ជនជាតិបែលហ្ស៊ិកជាង១.០០០នាក់ក្នុងទីក្រុងលូវៀន ឡានូហ្វ ដែលនិយាយភាសាបារាំងបានធ្វើបាតុកម្មប្រឆាំងនឹងវិបត្តិនយោបាយក្នុងប្រទេសដែលមិនអាចបង្កើតរដ្ឋាភិបាលចំរុះបានដោយសារបញ្ហាទំនាស់រវាងគណបក្សដែលនិយាយភាសាហុល្លង់ និងគណបក្សនិយាយភាសាបារាំងរហូតក្លាយជាគម្លាតនយោបាយដែលអូសបន្លាយពេលដល់ទៅ២៤៩ថ្ងៃ។
ក្រុមបាតុករមួយចំនួនដែលចូលរួមក្នុងបាតុកម្មខាងលើ បានស្រាតសំលៀកបំពាក់ចេញនៅសល់តែខោជើងខ្លី និងអាវទ្រនាប់ រួមទាំងចូលតំរង់ជួរទទួលដំឡូងបារាំងចៀនជាប្រភេទអាហារចម្បងរបស់ជនជាតិបែលហ្ស៊ិក។ ស្របពេលជាមួយគ្នានេះ នៅទីក្រុងកេនមានប្រជាជនជាង៥០នាក់ ភាគច្រើនជានិស្សិតនាំគ្នាស្រាតសំលៀកបំពាក់ជាការប្រឆាំង ហើយមេដឹកនាំក្រុមបាតុករបញ្ជាក់ថា បច្ចុប្បន្នមានប្រជាជនស្រាតដើម្បីបង្ហាញនូវអត្ថន័យពីការបោកបញ្ឆោតរបស់អ្នកផ្សេង ព្រោះកាលពីមុននេះអ្នកនយោបាយបានចរចាគ្នារយៈពេល២៤៩ថ្ងៃ ប៉ុន្តែនៅតែមានវិបត្តិនយោបាយបន្ត និងប្រៀបដូចជាពួកគេកំពុងបោកប្រាស់គ្នាឯង និងអ្នកផ្សេង។
ចំណែកកាសែតបែលហ្ស៊ិក ក៏បានចុះផ្សាយអត្ថបទគួរឱ្យចង់សើចមួយថា ប្រទេសបានបង្កើតឯតទគ្គកម្មជាជើងឯកពិភពលោក គ្មានរដ្ឋាភិបាលដ៏យូរបំផុតនៅលើពិភពលោក ដោយប្រទេសបែលហ្ស៊ិកបានបំបែកឯតទគ្គកម្មរបស់អ៊ីរ៉ាក់ព្រោះអស់រយៈពេលដល់ទៅ២៤៩ថ្ងៃ ហើយនៅតែមិនអាចបង្កើតរដ្ឋាភិបាលបាន។ នៅក្នុងរបាយការណ៍បានបញ្ជាក់ទៀតថា ក្រោយពីបោះឆ្នោតទូទៅកាលពីថ្ងៃទី១៣ មិថុនា ឆ្នាំមុន គណបក្សនយោបាយនៅបែលហ្ស៊ិកចាប់ផ្តើមចរចាតាមរយៈការធ្វើវិសោធនកម្មដ៏ធំបំផុតរបស់ប្រទេសដើម្បីធ្វើឱ្យគ្រប់ភាគីពេញចិត្ត ប៉ុន្តែភាគីនីមួយៗជំទាស់គ្នាទើបកើតមានវិបត្តិធ្វើឱ្យគ្មានការបង្កើតរដ្ឋាភិបាលចាប់តាំងពីពេលនោះមក ៕
ចែករំលែកព័តមាននេះ