក្រុង-ខេត្តសៀមរាប ។ តាមប្រភពពីមន្ត្រីកងរាជអាវុធហត្ថខេត្តសៀមរាបបានប្រាប់ឱ្យដឹងនៅវេលាម៉ោង១៣និង១០នាទីរសៀល ថ្ងៃទី៨ ខែឧសភា ឆ្នាំ២០១៩ ដោយយោងតាមពាក្យបណ្តឹងរបស់ប្រជាពលរដ្ឋ និង ដោយបានការអនុញ្ញាតពីលោកឧត្តមសេនីយ៍ត្រីប៉ោ វណ្ណនិត និងដោយមានការសម្របសម្រួលពីលោក កើត សុវណ្ណារ៉េត បានដឹកនាំកម្លាំងដោយលោកវរសេនីយ៍ឯក ថា ដាលុច មេបញ្ជាការរង ទទួលការងារយុត្តិធម៌ បានចុះឃាត់ខ្លួនជនសង្ស័យបានចំនួន០២នាក់ទី១-ឈ្មោះ អោ កែហឿន ភេទប្រុស អាយុ៦០ឆ្នាំ មុខរបរមិនពិតប្រាកដ (អតីតយោធា) មានទីលំនៅភូមិសាលាកន្សែង សង្កាត់ស្វាយដង្គំ ក្រុង-ខេត្តសៀមរាប ។
ចាប់យកវត្ថុតាងអាវុធខ្លី K54 ចំនួន០១ដើម គ្រាប់ចំនួន០៥គ្រាប់ ខោអាវអង្គរក្សចំនួន០៣កំប្លេរ និងទី២-ឈ្មោះ ប៊ុន ចាន់ធឿន ភេទប្រុស អាយុ៦១ឆ្នាំ មុខរបរមិនពិតប្រាកដ ទីលំនៅភូមិស្លក្រាម ក្រុង-ខេត្តសៀមរាប ។ ប្រភពបានបញ្ជាក់ថា នៅអំឡុងដើមឆ្នាំ២០១៨ ឈ្មោះអោ កែហឿន បានដើរប្រាប់គេឯងថា ខ្លួនជាជំនួយការថ្នាក់ដឹកនាំ បើមានបងប្អូនណាមានបញ្ហាដីធ្លីជាមួយអាជ្ញាធរអប្សរាគេអាចជួយដោះស្រាយឱ្យបានប្លង់រឹងមកវិញបាន ឬក៏អ្នកណាចង់ចូលធ្វើទាហាន ឬពេទ្យ គេអាចរត់ការអោយចូលបានដោយសន្យាយ៉ាងយូរ០៣ខែ និងបានចូលក្របខណ្ឌ ។
ក្រោយមកឈ្មោះ ប៊ុន ចាន់ធឿន បានពឹងឱ្យឈ្មោះ អោ កែហឿន ជួយរត់ការចូលធ្វើទាហានដោយបង់ប្រាក់ទៅឱ្យឈ្មោះ អោ កែហឿន ចំនួន១៥០០ដុល្លារ ។ ក្រោយពីស្គាល់គ្នាហើយ ឈ្មោះ អោ កែហឿន បានឱ្យឈ្មោះប៊ុន ចាន់ធឿន បញ្ចុះបញ្ចូលប្រជាពលរដ្ឋណាដែលចង់ចូលធ្វើទាហាន គឺឱ្យទាក់ទងទៅគាត់ (អោ កែហឿន) ។ ដោយជឿលើការឃោសនាបោកបញ្ឆោតរបស់ឈ្មោះអោ កែហឿន មានប្រជាពលរដ្ឋជាង១០០នាក់បានយកប្រាក់រាប់ម៉ឺនដុល្លារមកបង់ទៅឱ្យឈ្មោះអោ កែហឿន តាមរយៈឈ្មោះ ប៊ុន ចាន់ធឿន ដើម្បីបានចូលធ្វើទាហាន ។
រហូតដល់ថ្ងៃទី០៤ ខែឧសភា ឆ្នាំ២០១៩ ទើបកម្លាំងកងរាជអាវុធហត្ថ ខេត្តសៀមរាបបានចុះអនុវត្តតាមពាក្យបណ្តឹងរបស់ពលរដ្ឋ រហូតឈានទៅដល់ធ្វើការឃាត់ខ្លួនបានជនសង្ស័យចំនួន២នាក់ ដើម្បីយកមកសាកសួរក្នុងនោះមានឈ្មោះអោ កែហឿន ជាមេក្លោង និងឈ្មោះ ប៊ុន ចាន់ធឿន ជាកូនចៅខាងដើរផ្សព្វផ្សាយឱ្យពលរដ្ឋនាំគ្នាចូលធ្វើទាហាន ។
តាមចម្លើយសារភាពរបស់ជនសង្ស័យទាំងពីរខាងលើបានសារភាពនៅចំពោះមុខសមត្ថកិច្ចកងរាជអាវុធហត្ថខេត្តថា ខ្លួនទាំង២នាក់ពិតជាបានប្រព្រឹត្តដូចការចោទប្រកាន់មែន ។ក្រោយពីឃាត់ខ្លួនបានជនសង្ស័យទាំង២នាក់ខាងលើរួចមកកងរាជអាវុធហត្ថខេត្តក៏បានរៀបចំកសាងសំណុំរឿងបញ្ជូនទៅតុលាការខេត្ត ខណៈពេលនោះត្រូវបានខាងតំណាងអយ្យការអមសាលាដំបូងខេត្តបានឱ្យយកមកផ្ញើវិញនៅទីបញ្ជាការកងរាជអាវុធហត្ថខេត្ត ។ លុះដល់ថ្ងៃទី៧ ខែឧសភា ឆ្នាំ២០១៩ ទើបតំណាងអយ្យការឱ្យបញ្ជូនមកតុលាការម្តងទៀត ហើយសម្រេចឃុំខ្លួនជនសង្ស័យទាំង២នាក់ដាក់ពន្ធនាគារខេត្តសៀមរាបបណ្តោះអាសន្ន តាមដីការបង្កាប់ឱ្យឃុំខ្លួនរបស់លោក អ៊ុំ ចាន់ថុល អនុប្រធានសាលាដំបូងខេត្តសៀមរាប និង ជាចៅក្រមស៊ើបសួរ នៃសាលាដំបូងខេត្តផងដែរ ៕
ចែករំលែកព័តមាននេះ